”UYesu Krestu Ngumthobo ‘Ophilileyo,’ ‘Olungileyo,’ ‘Nethemba Eligqwese Ngakumbi’” Liyahona, EyoMnga. 2024.

Umyalezo weNyanga Liyahona,EyoMnga 2024

UYesu Krestu Ngumthobo “Ophilileyo,” “Olungileyo, ” “Nethemba Eligqwese Ngakumbi”

NguMdala David A. Bednar

WeQumrhu labaPostile Abalishumi Elinambini

Kwelixesha likhethekileyo lokubhiyizela ukuzalwa kosana eBhetelehem, yanga singahlala sikhumbula ukuba uYesu Krestu weza ehlabathini ukuba abe nguMsindisi noMkhululi wethu.

UMpostile uPetros kunye nabaprofeti beNcwadi kaMormoni uYakobi noMoronayi bagxininisa isipho somoya wethemba kuKrestu ngeendlela ezifanayo ezifundisayo.

Ngokomzekelo uPetros wavakalisa oku: “Makabongwe uThixo, uYise weNkosi yethu uYesu Krestu, othe ngokwenceba yakhe enkulu wasizala ngokutsha ukuba sibe nethemba eliphilayo ngokuvuka kukaYesu Krestu kwabafileyo” (1 UPetros 1:3; ugxininiso longeziwe). Nceda uqaphele ukusetyenziswa kwegama elithi “okuphilayo” kuchaza “ithemba.”

UYakobi wavakalisa,“Ngako oko, bazalwana abathandekayo, zixolelaniseni kunye naye ngendlela yentlawulelo kaKrestu, oKuphela koZelweyo uNyana, kwaye ningazuza uvuko, ngokwamandla ovuko olukuye uKrestu, nize ninikezelwe nje ngeziqhamo zokuqala zikaKrestu kuye uThixo, ninokholo, kwaye nizuze ithemba elilungileyo lozuko kuye phambi kokuba azibonakalise esenyameni.” (UYakobi 4:11; ugxininiso longeziwe). Nceda uqaphele ukusetyenziswa kwegama elithi “ulungile” ukuchaza ”ithemba.“

Kwaye uMoronayi wathi,“Kananjalo ndiyakhumbula okokuba umlungiselele indlu umntu, ewe, kwanaphakathi kwezindlu ezinkulu zikaYihlo, aya kuthi kuyo umntu abe nokuba nethemba elilunge kakhulu ngakumbi;ngako oko umntu kufuneka athembe, okanye akanako ukwamkela ilifa endaweni leyo uyilungisileyo“ (Etere 12:32; ugxininiso longeziwe). Nceda uqaphele ukusetyenziswa kwegama elithi “okugqwesileyo” ukuchaza “ithemba”

Yintoni Ithemba kuKrestu?

Isipho somoya wethemba kuKrestu lulindelo oluvuyisayo lobomi obungunaphakade “ngeemfanelo, nenceba, nobabalo lukaMesiya oNgcwele“ (2 Nifayi 2:8) kwaye nomnqweno onamandla weentsikelelo ezithenjisiweyo zobulungisa. Izichazi ”ophilayo,” “olungileyo,” kwaye “ogqwese ngakumbi” kwezi ndinyana zibonakalisa isiqinisekiso esihlala sikhula kwaye esinamandla soVuko kunye nobomi obungunaphakade ngokukholwa kuYesu Krestu.

Umprofeti uMormoni wacacisa:

”Kwaye kwakhona, bazalwana bam abathandekayo, ndinga ndingathetha nani malunga nethemba. Kukanjani ukuba ningafikelela kulo ukholo, ngaphandle kokuba niya kuba nethemba?

”Kwaye ingaba yintoni eniya kuba nethemba layo? Qaphelani nditsho kuni ukuthi niya kuba nethemba ngentlawulelo kaKrestu namandla ovuko lwakhe, lokuvukela kubomi obungunaphakade, kwaye oku kungenxa yokholo lwenu kuye ngokwesithembiso.

