Ɔdɔ na Dɛwdzi Enyigyesɛm

Da fofor bi hyɛɛ ase maa adasamba wɔ ndua kwaa bi mu, beebi a Nyankopɔn na Ne Ba, Jesus Christ, puei na wɔnye Joseph Smith kasae wɔ Joseph kumabaa ne mpaabɔ nyiano fa asɔr a ɔwɔ dɛ ɔdɔm ho (hwɛ Joseph Smith—Abakɔsɛm 1:14-20). Jesus Christ kãa kyerɛɛ Joseph dɛ mma ɔnndɔm asɔr biara. Ɔbɔɔ anohoba dɛ N’asɛmpa ne mãhyɛ no ndaamba wobeyi akyerɛ Joseph.

Nyimpa pii dze, nna ɔyɛ dɛ onnkesi dɛ wɔbɛfrɛ Joseph ma ɔayɛ edwuma a ohia a ɔtse dɛm, na wɔammfom so. Oennya nwomasũa na nna ɔyɛ banyimba a no ho nnyi mfaso a ofi ekurase kakraba bi wɔ kurow a wonnyim mu. Dɛmara dɛ binom kãe fa Agyenkwa no ho wɔ Ne mber mu no, “Ana biribi papa bi botum efi Nazareth aba?’’ (John 1:46), pii na wɔdwendwenn adze papa a obotum efi mfe-14 wɔ Palmyra, New York, a onnyim hwee hɔ aba. Naaso ɔnam Joseph do—dɛ ma nna ɔyɛ dɛ onnkotum esi no—Ɔsor Egya na Ewuradze Jesus Christ bɛma nokwar anwanwadze no aba mu. Ɔsɛ dɛ iyi dze enyidado brɛ hɛn wɔ hɛn kwan kakrabaa na ahobrɛadze mu, yebotum so ayɛ hɛn afamudze wɔ kwan a ɔyɛ mfaso mu ama Ewuradze n’edwuma.

Annkyɛr, a Ewuradze frɛɛ Joseph “na ɔkasaa fii sor, na ɔmaa no mbrasɛm’’ (Nkyerɛkyerɛ na Ahyɛmudzi 1:17). Joseph nyaa nyikyerɛ na nkyerɛkyerɛ a wɔsom bo na wɔdze kan fofor brɛɛ hɛn ntseasee fa Ɔsor Egya no dɔ nhyehyɛɛ na Jesus Christ no ɔpon ɔdɔ na No werdam afɔrbɔ tum no ho. Awanwadze mu ara, enyigyesɛm yinom bae mber pɔkyee noara wɔ mber a kankɔ tsitsir wɔ ahɛnsɛm, nkitahodzi, na ndzɛmba bi so bɛma kwan ma Nyankopɔn ne kan no ahyerɛn dze ehyira Ne mba bebereebe.

Bɔfo Moroni Dze Mprɛtse no Rema Joseph Smith, C. C. A. Christensen yɛɛ nsaano mfonyin no

Nyankopɔn No Dɔ ho Dase a Tum wɔ mu.

Nna bɔfo Moroni a opuei Joseph Smith do no yɛ adzehia tsitsir ma Nsanananmu na Nyankopɔn no dɔ a tum wɔ mu ho dase. Moroni kãa nkyerɛwee bi a, wɔkyerɛɛw no wɔ sika mprɛtse do, na wɔdze siee nkwankyɛn bi ho asɛm (hwɛ Joseph Smith—Abakɔsɛm 1:33–34). Ewiei no, wɔmaa Joseph “tum fi sor’’ (Nkyerɛkyerɛ na Ahyɛmudzi 20:8) dɛ ɔnkyerɛ nkyerɛwee no ase nkɔ dza ɔabɛyɛ Mormon Nwoma no, a ɔnye Bible no gyina estipɛn na ɔyɛ Jesus Christ n’ahyɛmu kor so.

