Misyonaryo ang Kaliwat sa Duha ka Propeta Ulahing mga Adlaw

Si Elder Heber George, usa ka misyonaryo nga nagserbisyo sa Philippines Antipolo Mission, nagsunod sa mga tunob sa mga propeta sa—tinuoray. Usa ka lumad sa Seattle, Washington sa Estados Unidos, si Elder George adunay duha ka modernong mga propeta isip mga katigulangan.

Sa habig sa iyang inahan, si Elder George mao ang apo sa tuhod ni Spencer W. Kimball, ang ikanapulog duha nga presidente sa Simbahan. Ang apohan nga lalaki sa iyang inahan naminyo ngadto ni Olive Beth Kimball, ang bugtong anak nga babaye ni Presidente Kimball.

Sa habig sa iyang amahan, si Elder George naggikan sa pamilya ni Propeta Joseph Smith, si Samuel Harrison Smith, ang manghod nga lalaki sa Propeta ug giisip nga unang misyonaryo sa Ang Simbahan ni Jesukristo sa mga Santos sa Ulahing mga Adlaw.

“Mapasalamaton ko sa desisyon sa akong mga katigulangan sa paghimo og sagradong mga pakigsaad uban sa atong Amahan sa Langit ug mahimong kabahin sa tinuod nga Simbahan sa Manluluwas,” mipakigbahin si Elder George. “Ako nasayod nga kon wala sila, dili unta ako mapadako diha sa usa ka mahigugmaon, nga nakasentro ni Kristo nga panimalay uban sa duha ka talagsaong mga ginikanan kinsa mitudlo kanako sa ebanghelyo ni Jesukristo.”

Ang asosasyon wala mohunong didto. Ang unang ngalan ni Elder George gihatag sa iyang mga ginikanan sa pagpasidungog sa laing prominenteng katigulangan, si Heber C. Kimball, kinsa nagserbisyo isip magtatambag ni Brigham Young sa Unang Kapangulohan.

Sa panimalay ni George, adunay gihatagan og bili nga mga handomanan mahitungod sa ilang mga katigulangan nga makatabang sa paglig-on sa pagtuo sa mga sakop sa pamilya. Si Elder George miasoy og usa ka nindot nga sugilanon nga gisulti kanila sa iyang apohan nga lalaki:

“Usa ka tawo misulti sa akong Lolo mahitungod niadtong nakatambong sa usa ka komperensiya sa stake sa nag-edad pa siya og 12, ug gikulbaan sa dihang si Elder Kimball [kaniadto usa ka Apostol] mihangyo sa tanang batang lalaki nga nag-edad og dose sa pag-adto sa atubangan. Gipalinya sila ni Elder Kimball ug mihatag sa matag usa kanila og tuskig, bag-ong usa ka dolyar nga papel. Gisultihan niya sila nga mao kadto ang sugod sa ilang pang-misyonaryo nga pundo. Ang tawo wala gayod makalimot niana nga kasinatian ug siya miingon nga kini nakatabang sa paghatag og pagtutok sa iyang kinabuhi.”

Si Elder George naggikan sa pamilya sa mga misyonaryo. Ang iyang amahan ug inahan parehong mialagad og mga misyon, uban sa usa ka magulang nga igsoong babaye ug igsoong lalaki. “Sa dihang akong giablihan ang akong tawag, akong nabasa ang ‘Philippines Antipolo Mission’ ug ako mahinamon kaayo,” nahinumdom si Elder George. “Kini usa ka panalangin nga ania dinhi niini nga nasod uban niining talagsaon nga mga tawo ug sa maanindot nga pinulongan.”

Ang mga katigulangan ni Elder George adunay espirituhanong kasuod nga koneksiyon sa Pilipinas. Usa ka apohan sa tuhod nga uyoan sa linya sa Smith, si Elder Joseph Fielding Smith (nga nahimo usab nga presidente sa Simbahan sa kaulahian), mipahinungod sa Pilipinas alang sa pagsangyaw sa ebanghelyo niadtong 1955, sa Clark Air Base sa Pampanga.

Sa laing bahin, ang iyang apohan sa sungkod [great-great-grandfather] nga si Presidente Kimball nahimong unang presidente sa Simbahan nga mibisita sa Pilipinas sa dihang siya ang nangulo sa usa ka nasodnong komperensiya sa Simbahan didto sa Araneta Coliseum niadtong 1975.

Alang ni Elder George, ang pagserbisyo isip usa ka misyonaryo sama sa iyang apohan nga si Samuel Harrison Smith usa ka maayong paagi sa pagsunod sa iyang talagsaong kabilin. “Ako nasayod nga ang Pilipinas adunay importante nga papel sa pagpundok sa Israel,” siya mipamatuod, “ug ako mapasalamaton kaayo nga nahimong kabahin niini.”