UThixo Uya Kusixhasa Aze Asilondoloze

NguMdala uDale G. Renlund

WeQumrhu labaPostile Abalishumi Elinambini

NjengoMphathi uMoronayi, singafumana uncedo lobuthixo namandla kumadabi esijongene nawo ebomini.

Umphathi uMoronayi ephethe ibhanile yenkululeko

Xa ndandiqala ukufunda iNcwadi kaMormoni, ndonwabela imbali yeemfazwe phakathi kwamaNifayithi namaLeymenayithi. Ndathabatheka lukholo, ubukrelekrele, namaqhinga asetyenziswa nguMphathi uMoronayi, umphathi-mkhosi owamiselwa njengenkokeli yayo yonke imikhosi yamaNifayithi xa wayeneminyaka engama-25 kuphela ubudala. Wayenobulumko, womelele, yaye enobuqili. Wayezinikele ngokupheleleyo kwinkululeko nakwintlalo-ntle yabantu bakhe. (Bona Alma 48:11–12.)

Endaweni yokuba ayibeke kuye impumelelo yasemkhosini, uMoronayi wathi impumelelo yayivela kuThixo nakwinkxaso engcwele imikhosi yakhe eyayifumana kubafazi nabantwana abangalwiyo. Waxelela inkokeli yotshaba eyoyisiweyo: “INkosi … ininikezele ezandleni zethu. Kwaye ngoku ndinga ningaqonda okokuba sikwenzelwa oku ngenxa yonqulo lwethu nokholo lwethu kuKrestu.” UMoronayi ke wabelana ngalo mbono wesiprofeto: “UThixo uya kusixhasa, aze asigcine, aze asilondoloze, kangangokuba sinyanisekile kuye, kwaye nakuyo inkolo yethu, nonqulo lwethu” (Alma 44:3, 4).

Ekuhambeni kwexesha, ndiye ndaqonda ukuba uMoronayi wayengumzekelo wemigaqo esinokuyisebenzisa ukusinceda ukuba simelane nemingeni yobomi bethu bale mihla. Njengoko sibonakalisa ukholo kuYesu Krestu, uMsindisi wehlabathi, Yena uya kusisikelela ngamandla aKhe. Kodwa Yena ukuze enze njalo kwaye nathi siqaphele iintsikelelo zaKhe, kufuneka siqonde injongo yethu, sibanobuchule bempumelelo, kwaye silungiselele amadabi omfuziselo esijongene nawo, kanye njengokuba uMoronayi wazilungiselela kwaye wajongana namadabi okwenene ebomini bakhe. Xa sisenza njalo, uBawo waseZulwini noYesu Krestu bayakusixhasa kwaye basilondoloze.

Ukuqonda Injongo Yethu

UMoronayi wakhumbuza ngokuphindaphindiweyo abantu ukuba babengoobani (iindlalifa zomnqophiso ka-Abraham), ababengababo (abantwana abathandekayo bakaThixo), nonobangela wokulwela kwabo (usapho, ukholo,nenkululeko). UMoronayi wafundisa abantu bakhe ukuba babelwela ukuphila kwabo nenkululeko kwingcinezelo nasebukhobokeni. Ngokwahlukileyo koko, iintshaba zabo zazilwela ukuziphakamisa namandla ngokoyisa abanye.

Xa amanye amaNifayithi ayefuna ukuphanga igunya ukwenzela inzuzo yobuqu, uMoronayi wakrazula idyasi yakhe kwaye wabhala kwisiqwenga sayo imiba engundoqo yomyalezo wakhe: “Ngenkumbulo yoThixo wethu, inkolo yethu, nenkululeko, noxolo lwethu, abafazi bethu, nabantwana bethu.” Wayiphakamisa le flegi, awayibiza ngokuba “ibhanile yenkululeko,” ekupheleni kwepali waza wayisebenzisa ukuze akhumbuze abantu ukuba wawungantoni na lo mlo nokuze abahlanganisele bona kwinjongo. (Bona Alma 42:12–13, 19–20.)

