Pagdiskobre og Laing Pioneer nga Santos sa Ulahing mga Adlaw

Sa sayo nga bahin niining tuiga, si Presidente Bryan Willets sa Philippines Quezon City Mission mipahigayon sa Philippines Area Presidency aron sa pagpahibalo kanila mahitungod sa usa ka babaye kinsa miangkon nga usa sa unang Filipino nga miyembro sa Ang Simbahan ni Jesukristo sa mga Santos sa Ulahing mga Adlaw, human sa pagsugod sa misyonaryo nga buhat niadtong Hunyo 1961. Ang kapangulohan sa Area agig pagbalos mipasa sa impormasyon ngadto sa Departamento sa Kasaysayan sa Simbahan [Church History Department].

Ang babaye, si Mildred Rivera Wilcken, nakabase sa Estados Unidos apan nagbisita kaniadto sa Pilipinas uban sa mga sakop sa iyang pamilya.

Si Sister Melanie Gapiz, ang lokal nga manedyer sa Kasaysayan sa Simbahan, naintriga tungod kay ang anaa nga makasaysayanong impormasyon nga iyang gihuptan wala gayod maghisgot niini nga babaye. Apan human sa pagsusi sa mga rekord sa pagkamiyembro diha sa Simbahan, iyang nadiskobrihan nga si Sister Wilcken nabunyagan niadtong Agosto 5, 1961— eksaktong duha ka bulan human pag-abot sa unang upat ka Santos sa Ulahing mga Adlaw nga mga misyonaryo sa Manila aron sa pagsugod sa buhat sa pagsangyaw.

Usa ka oppointment uban ni Sister Wilcken natakda diha sa hotel diin siya nag-istar, aron masayod pa og dugang mahitungod kaniya. Atol sa miting, si Sister Wilcken, 83 anyos na, mipadayon sa pagpakigbahin sa usa ka maanindot ug makapadasig nga istorya, inabagan sa iyang anak nga babaye si Cathy Ford, usa usab ka miyembro sa Simbahan.

Si Mildred Coloma Rivera natawo niadtong Abril 17, 1941, ug nagdako sa rural nga San Manuel, Tarlac. Nagagikan siya sa dako nga pamilya, uban sa iyang mga ginikanan nga nalambigit sa makuti nga trabaho sa uma. “Usa kami ka kabos nga pamilya,” mihinumdom siya, “ug nanglimbasog kami sa ekonomiya, mao nga nangita ko og mga oportunidad aron mokita.”

Niadtong 1961, si Mildred nagtrabaho sa usa ka pamilyang Amerikano diha sa Clark Air Base sa Pampanga. Ang pamilyang Apel mga Santos sa Ulahing mga Adlaw ug si Mildred naintriga sa pagtuo sa pamilya. Misulti siya sa pangulo sa pamilya, si Charles Apel, nga siya gustong moadto sa Simbahan uban kanila sa Dominggo, kon diin si Brother Apel positibong mitubag.

Nagustohan ni Mildred unsay iyang nakita ug nabati. “Nasayod dayon ko nga ang Simbahan mao ang tinuod,” pamatuod pa niya, “ug ako nahimong interesado sa Simbahan tungod sa pagkamahigalaon sa pamilyang Apel ug usab sa mga miyembro.” Siya nagtudlo sa mga baroganan sa ebanghelyo pinaagi sa mga miyembro sa gamayng yunit sa Simbahan sa Clark, tungod kaya wala pay mga misyonaryo niana nga area.

Si Mildred sa wala madugay nakabaton og pagpamatuod. “Gusto ko nga mabunyagan,” mahinamon siya nga misulti sa mga Apel. Ang Simbahan bag-o pa kaayo sa Pilipinas nga ang pioneer nga mga misyonaryo—kinsa nahatagan og awtoridad sa pagbunyag sa mga kinabig—layo ra kaayo sa Manila aron makahibalo mahitungod ni Mildred ug sa iyang gihangyo. Sa ingon, ang mga lider sa yunit sa Clark kinahanglan makakuha og espisyal nga pagtugot gikan sa punoang buhatan sa Simbahan sa Siyudad sa Salt Lake sa pagbunyag kaniya.

Mapailobon nga nagpaabot si Mildred ug nag-ampo alang sa positibo nga tubag. Ang iyang mga pag-ampo gitubag sa dihang ang pagtugot gihatag sa pagpahigayon og tulumanon sa bunyag, nga nahitabo niadtong Agosto 5, 1961. Nianang adlawa, si Mildred Coloma Rivera nabunyagan ni Brother Paul Sharp, nahimong usa sa labing unang mga miyembro sa Simbahan sa Pilipinas.

“Nalipay kaayo ko nga padayon nakong gipasalamatan ang Diyos tungod kay nabunyagan ko,” malipayong nahinumdom si Mildred. Si Sister Rivera nahimong usa sa pioneer nga mga miyembro sa Angeles Branch ug milambo sa iyang pagpamatuod sa gipahiuli nga ebanghelyo samtang siya nag-ampo, nagbasa sa mga kasulatan, ug nagtambong sa mga tulumanon sa Simbahan.

Pagka-1968, nakatrabaho siya og laing trabaho sa Clark Air Base sa dihang nakahimamat siya og laing Amirikano nga opisyal sa militar ug Santos sa Ulahing mga Adlaw nga si Willis Lane Wilcken. “Sa dihang nakiglamano siya nako, dili niya kini buhian,” pasiaw nga mihinumdom ni Mildred. Si Brohter Wilcken mitanyag og kaminyoon ngadto kaniya ug ang duha naminyo diha sa seremonya sa Simbahan sa Clark pagka-Nobiyembre sa samang tuig.

Pipila ka bulan human sa ilang kaminyoon, si Brother ug Sister Wilcken mibiya padulong sa Estados Unidos. Ang magtiayon sa kaulahian naselyo didto sa Idaho Falls Temple ug mipadako sa pamilya nga pito ang anak. Si Brother Wilcken nagdumala og negosyo sa mahalon nga sakyanan hangtod sa iyang pagkamatay niadtong 2012.

Si Sister Wilcken mipadako sa tanan niyang anak nga mga lalaki ug anak nga mga babaye sa Simbahan, usahay manghinaot nga kadtong kinsa moserbisyo og mga misyon madistino ngadto sa iyang yutang natawhan. Samtang ang iyang gipangandoy wala pa matuman dayon, nalipay siya sa dihang ang iyang usa ka anak nga lalaki gitawag sa pagserbisyo sa Hawaii, nga adunay dakong populasyon sa Pilipino og kagikan, ug gani mas malipayon sa dihang ang iyang kamanghoran ang anak nga lalaki ug duha sa iyang apo nadistino sa Pilipinas. Gani, laing apo ang bag-o lang nga nakakompleto og mission sa Alberta, Canada nga Tagalog ang pinulongan.

Gikan sa sayo nga panahon sa iyang pagkamiyembro, si Sister Mildred Rivera Wilcken nagpadayon nga nagmalig-on sa iyang pagpamatuod sa ebanghelyo ni Jesukristo. “Ang bugtong butang nga akong ikahatag gayod kaninyo mao ang akong pagpamatuod,” nagpamatuod siya nga kahilakon. “Ang Simbahan tinuod, ug hangtod sa kahangtoran nakong ibahandi kadtong mga panahon sa dihang akong nakaplagan ang mahitungod sa Simbahan ug nakapalambo sa akong pagpamatuod.”