Ang mga Lider sa Simbahan Nangalagad sa Daghang Nasod

Ang mga lider sa Simbahan nagpadayon sa ilang tibuok kalibotan nga pangalagad sa milabay nga unom ka bulan. Ania ang pipila sa importanting mga bahin sa ilang daghan nga kalihokan sukad sa miaging kinatibuk-ang komperensiya.

Si Presidente Oaks Namalandong sa Impluwesya sa mga Babaye

Sa usa ka bidyo sa Simbahan nga gipagawas niadtong Septyembre, si Presidente Dallin H. Oaks, Unang Magtatambag sa Unang Kapangulohan, naghisgot mahitungod sa impluwensya sa iyang inahan ug lola sa pagtabang kaniya nga makapalambo og pagpamatuod ug hugot nga pagtuo sa Ginoo. Ang impluwensya sa mga babaye sa iyang kinabuhi nagpadayon sa iyang asawa, nga si Sister June Oaks, ug human sa iyang kamatayon, uban sa iyang asawa, nga si Sister Kristen Oaks.

“Ang labing importante nga mga magtutudlo nako bahin sa doktrina sa Simbahan ug mga responsibilidad sa pagserbsiyo ug sa pamilya—nga adunay samang impluwensya sa mga propeta sa Simbahan—mao ang mga babaye,” miingon si Presidente Oaks.

Si Elder Uchtdorf Namulong sa mga Refugee

Si Elder Dieter F. Uchtdorf sa Korum sa Napulog Duha ka Apostoles miadto sa Poland niadtong Abril. Siya midumala sa usa ka debosyonal alang sa Ukrainian nga mga refugee kinsa nakakita og temporaryong kadangpan didto.

Sa pagbisita, si Elder Uchtdorf, kinsa usa ka refugee sa sayong bahin sa iyang kinabuhi, miingon nga ang iyang kasingkasing napuno sa “hilabihan nga kasubo tungod sa pag-antos” sa mga Santos sa Ulahing mga Adlaw ug sa uban sa naguba nga mga nasod tungod sa gubat apan usab uban sa pasalamat.

“Kini nga mga indibidwal ug mga pamilya milig-on ug mibayaw namo uban sa ilang kaayo, pagsalig, ug hugot nga pagtuo diha sa ug alang sa Manluluwas ug sa Iyang balaan nga mga katuyoan,” siya miingon. “Si Harriet ug ako naglaom nga makapalig-on ug makahupay kanila, apan sila nagdala og langitnong kahayag, paglaom, ug kahupayan sa among kasingkasing.”

Si Elder Bednar Namulong ngadto sa National Press Club sa Washington, D.C.

Si Elder David A. Bednar sa Korum sa Napulog Duha ka Apostoles namulong sa National Press Club niadtong Mayo, nga nagdetalye bahin sa kon unsa ug sa ngano kabahin sa tibuok kalibotan nga makitawhanon, welfare, edukasyon, templo, misyonaryo, ug kasaysayan sa kagikan nga mga inisyatibo sa Simbahan ni Jesukristo.

“Ang sukaranan nga katuyoan sa Ang Simbahan ni Jesukristo sa mga Santos sa Ulahing mga Adlaw mao ang pagtabang sa mga tawo nga makat-on mahitungod sa kinaiya ug mga hiyas sa Dios, sa paghigugma sa Dios, sa pagkahimong mga disipulo sa Iyang Anak, nga si Jesukristo, ug sa paghigugma ug sa pagserbisyo sa atong mga kaigsoonan,” miingon si Elder Bednar.

Ang Kinatibuk-ang mga Presidente sa Relief Society ug Primary Mibisita sa Habagatang Amerika

Si Presidente Camille N. Johnson, Kinatibuk-ang Presidente sa Relief Society, ug si Presidente Susan H. Porter, Kinatibuk-ang Presidente sa Primary, nakigkita sa mga lider sa sibiko ug sa mga miyembro sa Simbahan sa Argentina, Chile, Uruguay, ug Paraguay atol sa 10 ka adlaw nga pagbisita alang sa pagpangalagad ug pagtabang.

Sila nakigkita sa mga organisasyon sa gobyerno nga motabang sa mga babaye nga nag-atubang og talandugon nga mga sitwasyon didto sa Paraguay ug sa Argentina.

“Ang among Simbahan naglaom sa pagpakigtambayayong kaninyo sa pagpalambo sa mga oportunidad alang sa edukasyon ug pagbarog pinaagi sa kinaugalingong paningkamot alang sa mga babaye,” miingon si Presidente Johnson.

Agig dugang sa tabang sa gobyerno, sila si Presidente Johnson ug Porter nangalagad usab sa mga miyembro sa Simbahan. Sila mipahigayon og mga miting alang sa batan-ong mga ginikanan, usa ka debosyonal alang sa single nga mga babaye, inter-aksiyon [interactive] nga mga miting alang sa mga pamilya nga adunay mga anak, ug pagbansay sa mga lider sa kongregasyon.