Mormon Nwoma no nyina mu no, yɛkenkan fa nkorɔfo a, mfe bɔbor ɔha ansaana Christ ne mbae no, nna wonyim na wɔkãa Ne mbae ho asɛm na wɔhwehwɛɛ no enyiber do no ho. Yɛsan so hu awanwasɛm fa Agyenkwa a Ɔasoɛr efi owu mu a nankasa puei Nephifo no do na ɔsoom wɔ hɔn ntamu, ber a Ɔtoo nsa frɛɛ hɔn nyinara dɛ wɔmbra No hɔ na wɔmfa hɔn nsa nkã Ne mfemu na Ne nsa na n’anan ho mprɛgow ananmu no (hwɛ 3 Nephi 11:14–15). Ɔsaa ayarfo, ebubuafo, efurafo no yarba—“nye hɔn a woruhu amandze wɔ kwan biara mu’’—na ohyiraa hɔ mbofraba na ɔbɔɔ mpaa maa hɔ (hwɛ 3 Nephi 17:7–9, 21). Yesũa dodow fa Agyenkwa no dɔ na ayamuhyehye ho fi asɛm krɔnkrɔn yi mu.

Mormon Nwoma no gye dase dɛ “Jesus nye Christ no.’’ Mormon Nwoma mu awerɛhyɛmu no si do ara bɔ hɛn nkaa dɛ hɛn Egya a ɔwɔ sor na hɛn Agyenkwa dɔ hɛn bor adzebiara a yebotum esusu ho.

Nsanananmu no kɔɔr do a ɔdze ɔsor asomafo binom a wopuei Joseph Smith do. “John Onumanyi no a ɔasoɛr efi owufo mu no dze tumdzi a wɔdze yɛ nsumuhyɛ enuma ma bɔnfakyɛ no saan ananmu bae. Asɔpɔkan Asomafo no hɔn mu baasa—Peter, James, na John—dze asomafo na asɔfodzi tumdzi nsaafee no saan ananmu bae. Binom so bae, a Elijah kã ho, a ɔdze tumdzi no a wɔdze kã ebusua ebusua bɔ mu afebɔɔ wɔ onnyiewiei nkitahodzi mu a ɔtra owu no, saan ananmu bae.

Ebɔbira 6, 1830, da no Jesus Christ duaa Nkɔnhyɛnyi Joseph do kyekyeer asɔr a nna ɔtse dɛ asɔr no a Ɔkyekyeer wɔ Ahyɛmu Fofor ber mu no (hwɛ Gyedzi ho Nsɛmpɔw 1:6), “asomfo nye nkɔnhyɛfo fapem do, a Jesus Christ nankasa nye kutuw-do bo tsitsir’’ emu (Ephesians 2:20). Jesus Christ N’asɔr a ɔwɔ hɔ Nda a Odzi Ekyir Ahotseweefo no ma asɔfodzi tum a wɔdze asan ananmu ho hyira no wɔ hɔ ma Nyankopɔn ne mba nyinara a woesiesie hɔnho dɛ wonya no.

Dɛ mbrɛ President Russell M. Nelson akyerɛkyerɛ hɛn no, yebotum enya dɛwdzi wɔ daa daa nnuho mu ber a yɛdan kɔ Ɔsor Egya na hɛn Agyenkwa hɔ. Ɔkɔ ma obiara a n’abaw egura anaa dɛ ɔnnsõ mu anaa ɔnnkã ho dɛ: wɔto nsa frɛ hɔn nyinara dɛ wɔmbra Christ na N’Asɔr hɔ. Asɔr no nnyɛ asɔfofi ma hɔn a wodzi mu mbom ɔyɛ asopitsi ma ayarfo. Elder Dieter F. Uchtdorf a ɔkã Asomafo Duebien no hɔn Quorum ho no bɔ hɛn nkaa dɛ “yɛmmba asɔr dɛ yɛdze hɛn nsɛnhia bosuma mbom dɛ wobenya ayarsa.

Asɔr mu no yenya dɛwdzi wɔ akwanhorow mu dɛ yɛma hɛnho do, yɛdze dɔ som binom, na yɛkyɛ hɛn ankorankor sũahu a Christ ne papayɛ mbordo kã ho. Wobotum “wɔakan hɛn afora Christ n’asɔrmba ho’’ na “wɔakaa hɛn na wɔdze Nyankopɔn n’asɛmpa no anyɛn hɛn’’ (Moroni 6:4). Ebɛn nhyira kɛsenara nye yi!

