දෙවියන්වහන්සේ අපට උපකාර කර ආරක්ෂා කරනු ඇත

ඔවුන් කවුරුද (ආබ්‍රහමික ගිවිසුමේ උරුමක්කාරයන්), ඔවුන් කාගේද (දෙවියන්වහන්සේගේ ආදරණීය දරුවන්), සහ ඔවුන් සටන් කළ හේතුව (පවුල, ඇදහිල්ල සහ නිදහස) මොරෝනි මිනිසුන්ට නැවත නැවතත් මතක් කළා. ඔවුන් සටන් කරන්නේ ඔවුන්ගේ පැවැත්ම සඳහා සහ පීඩනයෙන් හා වහල්භාවයෙන් නිදහස් වීම සඳහා බව මොරෝනි තම ජනතාවට ඉගැන්වූවා. ඊට පටහැනිව, ඔවුන්ගේ සතුරන් සටන් කළේ අන් අයව යටත් කර ගනිමින් පුද්ගලික උසස් වීමට සහ බලය සඳහායි.

සමහර නෙපීවරුන් පුද්ගලික වාසි තකා බලය පැහැර ගැනීමට උත්සාහ කළ විට, මොරෝනි ඔහුගේ කබාය ඉරා දමා එහි කොටසක ඔහුගේ පණිවිඩයේ මූලික අංග ලිව්වා: “අපගේ දෙවියන්වහන්සේ, අපගේ ආගම සහ නිදහස, සහ අපගේ සාමය, අපගේ භාර්යාවන් සහ අපගේ දරුවන් සිහිපත් කිරීම සඳහා.” ඔහු “නිදහසේ කොඩිය” ලෙස හැඳින්වූ මෙම ධජය කණුවක කෙළවරේ ඔසවා, සටන කුමක් දැයි ජනතාවට මතක් කර දීමටත්, ඔවුන් ඒ සඳහා පෙළගැස්වීමටත් එය භාවිතා කළා. (බලන්න ඇල්මා 46:12-13, 19-20.)

ජීවිතයේ අධ්‍යාත්මික සටන් වලදී, “අපේ පොරබැදීම වනාහි මාංසයට සහ රුධිරයට විරුද්ධව නොව, … මේ අන්ධකාරයේ ලෝක මුලාදෑනීන්ටත් ස්වර්ගීය ස්ථානවල සිටින දුෂ්ටකමේ ආත්ම සේනාවන්ටත් විරුද්ධවය” (එපීස 6:12). අපිටත්, මෙම සටන කුමක් සඳහාද කියා මතක් කරදීම අවශ්‍යයි. ප්‍රේරිතවරුන් දොළොස්දෙනාගේ ගණපූරණයේ හිටපු සාමාජිකයෙකු වූ වැඩිහිටි නීල් ඒ. මැක්ස්වෙල් (1926-2004) මෙම අදහස සංවාදයකදී කෙටියෙන් ප්‍රකාශ කළා.

2004 දී මම වැඩිහිටි මැක්ස්වෙල් මිය යාමට මද කලකට පෙර ඔහුගේ රෝහල් කාමරයට ගියා. ඔහුව බැලීමට ගිය හෝ ඔහුට උදව් කළ සෑම කෙනෙකුටම ඔහු ඉතා කරුණාවන්ත වුණා. සෞඛ්‍ය සේවකයින් ඔහුගේ කාමරයට ගොස් එළියට පැමිණියේ දුක් වෙමින්. මම ඔහුට මෙහෙම කිව්වා, “වැඩිහිටි මැක්ස්වෙල්, මේක ඇත්තටම අමාරුයි.” ඔහු සිනාසෙමින් මෙසේ කිව්වා, “අනේ, ඩේල්, අපි ලෞකික ලෝකයක ජීවත් වන සදාකාලික ජීවීන්. වතුරෙන් ගොඩගත් මාළු මෙන් අපි අපගේ පදාර්ථයෙන් ඉවත් වෙනවා. අපට සදාකාලික ඉදිරිදර්ශනයක් ඇති විට පමණක් මේ සියල්ලක්ම අර්ථවත් වෙයි.”