“Ngako oko, ukuba umntu unokholo kufuneka abe nethemba; kuba ngaphandle kokholo akunakubakho naliphina ithemba.” (Moronayi 7:40–42).

Icebo likaBawo loLonwabo

Ithemba kuKrestu eliphilileyo, elilungileyo, nelibalaseleyo liqala ngolwazi lokuba uThixo uBawo ongunaPhakade uyaphila. Yena unguBawo wethu, kwaye singabantwana baKhe bomoya. Ngokoqobo singoonyana neentombi zomoya zikaThixo yaye sizuze ilifa kuYe leempawu zobuthixo.

UBawo ngumbhali wecebo lolonwabo (bona UAbraham 3:22-28). Njengoonyana neentombi zomoya zikaThixo, “salamkela icebo laKhe apho abantwana baKhe babenokufumana umzimba wenyama kwaye bafumane amava asemhlabeni okuqhubela phambili kwimfezeko kwaye ekugqibeleni baqonde isiphelo sabo esingcwele njengeendlalifa zobomi banaphakade.” Kwizibhalo sifunda ukuba ”uBawo unomzimba wenyama namathambo abambekayo ngokomntu; naye uNyana” (IMfundiso neMinqophiso 130:22). Ngoko, ukufumama imizimba yenyama kubalulekile kwinkqubo yokuqhubela phambili ukuya kwisiphelo esingokobuthixo bethu.

Singabantu ababini Imimoya yethu, icala lethu elingunaphakade, yambethe imizimba yenyama ephantsi kweminqweno kunye neenkanuko zenyama. Icebo likaBawo lolonwabo lwenzelwe ukunika ulwalathiso lwabantwana baKhe, ukubanceda babuyele ngokhuselekileyo ekhaya kuYe nemizimba evuswe ekufeni, ephakanyisiweyo babenokwamkela uvuyo nolonwabo lwanaphakade.

UMntwana uKrestu, nguSharlotte Andrus

INdima yeNtlawulelo kaYesu Krestu kwiCeBo likaBawo

UYesu Krestu nguNyana oKuphela koZweleyo kaBawo oNgunaphakade. Yena weza emhlabeni ezokwenza intando kaYise waKhe 3 Nifayi 27:13). UYesu Krestu nguye othanjiswe nguBawo ukuba abengummeli waKhe kuzo zonke izinto eziphathelele kusindiso loluntu. Yena unguMsindisi noMhlawuleli wethu ngenxa yokuba Yena woyisa ukufa nesono.

UAlma waprofeta kubantu bakaGideon malunga nomsebenzi osindisayo kaMesaya:

“Kwaye uya kubheka phambili, esiva iintlungu neembandezelo nezihendo zazo zonke iindidi; kwaye oku kuya kwenzeka ukuze ilizwi libe nokuzaliseka elithi uya kuthabathela kuye iintlungu nezifo zabantu bakhe.

“Kwaye uya kuthabathela phezu kwakhe ukufa, ukuze abe nokuwakhulula amakhamandela okufa okuqamangela abantu bakhe; kwaye uya kuthabathela phezu kwakhe ubuthathaka babo, ukuze izibilini zakhe zibe nokuzaliswa yimfesane, ngokwasenyameni, ukuze abe nokuyazi ngokwasenyameni indlela yokunceda abantu bakhe ngokobuthathaka babo.

“Ngoku uMoya uyazazi zonke izinto; nangona kunjalo uNyana kaThixo uyabandezeleka ngokwasenyameni ukuze abe nokuthabathela phezu kwakhe izono zabantu bakhe, ukuze abe nokuzosula iziphoso zabo ngokwamandla akhe okuhlangula; kwaye ngoku qaphelani, obu bubungqina obukum.” (Alma 7:11–13).