Nkɔnhyɛnyi Joseph Smith paa mu kãa no ber bi dɛ, “Seseiara, ebɛn asɛm na yɛatse efi asɛmpa a hɛn nsa akã yi mu? Enyigye ndze! Ehumbɔbɔr ndze a ofi sor; nye nokwar ndze a ofi asaase mu; enyigyesɛm dze ma ewufo; enyigye ndze dze ma atseasefo nye ewufo; enyigyesɛm a ɔyɛ dɛw kɛse ‘’(Nkyerɛkyerɛ na Ahyɛmudzi 128:19).

Enyigyesɛm yinom aba osiandɛ Ɔsor Egya na No dɔ Ba, Jesus Christ, dɔ hɛn na dza wɔpɛ—kyɛn adzebiara no—nye dɛ wɔma hɛn akɔaba dze ba Hɔn enyim, ama yeetum enya abrabɔ a wɔtse mu no bi afebɔɔ. Nsanananmu no yi kyerɛ dɛ Wɔayɛ biribiara a ohia ma iyi aba mu enyimnyam mu ara ama hɛn nyinara. Hɛn onnyiewiei akwantu mu no, yebenya nsɔhwɛ na nkõdzen horow, naaso “[yɛtse] ase, ama [yeenya] enyigye’’ (2 Nephi 2:25) wɔ abrabɔ yi mu na dza ɔtoado no mu. Nna Nkɔnhyɛnyi Joseph nyim iyi kyɛn dodowara.

Joseph hyiaa ɔkõtsia na atseetsee ntaataado, naaso ɔyɛ obi a “[n’enyigye noho] dada’’ (Joseph Smith—Abakɔsɛm 1:28). N’enyi kɔɔr do gyee, noho yɛɛ dzen, na otsimii, na owiee edwuma nwanwa a wɔdze maa no dɛ ɔnyɛ no. Miyi Ahotseweefo edzikamfo no a wɔgyee dzii, wɔboae, na wɔkãa Nkɔnhyɛnyi Joseph Smith do na wɔdze hɔnho mae dze kyeyeer Asɔr no ayɛw. Yɛdze hɔn ndaase na enyidzi a ɔtse dɛm kaw.

Nna ɔnnyɛ tɔɔtsenn wɔ Asɔr n’ahyɛase ber no, na onnkotum ayɛ tɔɔtsenn ndɛ. Mbom Nsanananmu no rokɔ do. Jesus Christ wɔ Asɔr yi ne tsir no, nkɔnhyɛfo atseasefo bɔkɔ do akyerɛ hɛn kwan. Wɔbɔkɔ do esisi Ewuradze n’efiefi, ama onnyiewie ahyɛmudzi a yɛnye Nyankopɔn edzi no ho nhyira horow no eetum akyekyer hɛn afam Ɔno na hɛn adɔfo wɔ ntwamutam n’afã ebien no ho (hwɛ Matthew 16:19). Nyankopɔn na Jesus Christ hɔn dɔ no bɛtserɛw akɔ wiadze nyinara ber a yedzi Agyenkwa no ne mbrasɛm do dɛ yɛnyɛn No nguan na yɛnkyɛ N’asɛmpa no. Yebohu Nsanananmu no nokwar no dɛ ɔrokɔ kan wɔ akwanhorow mu na wɔ mbeambea a nkyɛ yennkotum esusu ho wɔ Joseph n’aber do.

Yebotum enya ahoɔdzen na dɛwdzi kɛse—dɛ mbrɛ Nkɔnhyɛnyi Joseph nyae no—ber a yɛgye nokwar yinom a wɔsom bo na yɛdze bɔ bra no. Ɔfrɛ a Joseph dze frɛɛ Ahotseweefo no wɔ n’aber do no kɔ do wɔ hɛn aber do: “Ana onnyi dɛ yɛkɔ do wɔ edwuma kɛse yi mu? Hom nkõ nkɔ hom enyim na mma hom nnsan hom ekyir. Hom nnya akokodur, … na wɔnkɔ do, nkedzi konyim! Hom mma hom akoma ndzi dɛw, na hom enyi ngye kɛse’’ (Nkyerɛkyerɛ na Ahyɛmudzi 128:22).

Hom mma ɔdɔ na dɛwdzi enyigyesɛm a Nsanananmu dze ba no nhyira ana ɔnkyerɛ hɛn abrabɔ kwan—sesei na aber nyina.