Te ’itera’a i te tāmarūra’a i roto i tō tātou tā’amura’a fafaura’a ’e te Atua

’Ei tuahine tei ’ore ā i fa’aipoipohia, teie tā’amura’a o te fafaura’a here ’e te aroha ’e tō’u Metua i te ao ra ’e te Fa’aora, tē rave nei i te hō’ē vāhi pūai i roto i tō’u orara’a ’e ’ua riro na ’e ’o tō’u ïa puna rahi a’e o te tāmarūra’a ’e te hau. Noa atu te huru o tō tātou ti’ara’a fa’aipoipo ’aore rā tō tātou orara’a, tē hina’aro nei te Fatu ’ia ’āpipiti atu tātou iāna ma te mana rahi—’ia riro ’ei « hō’ē » (3 Nephi 19:23) ’e ’ōna i roto i « te mau mea ato’a tā [tātou] e rave ra » (Alama 37:37). ’Ia ti’aoro ana’e tātou i te Fatu nō te pāturu ia tātou, ’e « ’ia tu’uhia te aroha ’o [tō tātou] ’ā’au i ni’a [iāna] ’e a muri noa atu » (Alama 37:36 ; reta tei fa’ahuru-’ē-hia), e nehenehe tō tātou orara’a e fa’a’īhia i teie natira’a o te fafaura’a nehenehe.

Māoti tō tātou Fa’aora ’o Iesu Mesia, e nehenehe tātou e fa’ari’i i te tāmarūra’a mai roto i te fa’arurura’a tātou ana’e i te mau tāmatara’a o te orara’a.

E mau māna’ona’ora’a ’e e mau hina’aro tō tātou pā’āto’a, i roto i te reira tātou e ’ite ai i te ’ōtahira’a. Tē ha’ape’ape’a nei ’oia i tō tātou mau māna’ona’ora’a, noa atu te huru o te reira. ’Ua ’ite au i te hina’aro nō tāna tauturu ’a ha’ape’ape’a ai au nō te mau mea e au ra ’aita e faufa’a mai teie hoa tā’u e pi’i nei « te mau tāta’ira’a fare ». ’Aita ana’e e hoa fa’aipoipo nō te ’āparau, e nehenehe vau ana’e e ha’ape’ape’a nō te tāmuta maita’i, te mau ha’amāu’ara’a tano, te vaiihora’a i tā’u vāhi ’ohipa nō te ho’i i te fare, ’e ’ia riro ’ei ta’ata ti’a’au maita’i nō tā’u faufa’a moni ’e nō tō’u fare. ’Ua riro ’ei upo’oti’ara’a i te tahi atu mahana nō te tāta’ira’a i tō’u ’ōpani fare vaira’a pere’o’o ! ’Ua fa’aro’o te Fatu i tō’u māna’ona’ora’a. ’E noa atu ā te na’ina’i i roto i te fa’anahora’a rahi o te mau mea, ’ua pāhono mai ’oia i tā’u pure. Nāhea ? Māoti te hō’ē ta’ata tupu maita’i, te tauturu a te Vārua, ’e te hō’ē video i ni’a ia YouTube, ’ua ha’amaita’ihia vau ’ia ’ite e aha te mea e rave nō te tātā’i i te ’ōpani.

Mai te mea e ha’apa’o maita’i te Fatu i te mau hina’aro ha’iha’i, ’a feruri na i tōna hina’aro ’ia ha’amaita’i ’e ’ia pāturu ia tātou i roto i te mau fifi teimaha o te ’ā’au ’e o te vaerua, e ’ere ho’i i te mea iti : te hāmani-’ino-ra’a, te hia’ai māha ’ore, te mau tā’amura’a ’utuāfare fifi, te mo’era’a ’e te ’ino’ino, te mau tāmatara’a tāmau i te pae ferurira’a ’e i te pae tino, te pe’ape’a i te pae moni, te mana’ona’ora’a tāmau ’ei metua, te māna’ona’ora’a tāmau i te aupurura’a i te hō’ē metua, te mau fifi i roto i te fa’aro’o o te ta’ata hō’ē, hō’ē tamari’i ’aore rā hō’ē hoa fa’aipoipo tei mā’iti ’eiaha e ’āmui mai i roto i te ’evanelia.

I roto i te mau teiahara’a ’e te mau paruparu o te orara’a, ’ua turu’i rahi au ’e ’ua tāpe’a maita’i noa vau i ni’a i tō’u tā’amura’a o te fafaura’a ’e te Atua. ’A ti’aturi ai au i tāna aupurura’a here ’e ’a tāmata ai au mai tā’u e nehenene i te ha’amo’a i tō’u orara’a nōna, ’ua hōpoi mai ’oia iā’u i te tāmarura’a nā roto i tōna mana autahu’ara’a ’e ’ua riro ’oia ’ei ta’ata hōro’a nō’u i roto i tō’u mau hina’aro pae vārua ’e pae tino. ’Ua hōro’a mai ’oia i te tāmarūra’a o te mata’u, te tāmarūra’a o te mau pārurura’a ’ore, te tāmarūra’a o te te’ote’o, te tāmarūra’a o te hara, te tāmarūra’a o te vai-’ōtahi-ra’a, te tāmarūra’a o te oto.

