« ប្រធាន ណិលសុន ប្រារព្ធពិធីខួបកំណើតគម្រប់ជន្មាយុ ១០០ ឆ្នាំ » លីអាហូណា ខែវិច្ឆិកា ឆ្នាំ២០២៤ ។
ព័ត៌មានសាសនាចក្រ
ប្រធាន ណិលសុន ប្រារព្ធពិធីខួបកំណើតគម្រប់ជន្មាយុ ១០០ ឆ្នាំ
ថ្នាក់ដឹកនាំនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានចូលរួមជាមួយគ្រួសារ និងមិត្តភក្តិ នាថ្ងៃចន្ទ ទី៩ ខែកញ្ញា ឆ្នាំ២០២៤ ដើម្បីគោរពដល់ព្យាការី និងប្រធានសាសនាចក្រ រ័សុល អិម ណិលសុន ក្នុងថ្ងៃខួបកំណើតគម្រប់ជន្មាយុ ១០០ ឆ្នាំរបស់លោក ។
ព្រឹត្តិការណ៍នេះត្រូវបានប្រារព្ធឡើងនៅទីក្រុង សលត៍ លេក ហើយចាក់ផ្សាយជុំវិញពិភពលោក ។ ការប្រារព្ធនេះមានការចាក់ផ្សាយតន្ត្រីផ្ទាល់ វីដេអូថ្លែងអំណរគុណពីអ្នកដឹកនាំសេចក្ដីជំនឿផ្សេងៗ សុន្ទកថាពីថ្នាក់ដឹកនាំសាសនាចក្រ និងពីសមាជិកគ្រួសាររបស់ប្រធាន ណិលសុន ព្រមទាំងវីដេអូពីសមាជិកសាសនាចក្រចែកចាយពីរបៀបដែលពួកគេបានបម្រើដល់មនុស្សម្នាក់ ។
ប្រធាន ណិលសុន បានថ្លែងអំណរគុណដល់ក្រុមគ្រួសារ មិត្តភក្តិ និងពួកបរិសុទ្ធថ្ងៃចុងក្រោយ ចំពោះសេចក្តីសប្បុរស និងការគាំទ្ររបស់ពួកគេ ។ លោកបានចែកចាយការដឹងគុណរបស់លោកចំពោះសារជូនពរខួបកំណើតរាប់មិនអស់ និងការឆ្លើយតបជាសកលចំពោះការអញ្ជើញ « ៩៩+១ » របស់លោក ដែលបានលើកទឹកចិត្តមនុស្សឲ្យ « ឈោងទៅជួយ ‹ បុគ្គល › ដែលនៅក្នុងជីវិតរបស់យើង ដែលអាចនឹងមានអារម្មណ៍វង្វេង ឬឯកោ » ( Facebook ថ្ងៃទី១ ខែមិថុនា ឆ្នាំ២០២៤ នៅលើ facebook.com/russell.m.nelson ) ។
ព្យាការីបានសង្កត់ធ្ងន់លើសារៈសំខាន់នៃសេចក្តីជំនឿ ទស្សនវិស័យដ៏អស់កល្បមួយអំពីជីវិត និងពលិកម្មធួនរបស់ព្រះយេស៊ូវគ្រីស្ទ ។ ប្រធាន ណិលសុន បានមានប្រសាសន៍ថា « បងប្អូនប្រុសស្រីរបស់ខ្ញុំ រយៈពេលនៃជីវិតរបស់បងប្អូន មិនសំខាន់ដូចជាប្រភេទនៃជីវិតដែលបងប្អូនរស់នៅនោះទេ ។ សម្រាប់យើងម្នាក់ៗ សូម្បីតែបុរសដែលមានអាយុ ១០០ ឆ្នាំក៏ដោយ ក៏ជីវិតឆ្លងកាត់យ៉ាងលឿនដែរ ។ ការអធិស្ឋានរបស់ខ្ញុំគឺថា សូមឲ្យបងប្អូននឹងអនុញ្ញាតឲ្យព្រះឈ្នះក្នុងជីវិតបងប្អូន ។ ធ្វើសេចក្ដីសញ្ញាជាមួយទ្រង់ ។ ចូរបន្តនៅលើផ្លូវនៃសេចក្តីសញ្ញា ។ រៀបចំខ្លួនត្រឡប់ទៅរស់នៅជាមួយទ្រង់ម្ដងទៀត » ។
ប្រធាន ដាល្លិន អេក អូក និង ហែនរី ប៊ី អាវរិង ទីប្រឹក្សារបស់ប្រធាន ណិលសុន នៅក្នុងគណៈប្រធានទីមួយ បានចែកចាយការសង្កេតឃើញរបស់ពួកលោកពីការធ្វើការយ៉ាងជិតស្និទ្ធជាមួយព្យាការីអស់រយៈពេលប្រាំមួយឆ្នាំកន្លះ ។ ពួកលោកបានគូសបញ្ជាក់ពីភាពកក់ក្តៅរបស់ប្រធាន ណិលសុន ការគោរពចំពោះអ្នកដទៃ និងអាកប្បកិរិយាដូចជាព្រះគ្រីស្ទ ។
ប្រធាន អូក បានមានប្រសាសន៍ថា « កាលដែលបាននៅក្នុងបន្ទប់ ឬក្នុងការប្រជុំ ឬក្នុងការសន្ទនាជាមួយប្រធាន ណិលសុន គឺផ្តល់ឲ្យបងប្អូននូវឱកាសនៃការដកពិសោធន៍ថាតើការនៅជាមួយព្រះអង្គសង្គ្រោះមានលក្ខណៈបែបណា ។ លោកគឺជាតំណាងរបស់ព្រះអង្គសង្គ្រោះ ។ ហើយលោកគឺជាគំរូរបស់យើង » ។