Kumadabi omoya obomi, “asilwi nenyama negazi, kodwa ngokuchasene… nabalawuli bobumnyama … [kunye] nobungendawo bokomoya” (Kwabase-Efese 6:12). Nathi, kufuneka sikhunjuzwe ukuba umlo ungantoni. UMdala uNeal A. Maxwell (1926–2004), owayesakuba lilungu leQumrhu labaPostile Abalishumi Elinambini, wavakalisa le ngcinga ngencoko ecikizekileyo, nangona imfutshane.

Ngo-2004, ndandwendwela uMdala uMaxwell kwigumbi lakhe lasesibhedlele kungekudala ngaphambi kokuba asweleke. Wayenobubele kuye wonke umntu owayemtyelela okanye owayemnceda. Abasebenzi bezempilo bangena egumbini lakhe baphuma belila. Ndathi kuye, “Mdala Maxwell, inzima ngokwenene le nto.” Wahleka waza wathi, “Owu, Dale, singabantu banaphakade abaphila kwihlabathi lasemhlabeni. Siphumile kwisiqalelo sethu, njengentlanzi ephuma emanzini. Kuphela kuxa sinombono ongunaphakade apho nayiphi na le nto iya kuba nentsingiselo.”

Akufunekanga siphulukane nombono wentlanganisela enkulu yendalo yethu yobuthixo nesiphelo sanaphakade namandla kamtyholi asichasayo. Ukuqonda ngokuchanekileyo icebo likaBawo waseZulwini kuyakusikhuthaza ukuba sihlale sisilwela usindiso lwethu lwanaphakade nenkululeko yethu kubukhoboka bomoya.

Ukubanobuchule beMpumelelo

Kuwo onke amadabi alwayo yimikhosi yakhe, uMoronayi wenza iqhinga lokuqinisekisa impumelelo. Wasebenzisa iintlola ukuze afumanise izenzo neenjongo zeentshaba zakhe. Wafuna inkokhelo kumprofeti, uAlma. UMoronayi ke wasebenzisa elo galelo liphembelelweyo kwindlela yakhe yokuya edabini. Wasebenzisa amacebo ngokwemfuneko, ebeka amajoni amaninzi kwizixeko ezazingaqiniswanga. Wamisela ngobuchule izicwangciso zokusebenza ezisekelwe kulwazi lwangoku.

Ngaloo ndlela wazuza iinzuzo ngaphezu kwemikhosi yotshaba. Akazange aneliseke luloyiso lwangaphambili; kunoko, waqhubeka ephucula amandla wakhe nawemikhosi yakhe ukuze ahlangabezane nemingeni yexesha elizayo.

Sinokusebenzisa iindlela ezifanayo ukuze sihlangabezane nabachasi bokomoya. Sinokuqala ngokuqonda oko uSathana azama ukukwenza ebomini bethu. Uzama ukusiphazamisa kwinjongo yethu. Xa sijamelene nesilingo, sifanele sizibuze:

Ingaba esi senzo sam sidibana njani ngokuchasene nelizwi likaThixo elityhiliweyo?
Zithini iziphumo zokuthatha eli nyathelo?
Ngaba esi senzo siya kundinceda ndifezekise injongo yam emhlabeni?

Kananjalo thina sifanele siwuqonde umphumo wokugqibela wokunikezela nakwizilingo ezincinane. Njengoko sinikezela kwisihendo, sitya “ityhefu ngamaqondo” (Alma 47:18), obona buchule busebenzayo busetyenziswa ngamandla obungendawo obunokukhokelela kwimiphumo eyingozi yokomoya.

Singaziqinisa ngokuchasene nezilingo zikaSathana ngokulandela ulwalathiso esilufumana kumprofeti wethu wemihla yokugqibela. Ukwenjenjalo kuyasinceda ukuba sigcine imbono yanaphakade esinokuthi ngayo sizihlole izenzo zethu. Ukubanobuchule ngendlela esiya kujongana ngayo nezilingo ezivela kwiindawo ezahlukeneyo zobomi bethu kuya kusinceda senze ukhetho oluchanekileyo ngakumbi kuwo mzuzu. Ubuchule obucetywe kwangaphambili neendlela zokujongana ziyakusinceda ukuba sikhuseleke ngokuchasene neziphazamiso kwinjongo yethu yanaphakade.