’Ua ha’api’i te peresideni Nelson ma te māramarama ’e te ha’apāpūra’a ē, « te tao’a hōro’a nō te ha’apa’ora’a i te mau fafaura’a ’e te Atua ’o te mana ïa o te ra’i—te mana ’o te ha’apūai ia tātou nō te fa’aruru maita’i a’e i tō tātou mau tāmatara’a, mau fa’ahemara’a, ’e mau māuiui o te ’ā’au ».

Māoti Iesu Mesia, e nehenehe tātou e fa’ari’i i te tāmarūra’a nō te fa’arurura’a tātou ana’e i te mau tāmatara’a o te orara’a.

Te mau tuahine « i ni’a i te mau motu o te moana »

’A feruri ai au i te mau ha’amaita’ira’a o te tā’atira’a o te fafaura’a tā tātou i rave ’e te Atua, ’ua feruri au i tā’u tonora’a e haere i te vaefenua nō Asia Apato’erau.

Ua fana’o vau i te rāve’a ’ia tere atu i te mau motu na’ina’i nō Chuuk i Micronesia, fātata 2 400 km i te pae apato’a hiti’a o te rā nō Tāpone. E piti ’o te mau tuahine i Weno, Chuuk, tei hōro’a i tō rāua orara’a nō te aupuru i te mau tamari’i tei fa’aru’ehia e tō rāua mau metua. ’Ua feruri teie nā tuahine e mea faufa’a roa ’ia aupuru i teie mau tamari’i i roto i te ’evanelia. Hō’ē o teie nā tuahine e vahine ’ōtahi ïa ’e tē ’ohipa tāmau nei ’ei tauturu nō te ha’api’ira’a.

’Ua fa’a’ite atu vau ia rāua i te parau poro’i a te peresideni Nelson i te mau tuahine o te ’Ēkālesia, ’oia ho’i, ’outou te mau tuahine, ’ua herehia ’outou, e mea tītauhia ’outou ’e e mea faufa’a ’outou.

’Ua ta’i te tuahine nehenehe ’ōtahi ’o tē aupuru nei i tāna mau tamāhine ’e mau tamaiti fēti’i, ’e ’ua parau mai ē, ’aita roa ’oia i ’ite na e mea faufa’a rahi ’oia i teie mau tau i ma’iri nei ; ’ua ’ite ra iāna iho ’ua ha’amo’ehia ’oia. ’Ua fa’a’ite pāpū rā oia ē, ’ua putapū ’oia i te here ’e te ’ite-maita’i-ra’a o te Atua iāna i roto i te mau parau a te peropheta ē, e mea « faufa’a rahi » mau ’oia, ’e ’ua ’ite ’oia e parau mau te reira. ’Ua putapū ’oia i te here fa’aora ’o te Atua ; ’ua ’ite ’oia i te tāmarūra’a.

’Ua parau te Fatu, « ’aita ’outou i ’ite ē, i hāmani au, ’o te Fatu tō ’outou Atua, i te ta’ata ato’a, ’e ’ua ha’amana’o ho’i au i tei ni’a i te mau fenua moana ra ? » (2 Nephi 29:7).

’Ua ’ite-maita’i-hia teie mau tuahine e tō rātou Metua i te Ao ra ’e te Fa’aora. ’Aita rātou i vai ’ōtahi noa. ’Aita ato’a ’outou ’e ’o vau nei i roto i tō tātou mau tāmatara’a ’e mau tītaura’a. ’Ua tono mai te Fatu iā’u fātata e 13 700 km nā ni’a i te manureva, te pere’o’o auahi, te pere’o’o ’e te pahī nō te hōpoi atu i te here ’e te tāmarūra’a o te Atua i « te ta’ata » nō te mau motu moana. ’E nō reira, e ’itehia mai tātou e ’āna, ’outou ’e o vau nei, i ni’a i tō tātou iho mau motu i reira tātou e putapū ai te ’ōtahira’a i roto i te mau māna’ona’ora’a ’e te mau teimahara’a ’o tā tātou e amo nei i roto i tō tātou ’ā’au. Tei reira ’oia ’e ’ua ineine nō te ha’amaita’i, nō te arata’i ’e nō te tāmāhanahana ia tātou.

’Ua fa’ata’a mai te peresideni Gordon B. Hinckley (1910–2008) i te hō’ē taime i te ’ohipa i tupu nō te hō’ē vahine tei ta’a ’āpī, e « metua vahine nō e hitu tamari’i mai te 7 ē tae atu i te 16 matahiti i terā taime. ’Ua parau ’oia ē, i te hō’ē pō ’ua haere atu ’oia i te tahi a’e pae o te purūmu nō te ’āfa’i atu i te hō’ē ’ohipa nā te hō’ē ta’ata tupu. » Teie tāna mau parau mai tā peresideni Gordon e fa’aha’amana’o ra :

