Iesu Kristo Bon Boton te “Kantanigna ae Kamaiu,” “Raoiroi,” ao te “Kantaninga ae Kororaoi”

Te bwaintangira n tamnei n onimaki inanon Kristo bon karekean te kimwareirei n te maiu ae akea tokina rinanon “mwakuri aika raoiroi, ma ana nanoanga, ao ana akoi te Mesia ae Tabu” (2 Nibwaai 2:8) ao te nano ae korakora ni kakabwaiakiia aika a raoiroi ake a taekinaki n te berita. Raonnauna “kamaiu,” “tamaroa,” ao “kororaoi” inanon kiibu aikai a karaka riki ao a kakorakora kamatoan te Mangauti ao te maiu ae akea tokina rinanon onimakinan Iesu Kristo.

E kabwarabwara te burabeti Moomon:

“Ma ngaia are, tariu aika kam tangiraki, N na taetae nakoimi ni kaineti ma te kaantaninga. Kam na kangaa ni kona ni karekea te onimaki, ma ti ngkana iai te kantaninga iroumi?

“Ao teraa are kam na kantaningaia? Nooria, I taku nakoimi bwa kam na karekea te kantaninga rinanon ana mwakuri ni kamaiu Kristo ao mwaakan mangautina, bwa kam na kateirakeaki nakon te maiu are akea tokina, ao aio ibukin ami onimaki irouna n aron te berita.

“Ngaia are, ngkana iai ana onimaki te aomata e na riai n iai te kantaninga irouna; bwa ngkana akea te onimaki ao bon akea te kantaninga irouna” (Moronaai 7:40–42).

Te kantaninga inanon Kristo e kamaiu, tamaroa, ao e kororaoi e waaki man ataakin te Atua bwa te Tama ae Akea Tokina ae maiu. Ngaia Tamara, ao ngaira bon Natina n tamnei. Ngaira bon nati mwaane ao aine iroun te Atua ao ti karekea rikira mai karawa mai Irouna.

Te Tama ngaia te tia korea te babaire ni kakukurei (taraa Aberaam 3:22–28). Ngkai natin te Atua mwaane ao aine, ti “butimwaai Ana babaire n te aro are ti kona ni karekei atatai n aonaaba n rikirake nakon te kororaoi ao n tokina a ataa tokin kawaira mairoun te Atua bwa taan bwaibwai n te maiu ae akea tokina.” Ni koroboki aika a tabu, ti reiakinna bwa: “ Te Tama iai rabwatana ae te iriko ao te rii ae kona n riingaki n aekan te aomata; te Nati naba” (Reirei ao Berita aika Tabu 130:22). Ngaia are, karekean te rabwata e kakakawaki ni waakinako ni kaineti nakon tokin kawaira ae akea tokina.

Ngaira iai rabwatara n tamnei ao n rabwata. Tamneira, mwakoron rabwatara ae akea tokina, a kunnikaiaki n rabwatara are e tangira te kamwarakeaki ao te mamate. Ana babaire te Tama ni kakukurei e karaoaki bwa e na karekea te kairi nakoia Natina, ni buokiia n oki ma te kamanoaki nakon mweengana ma Ngaia n te mangauti, rabwata aika mangauti, ao ni karekei kakabwaia n te kimwareirei ae akea tokina ao te kukurei.

Kristo te Teei, iroun Sharlotte Andrus

Tibwangan Iesu Kristo bwa te Tia Kabooi Maiura n ana Baire Tamana

Iesu Kristo bon ana Riki Temanna te Tama ae akea Tokina. E roko nakon te aonaaba bwa e na karaoa nanon ana kantaninga Tamana (taraa 3 Nibwaai 27:13). Iesu Kristo bon ngaia are e kabiraki iroun te Tama bwa te tia tei Ibukina ni bwaai ni kabane ni karekean te kamaiuaki nakoia aomata. Ngaia ara Tia Kamaiu ao te Tia Kabooi Maiura ibukina bwa E tokanikai iaon te mate ao te bure.

Aramwa e taetae ni burabeti nakoia ana aomata Kiteon ni kaineti ma ana mwakuri ni kamaiu te Mesia:

“Ao e na waaki, n rinanon te kainnano ni maraki ma te karawawataki ao te kaririaki n aekaia nako; ao aio bwa e na kakoroaki te taeka are e taku bwa e na uota iaona marakiia ao aorakiia ana aomata.

