ទិដ្ឋភាពពីក្រោយឆាក ៖ ការរៀបចំឆាកមជ្ឈមណ្ឌលសន្និសីទ

ខែវិច្ឆិកា ឆ្នាំ២០២៤

« ទិដ្ឋភាពពីក្រោយឆាក ៖ ការរៀបចំឆាកមជ្ឈមណ្ឌលសន្និសីទ » លីអាហូណា ខែឧសភា ឆ្នាំ២០២៤ ។

ទិដ្ឋភាពពីក្រោយឆាកនៃសន្និសីទទូទៅ ៖ ការរៀបចំឆាកមជ្ឈមណ្ឌលសន្និសីទ

នៅពេលយើងមើលរូបភាពសន្និសីទទូទៅ យើងប្រហែលជាស្រមៃអំពីឆាក និងកៅអីរបស់ថ្នាក់ដឹកនាំសាសនាចក្រនៅពីមុខបំពង់សំឡេងព្យាណូខ្យល់ ។ ប៉ុន្តែឆាកមជ្ឈមណ្ឌលសន្និសីទមិនមើលទៅបែបនោះពេញមួយឆ្នាំទេ ។

មជ្ឈមណ្ឌលសន្និសីទរៀបចំព្រឹត្តិការណ៍ជាច្រើនដែលតម្រូវឲ្យមានការរៀបចំផ្សេងៗគ្នា ហើយវាត្រូវចំណាយពេលរាប់ម៉ោងដើម្បីរៀបចំឆាក ( ហៅជាផ្លូវការថា « វេទិកា » ) សម្រាប់សន្និសីទទូទៅ ។ មនុស្សមួយក្រុមដែលមានគ្នា ១០ នាក់ចំណាយពេលប្រហែលជា ៣ សប្តាហ៍ដើម្បីរៀបចំឆាក កន្លែងទទួលភ្ញៀវ និងកន្លែងមជ្ឈមណ្ឌលសន្និសីទផ្សេងទៀតឲ្យរួចរាល់សម្រាប់អ្នកទស្សនាទទួលបានភាពរីករាយនឹងសន្និសីទទូទៅ ។

នេះគឺជាការពិតគួរឲ្យចាប់អារម្មណ៍មួយចំនួន ៖

ផ្ទាំងធំៗចំនួន ១៨ ផ្ទាំងបង្កើតជាកម្រាលឆាកធំដែលផ្ទាំងនីមួយៗមានទម្ងន់ ១.៥–៤ តោន ។
រចនាសម្ព័ន្ធដ៏ធ្ងន់ទាំងនោះត្រូវបានផ្លាស់ប្តូរទីកន្លែងដោយខ្នើយខ្យល់ដែលរុញទៅដី ដែលធ្វើឲ្យគ្រោងមានភាពងាយស្រួលក្នុងការផ្លាស់ប្តូរទីកន្លែង ។
បំណែកតូចៗប្រហែលជា ៥០០ ដូចជាកង់ និងបន្ទះក្តារ ក៏ត្រូវបានបន្ថែមផងដែរ ។
ទ្វារកម្ពស់ ៨០ ហ្វីត ( ២៤ ម ) បើកដើម្បីឲ្យគ្រោងដែលធំបំផុតដែលត្រូវដាក់ឲ្យត្រូវកន្លែង ។
ក្រុមរៀបចំឆាកក៏រៀបចំកន្លែងសម្រាប់សន្តិសុខ អ្នកផ្សព្វផ្សាយសាសនា និងការទទួលភ្ញៀវ—ដែលមានកិច្ចការសរុបជាង ៦០០ ។

ចូអែល រ៉ាយធ៍ ដែលជាអ្នកគ្រប់គ្រងសម្រាប់ក្រុមនេះបានជួយក្នុងសន្និសីទទូទៅចំនួន ៥០ លើកមកហើយ ។ គាត់ហៅក្រុមរបស់គាត់ថាជា « វីរបុរសក្រោយឆាក » ដែលបានខិតខំប្រឹងប្រែងយ៉ាងខ្លាំង ។ គាត់និយាយ ៖ « ការរៀបចំកៅអី តុ ឬការដំឡើងគ្រឿងបរិក្ខារមិនមានកិត្តិនាមច្រើននោះទេ » ។ គាត់បាននិយាយថា ប៉ុន្តែបើគ្មានពួកគេទេ សន្និសីទនេះមិនដំណើរការទៅបានល្អបែបនោះទេ ។

អ្នកដឹកនាំការរៀបចំឆាក ប្រេនដុន យូរី កត់សម្គាល់ឃើញថា ការរៀបចំឆាកត្រូវការ « មនុស្សជាច្រើនដែលមានជំនាញខុសៗគ្នា និងប្រវត្តិផ្សេងគ្នា » ដើម្បីសម្រេចកិច្ចការរបស់ពួកគេ—« ដើម្បីផ្សាយសេចក្ដីស្រឡាញ់របស់ព្រះអម្ចាស់ និងព្រះបន្ទូលដែលទ្រង់មានសម្រាប់មនុស្សរាល់គ្នា » ។

ប្រេនដុន និយាយថា ពួកគេត្រូវការមនុស្សគ្រប់គ្នាដែលមានជំនាញខុសៗគ្នាទាំងនោះ ដើម្បី « រួមគ្នាសម្រាប់បុព្វហេតុតែមួយ » ។ ដោយសារបុព្វហេតុនោះផ្តោតទៅលើព្រះយេស៊ូវគ្រីស្ទ នោះក្រុមរៀបចំឆាកនេះទទួលអារម្មណ៍ថាមានវត្តមានរបស់ទ្រង់ ហើយមើលឃើញអព្ភូតហេតុរបស់ទ្រង់ ។

រ៉ូប៊ឺត ស៊ីមសុន ដែលជាអ្នកដឹកនាំការរៀបចំឆាកផងដែរនិយាយថា ៖ « ខ្ញុំ … មានអារម្មណ៍ថាព្រះវិញ្ញាណនៃព្រះអម្ចាស់យាងចូលក្នុងការប្រជុំរបស់យើង ហើយគង់នៅទីនោះដើម្បីជួយយើង … បំពេញ [ កិច្ចការ ] ។ … ពេលខ្លះ យើងឆ្ងល់ថាតើយើងអាចធ្វើការងារទាំងអស់នេះដោយរបៀបណា ។ ប៉ុន្តែយើងអធិស្ឋាន ហើយទូលសុំជំនួយពីព្រះវរបិតាសួគ៌យើង » ។

ហើយដូចដែល ចូអែល បានបន្ថែម ៖ « ដោយការស៊ូទ្រាំ ដោយការតស៊ូ ដោយការបន្តការខិតខំ [ ការរៀបចំឆាក ] បានរួចរាល់សព្វគ្រប់សម្រាប់សន្និសីទទូទៅនាពេលព្រឹក » ។ ចូអែល ហៅវាថា « ការបំផុសគំនិត » ដោយសារអព្ភូតហេតុកើតឡើងតាមរយៈព្រះយេស៊ូវគ្រីស្ទ ។