Gibag-o nga Giya sa Alang sa Kalig-on sa mga Kabatan-onan

Ang Simbahan mibag-o sa giya nga alang sa kabatan-onan nga Santos sa Ulahing mga Adlaw. Ang Alang sa Kalig-on sa mga Kabatan-onan: Usa ka Giya sa Paghimo og mga Pagpili [For the Strength of Youth: A Guide for Making Choices] nagdapit sa kabatan-onan sa paggamit sa ilang kabubut-on ug pagtinguha og inspirasyon sa pagsunod sa mga sumbanan sa ebanghelyo.

“Ang labing maayo nga giya nga posibleng inyong maangkon alang sa paghimo og mga pagpili mao si Jesukristo. Si Jesukristo mao ang kalig-on sa kabatan-onan,” gitudlo ni Elder Dieter F. Uchtdorf sa Korum sa Napulog Duha ka Apostoles sa Sabado sa buntag nga sesyon sa kinatibuk-ang komperensiya. “Ang katuyoan sa Alang sa Kalig-on sa mga Kabatan-onan mao nga kamo magpunting ngadto Kaniya. Kini nagtudlo kaninyo sa mahangtoron nga mga kamatuoran sa Iyang gipahiuli nga ebanghelyo—mga kamatuoran mahitungod sa kon si kinsa kamo, kinsa Siya, ug unsa ang inyong mahimo uban sa Iyang kalig-on” (“Si Jesukristo Mao ang Kalig-on sa Kabatan-onan,” Liahona, Nob. 2022, 10–11).

Ang kabatan-onan giawhag sa paggamit sa mga baroganan nga anaa diha sa giya aron sa paghimo og matarong nga mga pagpili sa tanang aspeto sa ilang kinabuhi. Ang mga ginikanan, mga lider, ug kabatan-onan mahimong magtuon ug mopaambit sa giya diha sa panimalay, sa mga miting sa Dominggo, ug sa mga kalihokan, lakip sa mga pagkamping ug mga komperensiya sa kabatan-onan. Ang mga lider sa Young Men ug Young Women mahimong mopasabot kanunay sa mga baroganan nga makita diha sa giya. Kadto nga mga baroganan mahimo usab nga mao ang tutokan sa tinuig nga mga standard night alang sa kabatan-onan ug sa ilang mga ginikanan.

Ang bag-ong giya nga digital anaa sa 50 ka pinulongan sa seksiyon sa Kabatan-onan sa Gospel Library ug sa youth.ChurchofJesusChrist.org. Ang giprinta nga mga kopya sa dili madugay ipadala ngadto sa mga ward ug mga branch sa tibuok kalibotan.