Magtulok kay Cristo

Ang disi-siyete antos nga si Kailey miyembro sa grupo sang mga cheerleader sang magresulta sa malala nga brain injury ang isa ka aksidente. Wala na sia makabalik eskwela samtang nagapaayo sia, kag nagsugod sia nga magbatyag sang kamingaw kag kasubo. Nabudlayan gid sia sa emosyunal kag indi sia makahibalo kon diin mangayo sang bulig. Isa ka abyan ang nagpanugyan nga mamati sia sa mga misyonero. Gintudloan nila sia parte sa Pagbayad-Sala ni Jesucristo. Naghatag sa iya sang paglaum ang pagtuon pa gid parte kay Cristo, kag pamatyag niya nga ang Dios Mismo ang nagatawag sa iya.

Siling ni Kailey sa iya nanay, “Wala ko gid mabatyagi nga palangga ako sang Dios. Pero karon kabalo na ko nga palangga Niya ako.”

Ang iya nanay nga si Michelle daw nakibot. Naghalin sia kag ang iya bana nga si Brock sa Ang Simbahan ni Jesucristo sang mga Santos sa Ulihing mga Adlaw sang pito ka tuig si Kailey tungod sa mga pamangkutanon, mga pagduhaduha, kag palaligban. Abi nila mangin malipayon ang ila bata kon wala na ang tanan nga mga miting kag mga kasuguan. Wala gid sila maghunahuna nga ang ila pagpili magapalayo kay Kailey sa Dios. Sang makita ni Michelle kag Brock ang pagbag-o kay Kailey, narealisar nila nga madugay na katama nga wala nila mabatyagan ang kalapit sa Dios, kag gusto nila nga mabatyagan ini liwat.

Nakigkita sila sa ila bishop, kag wala madugayi ang pamilya, upod ang utod ni Kailey nga si Braeden, nagbalik sa pagsimba. Ang pamatyag nga kalapit sa Dios kag pagpakig-angot liwat sa Iya—labi na paagi sa pangamuyo—nagpabalik sang ila pagtuo. Ang pagbalik sa simbahan wala nagsolbar sang tanan nila nga mga pamangkot ukon palaligban, pero narealisar nila nga ang pag-angkon sang mas mabaskog nga personal nga koneksyon sa Dios mas importante pa sangsa ila kawala-pagtuo.

Nagsugod ini tanan sang ang isa ka abyan—isa ka tin-edyer pareho ninyo—naghagad kay Kailey nga magtulok kay Cristo. Kag ginhimo niya ini!

Siling ni Jesucristo, “Magtulok sa akon sa tagsa ka panghunahuna; indi magduhaduha, indi magkahadlok” (Doktrina kag mga Kasugtanan 6:36). Amo ini ang inspirasyon sa Tema sang mga Lamharon 2025. Tugoti kami nga iistorya kon paano ninyo pilion ang magsalig imbes nga magduhaduha kag magtuo imbes nga mahadlok samtang nagatulok kamo kay Cristo:

Tamara W. Runia

Kon ginabudlayan ako, makabulig gid sa akon ang magpanumdom kay Jesucristo nga bukas ang mga butkon. Kon magtulok ako sa Iya, madumduman ko ang mga tinaga sa kanta nga “I Will Walk with Jesus [Malakat Ako Upod kay Jesus]”: “Indi niya ako pagbayaan, bisan pa matumba ako.”

Emily Belle Freeman

Kon mabasahan ko ining tema sa balaan nga kasulatan, nagakadumduman ko si Pedro sa Dagat sang Galilea. Ang pagtutok sa bagyo nagpadugang sang iya kahadlok kag pagduhaduha, amo nga nalunod sia sa mamadlos nga mga balod. Pero ang pagtutok sa Manluluwas nagbulig sa Iya nga mahimo ang wala pa niya nahimo sadto: nakalakat sia sa tubig! Daw ano bala ini katahum. Ano ayhan ang malab-ot mo kon magtulok ka sa Iya?

Andrea Muñoz Spannaus

Kon magsugod ako nga makulbaan, bisan diin man ako ukon bisan ano pa ang sitwasyon ko, hungod ko gid nga ginapanumdom ang relasyon ko sa Amay nga Langitnon kag kay Jesucristo. Ginasulit-sulit ko sa akon kaisipan: ANAK AKO SANG DIOS. Sige ko ini nga ginahimo hasta nga maghagan-hagan ang pamatyag ko. Makabulig gid ini pirme!

Bradley R. Wilcox

Pamangkuta ang imo kaugalingon kon sin-o ang nagaulikid kag nagapalangga gid sa imo. Mga ginikanan mo bala kag mga lider sang Simbahan? Mga tawo sa social media nga basi isa ka lang ka numero sa ila? Magtulok sa Amay nga Langitnon kag kay Cristo. Nagaulikid gid sila sa imo!

Steven J. Lund

Tandai kon ano ang ginapadumdom sa imo sa pag-recite mo sang mga tema sang Aaronic Priesthood Quorum kag Young Women: Pinalangga ka nga anak sang Dios. Magtuo nga ang aton Amay may plano para sa imo. Ang pagtulok kay Cristo nagakahulugan sang pagsiguro nga ang Iya Pagbayad-Sala ara sa sentro sinang plano.

Michael T. Nelson

Ang pagbasa sang balaan nga mga kasulatan, pagtulok kay Cristo! Ang mga pagpangduhaduha kag kahadlok nagakadula lang kon ginapadumdom kita sang mga milagro kag mga pinanudlo ni Jesus. Maswerte gid kita nga mabasa naton ang Iya mga pulong. Magamit ini sa tagsa ka sitwasyon nga maeksperiyensyahan naton sa aton mga kabuhi.