« ’A huri ai au nō te ho’i atu i tō’u fare, ’ua nehenehe iā’u e ’ite atu i tō’u fare ’ia māramarama. ’Ua nehenehe iā’u e fa’aro’o i te mau ta’ira’a reo o tā’u mau tamari’i, ’a fa’aru’e ai au i te fare nō te tahi tau minuti noa nā mua atu. Tē parau ra rātou : ‘Māmā, e aha tā tātou mā’a i teie pō ?’ ‘E nehenehe ānei ’oe e ’āfa’i iā’u i te fare buka ?’ ‘E ti’a iā’u e haere e ti’i i te papie nō te pia i teie pō.’ Ma te rohirohi ’e te paruparu, ’ua hi’o atu vau i teie fare ’e ’ua ’ite atu vau i te mori e ’ama ra i roto i te piha tāta’itahi. ’Ua feruri au i teie mau tamari’i ato’a i te fare e tīa’i mai ra ’ia pāhono vau i tō rātou mau hina’aro. E au ra iā’u ’ua teimaha roa atu tā’u hōpoi’a ’o tā’u e ’ore e nehenehe e amo.

« Tē ha’amana’o ra vau i te hi’ora’a i te ra’i ma te ta’i, ’e ’ua parau vau, ‘E te Metua ē, e’ita e oti noa iā’u ’ia rave i teie pō. ’Ua rohirohi roa vau. E’ita e roa’a iā’u ’ia fa’aruru atu. E’ita tā’u e nehenehe e ho’i atu i te fare ’e ’ia ha’apa’o vau ana’e i teie mau tamari’i ato’a. E nehenehe ānei au e haere noa atu ia ’oe ra ’e ’ia fa’aea ia ’oe ra nō te hō’ē noa a’e pō ?’

« ’Aita vau i fa’aro’o mau i te mau parau o te pāhonora’a, ’ua fa’aro’o rā vau i te reira i roto i tō’u ferurira’a. Teie te pāhonora’a : ‘’Aita, e ’aiū, e’ita tā ’oe e nehenehe e haere mai iā’u ra i teienei […] E nehenehe rā vau e haere mai ia ’oe ra’ ».

« E nehenehe au e haere mai ia ’oe ra. » ’Ua haere atu ’oia iāna ra, ’e e haere mai ’oia ia ’outou ra ’e iā’u, mai tā te Fa’aora i haere atu i te vahine i te ’āpo’o pape ra i reira te vahine i te ’ohipara’a ’e i te ’ohipara’a i tōna orara’a tā’āto’a (hi’o Ioane 4:3–42). ’Ua fa’aitoito te Fa’aora iāna, ’ua ha’api’i iāna, ’ua fa’a’ite iāna i tōna ti’ara’a Mesia, ’e ’ua here iāna i te taime ’aita paha ’oia i here iāna iho. I te vahine i te ’āpo’o pape, i te metua vahine ’āpī nō e hitu tamari’i, ia ’outou ’e iā’u nei, ’ua ineine Iesu Mesia ’ia ’āfa’i mai i te tāmarūra’a. Tē fa’a’ite pāpū nei au ē, e nehenehe tātou e fa’ari’i i te tāmarūra’a māoti tā tātou tā’amura’a fafaura’a ’e te hō’ē Atua here.

Penei a’e mai iā’u nei, ’ua tāparu ’outou i te tauturu ’ia ’ore ’outou ’ia vaiiho-’ōtahi-hia i roto i te tahi mau pu’e tau fifi roa a’e o tō ’outou orara’a i te pae ’āehuehu, i te pae tino ’e i te pae vārua. ’Ua vaiiho mai teie mau pu’e tau fifi roa a’e o te tupura’a i te mea tā’u ’o tā’u e pi’i nei « te mau tāpa’o ’iri mi’omi’o pae vārua » i ni’a i te vaerua. Tē fa’a’ite pāpū nei rā vau ē, ’ua amo ’oia iā’u ’e e amo ’oia ia ’outou. ’Ua nana’o ’oia ia ’outou i ni’a i tōna ’apu rima (hi’o Isaia 49:16 ; 1 Nephi 21:16). Tei reira ’oia ’a ’imi ai ’outou « ’ia vai parauti’a i roto i te pōuri ». ’Aita ’oia i fa’aru’e iā’u ’e e’ita roa ’oia e fa’aru’e ia ’outou. ’E ’ua here au iāna nō te reira ē a muri noa atu.

E te mau tuahine ’e te mau taea’e here ē, ’ua ’itehia mai te puna nō te here mau, te fa’aorara’a, te ’oa’oa ’e te tāmarūra’a i roto ia Iesu Mesia. Tē fa’a’ite pāpū nei au ē, ’o Iesu Mesia te tāmarūra’a.

Tē hina’aro nei ’oia e aupuru ia ’outou, e ha’amaita’i ia ’outou ’e e fa’a’ore i tā ’outou hapa. ’Ua haere mai ’oia nō teie ’ōpuara’a pāpū maita’i, nō te hōpoi mai ia ’outou te tāmarūra’a e tītau-mau-hia ’o tā ’outou e ’imi nei. ’O ’oia te Tara’ehara o te ao nei, ’e tē fa’a’ite pāpū nei au ē, tē ora nei ’oia ’e tē here nei ’oia ia ’outou.