Ang Gahom sa Paghimo og Mga Pakigsaad sa Templo

Nakabig ko ngadto sa Simbahan isip sa batan-on pa nga nagpangidaron og 13. Usa ka adlaw sa ting-init sa 1971, gidala ako sa akong amahan sa lungsod alang sa among pagpatupi sa buhok. Samtang ang barbero nagtupi sa akong buhok, sa kalit lang duha ka mga babaye nga Amerikana ang miabot sa barberohan. Sila gipaila- ila sa barbero ngadto sa akong amahan isip mga misyonaryo sa Ang Simbahan ni Jesukristo sa mga Santos sa Ulahing mga Adlaw. Gisultihan niya si Papa nga aduna silay maayong doktrina nga mahimo niyang sulayan sa pag-imbestigar. Sa sinugdanan, si Papa nagduha-duha sa pagdawat sa imbitasyon apan sa kataposan napasugot siya nga mouyon sa usa ka appointment aron tudloan kami sa balay.

Busa kami gitudloan sa tinuod nga ebanghelyo ni Jesukristo ug gihatagan og usa ka kopya sa Basahon ni Mormon. Gibasa ug gipamalandongan sa akong mga ginikanan ang sagradong basahon samtang nagtuon sila sa mga sulod niini, ug gibati nila ang gahom niini. Mihukom sila nga magpabunyag uban kanamo nga ilang mga anak.

Sa wala pa mahimong mga miyembro sa tinuod nga simbahan, ang among mortal nga dalan daw ngitngit nga walay paglaom, wala kami masayod sa plano sa Dios, ug wala kami masayod mahitungod sa kinabuhing dayon. Ang among motto mao ang “kaon, inom, ug paglipay kay ugma kita mamatay,” apan sa dihang among nakaplagan ang tinuod nga simbahan, ang among dalan nahimong mas hayag uban sa tanang mga ordinansa ug mga pakigsaad nga among gihimo uban sa Dios.

Ang atong bunyag ngadto sa Simbahan nagtugot kanato sa pagsulod sa dalan sa pakigsaad nga modala kanato balik ngadto sa presensya sa Dios uban sa gisaad nga kinabuhing dayon kon magpadayon kita sa pagpadayon sa unahan, pagsunod sa mga sugo, ug paglahutay hangtod sa kataposan. Makab-ot nato kini pinaagi sa paghimo, pagtuman, ug pagtahod sa atong mga pakigsaad atol sa bunyag ug sa templo.

Isip bag-ong gitawag nga Presidente sa Simbahan, si Presidente Nelson mitambag sa mga santos: “Karon, ngadto sa matag miyembro sa Simbahan moingon ko: Pabilin diha sa dalan sa pakigsaad. Ang inyong pasalig nga mosunod sa Manluluwas pinaagi sa paghimo og mga pakigsaad uban Kaniya ug dayon sa pagtuman niadto nga mga pakigsaad moabli sa pultahan ngadto sa tanang espirituhanong mga panalangin ug pribilehiyo nga mahimong maanaa sa mga lalaki, babaye, ug mga anak bisan asa.”

Alang niadtong nahisalaag sa dalan, iyang gipadangat kini nga pagdapit atol sa Abril 2019 nga Kinatibuk-ang Komperensiya: “Mohangyo ko kaninyo sa paghinulsol. Sinatia ang makapalig-on nga gahom sa adlaw-adlaw nga paghinulsol—sa pagbuhat ug mahimong mas maayo sa matag adlaw.”

Ang gisulti ni Presidente Nelson mao, kon kita nahisalaag gikan sa atong dalan sa pakigsaad, kon kita adunay pipila ka mga kapakyasan nga nagpahilayo kanato sa dalan, ang iyang propetikanhon ug mahigugmaong tambag ngadto kanatong tanan kinsa napakyas o napukan klaro ug yano, “paghinulsol ug usba ang dalan,” mobangon, “maghulsol, magbag-o ug mobalik sa atong dalan sa pakigsaad.”