අපි කවදාවත් අපගේ දිව්‍යමය ස්වභාවය සහ සදාකාලික ඉරණම සහ අපට විරුද්ධ වන දූෂිත බලවේගවල විශාල සංයෝගය ගැන පෙනීම නැති කර නොගත යුතුයි. ස්වර්ගික පියාණන්වහන්සේගේ සැලැස්ම නිවැරදිව වටහා ගැනීම මගින්, අපගේ සදාකාලික ගැලවීම සඳහා සහ ආත්මික වහල්භාවයෙන් නිදහස් වීම සඳහා දිගටම සටන් කිරීමට අපව පොලඹවනු ලබනවා.

සාර්ථකත්වය සඳහා උපාය මාර්ග සකස් කිරීම

ඔහුගේ හමුදාවන් සටන් කළ සටන් පුරාම මොරෝනි සාර්ථකත්වය සහතික කිරීමට උපාය මාර්ග යොදාගත්තා. ඔහු තම සතුරන්ගේ ක්‍රියාකාරකම් සහ අභිප්‍රායන් සොයා ගැනීමට ඔත්තුකරුවන් යොදාගත්තා. ඔහු අනාගතවක්තෘ ඇල්මාගෙන් උපදෙස් ලබාගත්තා. මොරෝනි පසුව එම ආනුභාව ලත් යෙදැවුම ඔහුගේ සටනට ප්‍රවේශ වීම සඳහා භාවිතා කළා. ඔහු අවශ්‍යතාවයට අනුව සම්පත් යෙදවූ අතර, අඩු බලකොටු සහිත නගරවල වැඩි වැඩියෙන් යුධ භටයින්ව ස්ථානගත කළා. ඔහු උපායශීලීව යාවත්කාලීන තොරතුරු මත පදනම්ව මෙහෙයුම් සැලසුම් සකස් කළා.

එමගින් ඔහු සතුරු හමුදාවන්ට වඩා වාසි ලබා ගත්තා. ඔහු කවදාවත් අතීත ජයග්‍රහණවලින් සෑහීමට පත් වුණේ නැහැ, ඒ වෙනුවට, ඔහු අනාගත අභියෝගවලට මුහුණ දීම සඳහා ඔහුගේ සහ ඔහුගේ හමුදාවන්ගේ හැකියාවන් වැඩිදියුණු කරගත්තා.

අධ්‍යාත්මික විරුද්ධවාදීන් සමඟ කටයුතු කිරීමට අපට මේ හා සමාන ප්‍රවේශයන් භාවිතා කළ හැකියි. සාතන් අපේ ජීවිත තුළ කරන්න උත්සාහ කරන දේ හඳුනාගැනීමෙන් අපට ආරම්භ කළ හැකියි. ඔහු අපේ අරමුණෙන් අපව වෙනතකට යොමු කිරීමට උත්සාහ කරනවා. පරීක්ෂාවකට මුහුණ දෙන විට, අප අපෙන්ම මෙසේ අසාගත යුතුයි.

• මගේ පැත්තෙන් මෙම ක්‍රියාව දෙවියන්වහන්සේගේ එළිදරව් කරන ලද වචනයට එරෙහිව ගොඩනැගෙන්නේ කෙසේද?

• මෙම ක්‍රියාව කිරීමෙන් ඇති වෙන ප්‍රතිවිපාක මොනවාද?

• මෙම ක්‍රියාව පොළොවේ මගේ අරමුණ ඉටුකර ගැනීමට මට උපකාර කරයිද?

කුඩා පරීක්ෂාවන්ට පවා යටත් වීමේ අවසාන ප්‍රතිඵලය ද අප හඳුනාගත යුතුයි. අප පරීක්ෂාවට යටත් වන විට, අපි “ස්වල්පයෙන් ස්වල්පය වස” පරිභෝජනය කරනවා (ඇල්මා 47:18), එය අධ්‍යාත්මික වශයෙන් මාරාන්තික ප්‍රතිඵලවලට තුඩු දිය හැකි දුෂ්ට බලයන් විසින් භාවිතා කරන වඩාත් ඵලදායී උපාය මාර්ගයකි.

