Koroboki aika tabu: Ana Taeka te Atua

Koroboki aika a tabu bon booki aika a koreaki bon ti irouia burabeti. Koroboki aika a tabu a kaota kakoauaan Iesu Kristo ao n reireia Ana euangkerio. Koroboki aika a tabu aika a kariaiakaki n te Ekaretia bon te Baibara (are iai inanona te O Tetemanti ao te Nu Tetemanti), Ana boki Moomon, Reirei ao Berita aika Tabu, ao te Bwaeao ae Bati Bona.

Te O Tetemanti

Te O Tetemanti bon te rekooti n aron waakin te Atua ma Ana aomata ni berita n taai ake ngkoa. Iai inanona aia reirei burabeti n aron Mote, Iotua, Itaia, Ieremia, ao Taniera. E ngae ngke e koreaki bubua ririki n nako imwaain bungiakin Iesu Kristo, a mwaiti burabeti n te O Tetemanti ae a korea Rongorongona.

Te Nu Tetemanti

Te Nu Tetemanti e koreaki iai bungiakin, maiuna n te maiu aei, ana reirei, ao Ana Mwakuri ni Kamaiu Iesu Kristo. Iai naba inanona aia reirei Ana Abotoro Kristo ao tabeman taan iriiria. Te Nu Tetementi e buokiira ni mataata bwa ti na kangaa ni maiuakina Ana euangkerio Iesu Kristo ngkai.

Ana Boki Moomon: Kakoauan Taekan Iesu Kristo

Ana Boki Moomon bon te rekooti iaoia tabeman aomata ake a maeka i Amerika ngkoa. Iai inanon aia reirei burabeti, ao oin te kantaninga iai bwa e na kairoroia aomata ni kabane bwa Iesu bon te Kristo. Te Burabeti Iotebwa Timiti e raira ana Boki Moomon man bwaatua ni kora man ana bwaintangira ao mwaakan te Atua.

Reirei ao Berita aika Tabu

Reirei ao Berita aika Tabu iai inanona kaotioti ake e anganaki Iotebwa Timiti ao tabeman riki burabeti ni boong aikai. Te kaotioti e kabwarabwara bwa e kanga ni kateaki Ana Ekaretia Kristo. Iai naba inanona reirein te euangkerio aika a kakawaki iaon te nakoanibonga, otenanti n te euangkerio, ao tera ae e riki imwiin te maiu aei.

Bwaeao ae Bati Bona

Te Bwaeao ae Bati Bona iai inanona ana boki Mote ao Aberaam, ana kakoaua Iotebwa Timiti, ao Taekan te Onimaki n te Ekaretia. Iai naba inanona Iotebwa Timiti—Mataio, mwakoro iaon ana rairairi Iotebwa Timiti iaon te Nu Tetemanti.

Kamatebwaian Booki aika Tabu

Burabeti a tia n reireiniiera bwa tina kamatebwai ni koroboki aika a tabu ni katoa bong. Ni karaoakina e buokiira ni kakorakora ara onimaki ao n roko ni kaniira riki nakon Tamara are i Karawa ao Iesu Kristo. Ngkai ti kamatebwai koroboki aika a tabu ma te tataromwaaka, te Tamnei ae Raoiroi e na buokiira n atai kaekaan ara titiraki.

Burabeti ni Boong Aikai

Ngkana a taetae burabeti ao abotoro n taai aikai ni mwaakan te Tamnei ae Raoiroi, aia taeka bon aekan koroboki aika a tabu. Te katooto teuana n aron aio bon te maungatabu ni kabuta. Ti kona ni kamatebwai n reirei man te maungatabu man kanoan Meei ao Nobembwa n te beeba ae te Riaona.