Kon kita dili bug-os nga tigbayad sa ikapulo kagahapon, mahimong usa karon nga walay paglangan aron ang mga panalangin moabot nga moagos. Pinaagi sa pagbuhat sa ingon kamo mosarang alang sa usa ka rekomend sa templo aron makasulod na usab kita sa templo. Kana nga saad sigurado, ang mga panalangin moabot sa atong mga kinabuhi.

Sa dihang gibunyagan kami sa simbahan niadtong 1971, walay templo sa Pilipinas, ang pinakaduol nga templo anaa sa Tokyo, Japan. Sa pagkahibalo mahitungod sa mga ordinansa sa templo ug sa gahom sa pagbugkos nga nagbugkos sa mga pamilya ngadto sa kahangtoran, naghinam-hinam kaayo kami sa templo sa Pilipinas. Taas kadto nga pagpaabot hangtod sa 1984 sa dihang ang Manila Temple gipahinungod ni Presidente Gordon B. Hinckley.

Usa kami sa daghang mga santos nga Pilipino nga nagdali ngadto sa Manila Temple aron maselyo isip usa ka pamilya. Napuno ang among kalipay sa dihang nadawat namo ang mga ordinansa ug naselyo isip usa ka pamilya. Sukad niadtong panahona kami wala na gayod mobaliwala sa among mga pakigsaad sa Dios, kanunay kami nga miadto sa templo bisan paman sa kalay- on gikan sa Panggasinan hangtod sa Manila. Sama sa kadaghanan sa mga Pilipino, kami miatubang og mga ekonomikanhong kalisod apan nagtipig kami og salapi aron kanunayng makasulod sa templo. Kini usa ka kalipay sa pagbag-o sa among mga pakigsaad uban sa Dios ug sa paghimo sa mga ordinansa alang sa among mga patay.

Paglabay sa 50 ka tuig, ang mga Santos sa Pilipinas napanalanginan og 13 ka mga templo ug tingali daghan pa nga moabot. Nalipay kami nga sa matag Kinatibuk-ang Komperensiya si Presidente Nelson mopahibalo sa pagtukod og mga templo sa tibuok kalibotan.

Ang Ginoo mipadayag ngadto sa propeta sa pagtukod og dugang nga mga templo aron sayon kining maadto sa mga miyembro. Motuo ko nga tungod sa daghang mga templo taliwala kanato, ang mga santos sa Pilipinas ibayaw sa temporal ug espirituhanon nga paagi.

Sa nagkadaghan nga mga templo sa Pilipinas, adunay dinalian nga panginahanglan alang kanato karon nga mas maandam ang atong kaugalingon nga mahimong andam sa templo, mahimong mga tawo nga motambong sa templo ug mahigugmaon sa templo. Karon nga mas daghan nang templo ang mahimong maadto nato, kinahanglan natong pamatud-an nga takos kita nga mosulod sa templo ug mohimo sa mga ordinansa nga gikinahanglan alang sa mga patay ug sa mga buhi.

Kinahanglan natong masabtan ang kamahinungdanon sa kanunay nga pagbalik ngadto sa templo. Si Presidente Nelson mihatag og gibug-aton niini sa usa ka Kinatibuk-ang Komperensiya nga Miting sa Pagpangulo niadtong Abril 2024: “Ang paghimo og mga pakigsaad uban sa Dios usa sa labing dako nga mga pribilehiyo nga gihatag kanato sa atong Langitnong Amahan ug sa Iyang anak nga si Jesukristo niining mortal nga kinabuhi. Kita kinahanglan nga moandam sa atong mga katawhan og mas maayo alang sa naghingapin nga mga panalangin sa templo pinaagi sa pagtabang kanila nga makasabot sa mga pakigsaad o mga saad ngadto sa Dios nga ilang gihimo didto ug sa potensiyal nga mga panalangin nga nalangkit niadto nga mga pakigsaad.”

Pagkatalagsaon nga panalangin alang kanato nga magpuyo sa panahon diin ang mga bilding sa templo padayon nga nagtuldok sa tibuok kalibotan sa paghimo og sagrado nga mga ordinansa nga anaa alang sa mga santos, ug sa pagbaton og mahigugmaong mga propeta ug mga apostoles nga mogiya kanato ngadto sa templo aron makadawat kita og talagsaong mga panalangin nga gisaad ngadto niadtong takos nga mosulod.