“Liliuina o Loto ia Iesu Keriso,” Liahona, Nov. 2025.
E Manatua E Le Mo Le Malosi o le Autalavou le
Liliuina o Loto ia Iesu Keriso
Manatuaina o Peresitene Russell M. Nelson
A o avea Peresitene Russell M. Nelson ma se alii talavou o loo taufuafua po o le a le galuega e tulitulimatagauina, sa ia iloaina se mea e tasi ma le mautinoa—sa manao o ia e fesoasoani i tagata. Na iu lava ina avea o ia ma se fomai tipitipi lauiloa i le lalolagi ma faia le tele o taotoga o le tatalaina o le fatu e faamalolosi ai fatu ma faaumiumi ai olaga.
I le avea ai ma se Aposetolo ma se Peresitene lona 17 o Le Ekalesia a Iesu Keriso o le Au Paia o Aso e Gata Ai, sa pa’i atu ai Peresitene Nelson i loto o tagata i le lalolagi atoa e ala i le liliu atu o i latou ia Iesu Keriso e ala i ana aoaoga, auaunaga, ma le alofa.
Taialaina Faaleagaga
Sa soifua Peresitene Nelson i lona olaga i se auala na faamanuiaina ai o ia i le taitaiga faaleagaga. I se tasi o taotoga, sa tu ai o ia i luga a’e o se gasegase ma sa ia lagona le le mautinoa pe faapefea ona faaauau. Ona ia lagonaina lea o le Agaga Paia o taialaina o ia ina ia faamaeaina ma le manuia le taotoga.
Na aoao mai Peresitene Nelson o loo avanoa le taitaiga faaleagaga mo tagata uma. Na ia saunoa mai, “Afai tatou te maua moni lava le Agaga Paia ma aoao ia iloatino ma malamalama i Ana uunaiga, o le a taialaina i tatou i mataupu tetele ma laiti.
O Peresitene Nelson o loo faafeiloaia le autalavou i Fiti ia Me 2019.
O Le Faapotopotoina o Isaraelu ma le Ala o Feagaiga
I le avea ai ma se perofeta i aso e gata ai, na aoao mai ai Peresitene Nelson o le faapotopotoina o Isaraelu o le galuega aupito sili lea ona taua o loo faia i le lalolagi i aso nei, ma o le autalavou i soo se mea e mafai ona avea ma se vaega tele o le galuega e ala i le auai “i le autau a le autalavou a le Alii e fesoasoani e faapotopoto Isaraelu.”
Na aoao mai Peresitene Nelson: “Soo se taimi e te faia ai soo se mea e fesoasoani ai i soo se tasi -i itu uma o le veli—fai se laasaga agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. E faapena lona faigofie.”
Na aoao mai foi Peresitene Nelson o le tumau ai i le ala o le feagaiga o le a aumaia ai “faamanuiaga ma avanoa faaleagaga uma e avanoa mo alii, tamaitai, ma tamaiti i soo se mea.”
Faatuatua mo le Lumanai
I se lalolagi fenumiai, sa tausia ai pea e Peresitene Nelson se uiga lelei. “Ua ou vaaia ata o taulelei i le lumanai,” na ia saunoa ai. “O le a faatumulia i avanoa mo i tatou taitoatasi.”
O lenei vaaiga i le olaga na maua mai i lona faatuatua. Na ia aoao mai, “O le faatuatua ia Iesu Keriso o le mana aupito sili lea o loo avanoa mo i tatou i lenei olaga.
Ina ua avea Peresitene Nelson ma Peresitene o le Ekalesia, sa ia saunoa mai: “Ou te tautino atu lo’u tuuto i le Atua lo tatou Tama Faavavau ma Lona Alo, o Iesu Keriso. Ou te iloaina i La’ua, alofa ia i La’ua, ma tautino atu e auauna atu ia i La’ua—faapea ma outou—faatasi ai ma le mānava uma o loo totoe o lo’u ola.”
Sa ia faamamaluina atoatoa lena tautinoga. O le taunuuga, ua faamanuiaina ai le Ekalesia—ma le lalolagi—.