“Ao e na uota iaona te mate, bwa e aonga ni kabwara ana kabaebae te mate are kabaeiia ana aomata; bwa e na on nanoia n te nanoanga ni kaineti ma te maiu ni iriko, bwa e na ataia ni kaineti ma te maiu ni iriko bwa e na kanga ni buokiia ana aomata ni kaineti ma mamaaraia.

“ Ngkai te Tamnei e atai bwaai ni kabane; ma e ngae n anne natin te Atua e rinanon te maraki n aron te maiu n rabwata bwa e na katokaa i aona aia bure ana aomata, bwa e aonga ni kamaunai riaoan tua irouia n aron mwaakan ana kamaiu” (Aramwa 7:11–13).

Te moan tua n te euangkerio bon te onimaki iroun te Uea Iesu Kristo. Te onimaki ni koaua e boboto inanon ao iaon te Tia Kamaiu are anganiira onimakinana ao e karekea te mweengaraoi ni Mwaakana ni kamaiuira man te mate, kaitiakiira man te bure, ao ni kakabwaiara ma te korakora iaon ara kona.

E kakoaua Moronaai, “Ao ibukin kaboan te aomata are e reke mai iroun Iesu Kristo, ao a kaokaki nako matan te Uea; eng, aio are a kaboaki iai aomata ni kabane, ibukin maten Kristo are e kakoroa bukin te mangauti, are e kakoroa bukin te kaboaki man te matu ae aki totoki, are te matu are a na kautaki mai iai aomata ni mwaakan te Atua ngkana e tang te bu; ao a na bane n roko aika a uarereke ao aika a korakora, ao a na bane n tei imatan ana kai ni motikitaeka, n tia ni kabooaki ma ni kabwaraki man a na kabaebae te mate ae akea tokina, are bon te mate n rabwata” (Moomon 9:13).

I kakoaua bwa te Tia Kamaiu e urua ana kabaebae te mate. E a tia ni mangauti, E maiu, ao Bon ti ngaia bwain te kantaninga ae kamaiu, tamaroa, ao te kantaninga ae kororaoi.

E kakoaua te burabeti Ita, “Mangaia ae, ane e kakoaua te Atua e kona kantaninga te aonaba ae raoiroi riki ma te kantaninga ae koaua, eng, ao te mena n angatain te Atua, are e roko man te onimaki, are e karekea te ati n roo nakon tamneia aomata, are e na karikiia bwa a na koaua ma n nnene, ma n aki toki ni karaoi mwakuri aika a raraoi, bwa a kairaki bwa a na kamimitonga te Atua” (Ita 12:4; kairaki katuruturuana).

Inanon bukamaruan te tai ae onoti ni bungiakin te merimeri i Betereem, ti na ururingnga n tainako bwa Iesu Kristo e ruo nakon te aonaaba bwa e na riki bwa ara Tia Kamaiu ao te Tia Kabooi Maiura. E anganiira te bwaintangira n tamnei ae akea boona, ota, kaboouaki, tangira, rau, kantaninga, kimwareirei, ao te onimaki.

I kaoi ngkami bwa kam na ukoukora raoi te bwaintangira n tamnei n te kantaninga iroun te Tia Kamaiu man kamatebwaian reirei ao aia koaua burabeti aika ngkai ni kaineti ma Ana angakarea ni kamaiu ao riki te Mangauti. Ngkai kam karaoi, I berita bwa ami koaua ni mimitongin te Tia Kabooi Maiura e na kakorakoraaki, rairakimi nakoina e na rang n nano, ao nanomi ao ami nanomatoa n tei bwa taan kakoaua aika ninikoria irouna e na rikirake, ao kam na kakabwaiaki ma te e ati n roo nakon tamneimi —riki ae kamaiu, tamaroa, ao bon te kantaninga ae kororaoi.

N raonaki ma Abotoro ake a kakoaua rinanon roro ma rooro, I kaota au koaua ma te kimwareirei bwa Iesu Kristo bon Natin te Atua ae maiu. Ngaia te tia Kabooi maiura ae mangauti ma te mimitong, n rabwatana n iriko ma te rii. Ao ibukin te kabooaki ao te reitaki ma te Atua bwa te Uea e na kona ni karekea nakoia aomata ni kabane, te kona ni karekea te kakoaua n tamnei ao te kantanigna ae kamaiu, tamaroa, ao te kantaninga ae Kororaoi” bwa “a na bane ni kamaiuaki irouni Kristo” (1 I-Korinto 15:22).