අපගේ පසුදවස්වල අනාගතවක්තෘවරයාගෙන් අපට ලැබෙන මගපෙන්වීම් අනුගමනය කිරීමෙන් අපට සාතන්ගේ පරීක්ෂාවන්ට එරෙහිව අපව ශක්තිමත් කරගන්න පුළුවන්. එසේ කිරීම අපගේ ක්‍රියාවන් ඇගයීමට සදාකාලික ඉදිරිදර්ශනයක් තබා ගැනීමට උපකාරී වෙනවා. අපගේ ජීවිතයේ විවිධ ක්ෂේත්‍රවල පැන නගින පරීක්ෂාවන්ට අප මුහුණ දෙන්නේ කෙසේද යන්න උපාය මාර්ගිකව සකස් කිරීම ඒ ඒ අවස්ථා වලදී වඩාත් නිවැරදි තේරීම් කිරීමට උපකාරී වෙනවා. පෙර සැලසුම් කළ උපාය මාර්ග සහ ප්‍රවේශයන් අපගේ සදාකාලික අරමුණ වෙතින් වන බාධාවන්ගෙන් ආරක්ෂා වීමට අපට උපකාර කරනවා.

ඒ සඳහා උදාහරණයක් තමයි තාක්ෂණය. තාක්ෂණය දෙපැත්ත කැපෙන කඩුවක් විය හැකි අතර, එය අප භාවිතා කරන ආකාරය මත පදනම්ව ප්රයෝජනවත් මෙන්ම හානිකරද වෙන්න පුළුවන්. අපගේ උපාංග පිළිබඳ ඥානවන්ත තේරීම් කිරීමට අපට උදවු කිරීමට, බාල සහ වැඩිමහල් අයට “තාක්ෂණයේ වගකීම භාර ගැනීම” සහ යෞවනයේ ශක්තිය සඳහා:තේරීම් කිරීම සඳහා මාර්ගෝපදේශයක් සඳහා යොමු වෙන්න පුළුවන්. මේවා අපගේ අරමුණ අපට මතක් කර දෙනවා, යේසුස් ක්‍රිස්තුස්වහන්සේ වෙතට අපව යොමු කරනවා, සහ අපගේ ජීවිතයට ශුද්ධාත්මයාණන්වහන්සේට ආරාධනා කිරීමට අපට උපකාර කරනවා. අපි තාක්ෂණය භාවිතා කරන්නේ කෙසේද, කවදාද සහ කොතැනද යන්න සැලසුම් කිරීම මගින් පහත්, ලෞකික උපක්‍රමවලට එරෙහිව අපව ශක්තිමත් කරනු ඇත.

රූපකාත්මක සටන් සඳහා සූදානම් වීම

ඉදිරි සටන් අපේක්ෂාවෙන්, මොරෝනි තම සෙනඟ එකිනෙකාව ළය වැස්ම, පලිහ, හිස්වැසුම් සහ ඝන ඇඳුම්වලින් සූදානම් කළා. ඔහු තම සෙනඟව සාමූහිකව සූදානම් කළේ බලකොටු සහිත නගර වට කර, ඒවා වටා පස් ඉවුරු දැමීමෙන්.

ආත්මිකව, අපි දෙවියන්වහන්සේගේ ආඥා පිළිපැදීමෙන් පුද්ගලිකව සූදානම් වෙනවා. යේසුස් ක්‍රිස්තුස්වහන්සේගේ බලය අපගේ ජීවිතවලට ඇද ගන්නා ගිවිසුම් අපි දෙවියන්වහන්සේ සමඟ ඇතිකරගෙන ඒවා පිළිපදිනවා. අපි යාච්ඤා කිරීම, නිරාහාරව සිටීම සහ ශුද්ධලියවිලි කියවීම වැනි ස්වකීය, පුද්ගලික නමස්කාර කිරීමේ ක්‍රියාවන් වල නිරත වෙනවා. අපට ලැබෙන අධ්‍යාත්මික මගපෙන්වීමට ප්‍රතිචාර දක්වමින් අපි ඇදහිල්ලෙන් ක්‍රියා කරනවා. අපි හෘද සාක්ෂියට එකඟව, සුදුස්සන් ලෙස සක්‍රමේන්තුව ලබාගැනීම සඳහා සූදානම් වෙනවා. අප එසේ කරන විට, යේසුස් ක්‍රිස්තුස්වහන්සේ කෙරෙහි තම ඇදහිල්ලේ ස්ථිරව සිටි මොරෝනිට සැබෑ වූවා සේම, ගැලවුම්කරුවාණන් අපගේ ජීවිත තුළ වැඩි වැඩියෙන් සැබෑවක් බවට පත්වෙනවා. මගපෙන්වීම සහ ගැලවීම සඳහා ගැලවුම්කරුවාණන් මත විශ්වාසය තැබිය හැකි බව මොරෝනි දැන සිටියා (බලන්න ඇල්මා 48:16). අපටත් මගපෙන්වීම සහ ගැලවීම සඳහා යේසුස් ක්‍රිස්තුස්වහන්සේ මත විශ්වාසය තබන්න පුළුවන්.