Umgaqo wokuqala wevangeli lukholo kwiNkosi uYesu Krestu. Ukholo lokwenene lujolise kuMsindisi kwaye lusenza ukuba sithembele kuYe kwaye sibenentembelo epheleleyo kumandla aKhe okusihlangula ekufeni, asihlambulule esonweni, kwaye asisikelele ngamandla angaphezu kwawethu.

UMoronayi wangqina,“Kwaye ngenxa yenkululeko yomntu, eyeza ngoYesu Krestu, babuyiselwa ebusweni beNkosi; ewe, le yindlela abathi bonke abantu bakhululwa ngayo, ngenxa yokuba ukufa kukaKrestu kwenza kwabakho uvuko, olwenza kwabakho inkululeko kuko ukulala okungenasiphelo, ukulala oko bonke abantu baya kuthi bavuke kuko ngamandla kaThixo xa sukuba ixilongo liya kukhala; kwaye baya kuphuma kunye abancinane nabakhulu, kwaye bonke baya kuma phambi kwenkundla yakhe, bekhululwe kwaye bakhutshiwe kweli khamandela lanaphakade lokufa, ukufa oko kukukufa kwenyama” (Mormoni 9:13).

Ndiyangqina ukuba uMsindisi wawaqhawula amakhamandela okufa. Yena wavuswa kwelabafileyo, Yena uyaphila, kwaye Yena ukuphela komthombo wethemba eliphilileyo, elilungileyo, eligqwesileyo ngakumbi.

I-Ankile kuMphefulo

Umprofetii eEtere wangqina,“Ngako oko, nabani na okholelwayo kuThixo unako ngokuqinisekileyo ukuba nethemba lehlabathi elilunge kunene, ewe, kwanayo indawo ngakuso esokunene isandla sikaThixo, ithemba elo eliza ngokholo, lenza iankile emiphefumlweni yabantu, eya kuthi ibenze babenako ukuqiniseka nokuzinza, besoloko bephuphuma yimisebenzi emihle, bekhokelelwa ekubeni bamzukise uThixo.” (Etere 12:4; ugxininiso olongeziweyo).

Kwelixesha likhethekileyo lokubhiyizela ukuzalwa kosana eBhetelehem, yanga singahlala sikhumbula ukuba uYesu Krestu weza ehlabathini ukuba abe nguMsindisi noMkhululi wethu. Yena usinika isipho somoya esixabisekileyo sobomi, ukukhanya, uhlaziyo, uthando, uxolo, imbono, uvuyo, kunye nethemba.

Ndiyakumema ukuba ufune ngokufanelekileyo isipho somoya wethemba kuMsindisi ngokufunda imfundiso kunye nobungqina babaprofeti bakudala nabangoku malunga nedini lakhe lentlawulelo kunye noVuko lokwenene. Njengoko usenza njalo, ndiyakuthembisa ukuba ubungqina bobuthixo boMhlawuleli buya komelezwa, inguqukoyakho kuYe iyakwenzwa nzulu, umnqweno wakho nokuzimisela kwakho ukuma njengengqina elikhaliphileyo laKhe kuya kwandiswa, kwaye uyakusikelelwa nge-ankile emphefumlweni wakho—elona themba lidlamkileyo, lilungileyo, kwaye ligqwese ngakumbi.

Kunye nabaPostile abathe banika ubungqina ngaYe kuzo zonke izizukulwana, ndivakalisa ngovuyo ubungqina bam bokuba uYesu Krestu unguNyana ophilayo kaThixo ophilayo. Yena unguMhlawuleli wethu ovusiweyo onomzimba ozukileyo, obambekayo wenyama namathambo. Kwaye ngenxa yentlawulelo nokuxolelaniswa noThixo iNkosi eyenza ukuba kwenzeke kulo lonke uluntu, sinokufumana isiqinisekiso sokomoya nethemba eliphilileyo, elilungileyo, neligqwesileyo ngakumbi lokuba “kuKrestu bayakudliswa ubomi bonke” (1 abaseKorinte 15:22).