Umzekelo ngulowo weteknoloji. Itekhnoloji inokuba likrele elintlangothi-mbini, iluncedo kwaye iyingozi, kuxhomekeke kwindlela esiyisebenzisa ngayo. Ukusinceda senze ukhetho lobulumko ngezixhobo zethu, abancinci nabadala banokubhekisela kumxholo othi “Taking Charge of Technology” and For the Strength of Youth: A Guide for Making Choices. Ezi zisikhumbuza ngenjongo yethu, zisikhombe kuYesu Krestu, kwaye zisincede simeme uMoya oyiNgcwele ebomini bethu. Ukucwangcisa njani, nini,kwaye kuphi apho siyakusebenzisa itekhnoloji kuya kusomeleza ngokuchasene nawasiseko, amaqhinga ehlabathi.

Ukulungiselela amaDabi Eezikweko

Elindele amadabi azayo, uMoronayi walungiselela abantu bakhe ngabanye ngezigcina-sifuba, amakhaka, izigcina-ntloko, neempahla ezishinyeneyo. Wabaxhobisa abantu bakhe bebonke ngokungqonga imizi ngeenqaba, bevumbulula iindonga zomhlaba ngokubajikelezileyo.

Ngokomoya, silungiselela umntu ngamnye ngokugcina imiyalelo kaThixo. Senza kwaye sigcine iminqophiso noThixo etsala amandla kaYesu Krestu ebomini bethu. Sizibandakanya kwizenzo zobuqu, zangasese zokuzinikela, ezinje ngokuthandaza, ukuzila ukutya, nokuphengulula izibhalo. Thina kananjalo senza ngokholo, sisabela kulwalathiso lokomoya esilufumanayo. Thina ngenkathalo silungiselela kwaye ngokufanelekileyo sithatha inxhaxheba kumthendeleko. Xa sisenza njalo, uMsindisi uba yinyani ngakumbi ebomini bethu, kanye njengokuba Yena wayeyinyani kuMoronayi, owayeqinile elukholweni lwakhe kuYesu Krestu. UMoronayi wayesazi ukuba angathembela kuMsindisi ngenkokhelo nenkululeko (bona Alma 48:16). Nathi, sinokuthembela kuYesu Krestu ukuze sifumane ulwalathiso nokukhululwa.

Sinokulungiselela ngakumbi ngokomeleza iintsapho zethu. UBawo wethu waseZulwini wasiququzelela saba ziintsapho ukusinceda ukuba sonwabe kwaye sifunde indlela yokubuyela kuYe. Iintsapho zethu zinokuba ngumthombo woncedo kuthi. Thina sonke sinokuva uvuyo nothando ngokukhumbula ukuba siyinxalenye yosapho olukhulu lukaThixo, nokuba zithini na iimeko zomntu ngamnye kwiintsapho zethu.

Singakwazi ngokudibeneyo ukufumana amandla kwaye silungiselele amadabi ethu omoya njengoko sizibandakanya kuluntu lwabaNgcwele. Iziteyki zethu nezithili zinika indawo enjalo yokuzimela nokukhusela. Sinokondlana ngokwasemoyeni, sincedane ukuba sigcine imithetho kaThixo, kwaye sikhuthazane ukuba sithembele kuKrestu, ngamaxesha onke ingakumbi ngamaxesha omngeni. Xa sihlanganisana, siyaqonda ukuba asilwi amadabi wethu sisodwa. Sinabahlobo, abafundisi, neenkokeli ezinokusinceda kwaye zisikhusele. Sonke siyomelela xa silungiselela kunye.

Okumangalisayo, uMoronayi wabalela lonke ulonwabo lwabantu bakhe ekunyanisekeni kukholo lwabo kuThixo nakwinkolo yabo. NjengoMoronayi, kufuneka siqonde ukuba uvuyo luza ngenxa kaBawo waseZulwini necebo laKhe kwaye nangenxa kaYesu Krestu neNtlawulelo yaKhe. Njengokuba sisiya siqonda injongo yethu, sibanobuchule bempumelelo, kwaye silungiselela amadabi esikweko, sifumana uncedo lobuthixo namandla.

NjengoMoronayi, ndiyazi ukuba uBawo waseZulwini noYesu Krestu bazisa eyona nkululeko yokugqibela ebukhobokeni—inkululeko ekufeni nasesonweni. Bayasisikelela ngamandla Abo xa sijonga kubo kwizinto zonke.