Hwɛ Jesus Christ

Nna mfe duesuon Kailey yɛ kuw n’aboafo no kor kɛpem ber a akwanhyia bi no nsunsuando maa ɔkaa n’adwen yayaayaw. N’ayarsa no amma ɔannkɔ skuul, na ɔhyɛɛ ase dɛ ɔretse ankonamyɛ nkã. Odzii aper wɔ ne nkãtse ho na nna onnhu beebi a obenya mboa efi. Ne nyɛnko bi susuii kyerɛɛ no dɛ ontsie asɛmpasomafo no. Wɔkyerɛkyerɛɛ no Jesus Christ no Werdambɔ no ho asɛm. Orusũa Jesus Christ ho asɛm yie no maa no enyidado, na ɔtsee nkã dɛ ɔyɛ dɛ ma Nyankopɔn Nankasa roboa no.

Kailey kãe kyerɛɛ ne maame dɛ, “Menntsee nkã dɛ Nyankopɔn dɔ me da. Naaso sesei minyim dɛ Ɔdɔ me.’’

Ne maame, Michelle, noho boow no kakra. Nna ɔno na no kun, Brock, efi Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mu ber a Kailey dzii mfe duesuon osian nsɛmbisa, ekyingye, na haw asorɔtow binom ntsi. Wosuu dɛ sɛ hɔn babsiaba no enyi bɛgye yie a nhyiamu na mbrasɛm horow biara nnkã ho. Wɔanndwen dabiarada dɛ hɔn nsanmuyi no besiw Kailey kwan ma ɔnye Nyankopɔn nnkenya nkitahodzi pa. Ber a Michelle na Brock hun mbrɛ Kailey sii sesae no, wohun dɛ wɔtsee nkã dɛ wɔbɛn Nyankopɔn no akyɛr, na wɔpɛɛ dɛ wɔtse nkã dɛ wɔbɛn no bio.

Wɔnye hɔn Bishop hyiae, na annkyɛr na ebusua no, a Kailey no nuabanyin Braeden kã ho no, sanee baa asɔr. Wɔtsee nkã dɛ wɔabɛn Nyankopɔn na wɔnye No resan enya nkitahodzi no—nkanka ɔnam mpaabɔ do no—ɔdze hɔn gyedzi saan ananmu bae. Wɔresan akɔ asɔr ennyiyi hɔn nsɛmbisa na haw nyinara ano, naaso wohun dɛ wɔnye Nyankopɔn renya ankorankor nkitahodzi dzendzen no hia kyɛn ekyingye.

Iyi nyinara hyɛɛ ase ber a nyɛnko bi—abasirba tse dɛ ɔwo—too nsa frɛɛ Kailey dɛ ɔnhwɛ Christ. Na ɔyɛe!

Jesus Christ akã dɛ, “Hom nhwɛ me wɔ hom adwendwen biribiara mu; mma hom nngye kyim, mma hom nnsuro’’ (Nkyerɛkyerɛ na Ahyɛmudzi 6:36 Iyi nye nkenyan wɔ 2025 Mbabun Asɛngyinado no do. Hom mma hɛn kwan ma yɛnkyɛ mbrɛ wobesi botum ayɛ awerɛhyɛmu nsanmuyi akyɛn ekyingye na gyedzi akyɛn suro ber a hom hwɛ Christ.

Tamara W. Runia

Ber a miridzi aper no, aber nyina ɔboa me ma mususu Jesus Christ a Ɔatserɛw n’abasa mu ho. Ber a morohwɛ No no, mekaa ndwom, “Menye Jesus Bɛnantsew’’” “Orinngya me dabiarada, mpo sɛ mohwe ase,’’ ne nsɛmfua no.

Emily Belle Freeman

Sɛ mekenkan kyerɛsɛm asɛngyinado yi a, ɔkaa me Peter a ɔwɔ Galilee Po do ho asɛm. Otsimii wɔ ehum no do no maa no suro na ekyingye kɔɔr sor, a ɔmaa ɔdɔree kɛhyɛɛ ehum asorɛkye no mu. Mbom otsimii wɔ Agyenkwa no do no maa No tum ma ɔyɛɛ biribi a nna ɔnnyɛɛ bi da: ɔnantsewee wɔ nsu do! Ɔyɛ anwanwadze, ankasa. Ebɛnadze na ibotum ayɛ ber a ihwɛ No?

Andrea Muñoz Spannaus

Sɛ suro hyɛ ase kã me a, beebi a mowɔ anaa gyinabew biara a mowɔ mu no, megye enyim ara dwen nkitahodzi a menye Ɔsor Egya na Jesus Christ wɔ ho. Misi do mpɛn pii wɔ m’adwen mu: MEYƐ NYANKOPƆN BABAA Mokɔ do yɛ dɛm kɛpem ber a mohotɔ me. Ɔyɛ edwuma aber nyina!

Bradley R. Wilcox

Bisa woho dɛ woana na ɔdwen wo ho na ɔdɔ wo dodow. Ana ɔyɛ w’awofo na Asɔr baanodzifo? Ana ɔyɛ nkorɔfo a wɔwɔ social media do a ebia hɔndze eka dodow ho a? Hwɛ Ɔsor Egya na Christ. Woho hia hɔn ankasa!

Steven J. Lund

Kaa dza wɔbɔ ho nkaa ber a ese Aaron Asɔfodzi Quorum na Young Women nsɛngyinado no: Eyɛ Nyankopɔn ne babanyin anaa babaa. Nya gyedzi dɛ hɛn Egya wɔ nhyehyɛɛ bi ma wo. Erohwɛ Christ n’asekyerɛ nye dɛ No Werdambɔ no hyɛ dɛm nhyehyɛɛ ne finimfin pɛɛ.

Michael T. Nelson

Erekenkan kyerɛwsɛm no nye erohwɛ Christ. Ekyingye na suro taa yew kɔ ber a wɔkaa hɛn Jesus n’awanwadze na nkyerɛkyerɛ ho asɛm. Hɛn tsir ayɛ yie dɛ yɛwɔ Ne nsɛm no ho kwan. Wɔfa gyinabew biara a yenya wɔ hɛn abrabɔ mu ho.