අපගේ පවුල් ශක්තිමත් කිරීමෙන් අපට තවදුරටත් සූදානම් වෙන්න පුළුවන්. අපගේ ස්වර්ගීය පියාණන්වහන්සේ අපව පවුල්වලට සංවිධානය කළේ සතුටින් සිටීමට සහ උන්වහන්සේ වෙතට ආපසු යන ආකාරය ඉගෙන ගැනීමට උපකාර කිරීමටයි. අපේ පවුල්, අපිට උදව්වක් ලබාගැනීමේ මූලාශ්‍රයක් වෙන්න පුළුවන්. අපගේ පවුල්වලට ආවේණික වූ තත්වයන් නොසලකා, අප දෙවියන්වහන්සේගේ ශ්‍රේෂ්ඨ පවුලක කොටසක් බව මතක තබා ගැනීමෙන් අප සැමට ප්‍රීතිය හා ආදරය දැනිය හැකියි.

අපි ශුද්ධවන්තයින්ගෙන් ප්‍රජාවන්ට සම්බන්ධ වන විට අපට සාමූහිකව ශක්තිය ලබා ගත හැකි අතර අපගේ අධ්‍යාත්මික සටන් සඳහා සූදානම් විය හැකියි. අපගේ ස්ටේක සහ දිස්ත්‍රික්ක එවැනි රැකවරණයක් සහ ආරක්ෂාවක් සපයනවා. අපට එකිනෙකාව අධ්‍යාත්මිකව පෝෂණය කිරීමටත්, දෙවියන්වහන්සේගේ ආඥා පිළිපැදීමට එකිනෙකාට උපකාර කිරීමටත්, සෑම විටම සහ විශේෂයෙන්ම අභියෝගාත්මක කාලවලදී ක්‍රිස්තුස්වහන්සේ කෙරෙහි විශ්වාසය තැබීමට එකිනෙකා දිරිමත් කිරීමටත් පුළුවන්. අපි එක් රැස් වන විට, අපි අපේ සටන් කරන්නේ තනිවම නොවන බව අපට වැටහෙනවා. අපට උදව් කිරීමට සහ අපව ආරක්ෂා කිරීමට හැකි මිතුරන්, ගුරුවරුන් සහ නායකයින් අපට සිටිනවා. අපි සියල්ලෝම එකට එකතු වී සූදානම් වන විට අපි සැවොම ශක්තිමත් වෙනවා.

මොරෝනිගේ ජනයාගේ සියලු සතුටට හේතු වූයේ දෙවියන්වහන්සේ තුළ සහ ඔවුන්ගේ ආගම තුළ ඔවුන්ගේ ඇදහිල්ලට ඔවුන් සත්‍යවන්තව සිටීම බව, කැපී පෙනෙන ලෙස මොරෝනි විශ්වාස කළා. ප්‍රීතිය පැමිණෙන්නේ ස්වර්ගික පියාණන්වහන්සේගෙන් සහ උන්වහන්සේගේ සැලැස්ම නිසා සහ යේසුස් ක්‍රිස්තුස්වහන්සේ සහ උන්වහන්සේගේ වන්දිගෙවීම නිසා බව මොරෝනි මෙන් අපද වටහා ගත යුතුයි. අපි අපේ අරමුණ තේරුම් ගෙන, සාර්ථකත්වය සඳහා උපාය මාර්ග සකස් කර, රූපකාත්මක සටන් සඳහා සූදානම් වන විට, අපට දිව්යමය උපකාරය සහ බලය ලැබෙනවා.

ස්වර්ගික පියාණන්වහන්සේ සහ යේසුස් ක්‍රිස්තුස්වහන්සේ වහල්භාවයෙන්—එනම් මරණයෙන් සහ පාපයෙන් එම අවසාන නිදහස ලබාදෙන බව, මොරෝනි දැන සිටියා මෙන්, මමත් දන්නවා. අපි සෑම දෙයකදීම උන්වහන්සේලා දෙස බලන විට උන්වහන්සේලා උන්වහන්සේලාගේ බලයෙන් අපට ආශිර්වාද කරනවා.