Karekea Te Rikirake

E a mwaiti te ririki n nako imwiin maten kainabau, ae Jareld. E waekoa rokon te kaentia ao n rangi ni korakora, ao inanon tenua te namakaina ao e a mate. Ngkai e roko uringana ngkai I mwakuri inanon au onaroka mai bukin au auti.

Ngkai I kaewea te aroka nakon te boora teuana, e roko irou te iango. Imwaain ae I karaoa te kaewewe, e bon nakorakoi te aroka. E bon mena n te boora are e a kaman mena inanona, ma e bon aki rikirake. I ataia bwa ngkana I aki kaewea n te tai teuana, e na bon riki ae e na aki uee ao tao n toki rikirakena. E na bon aki kona ni karaoa ae te kabenea n tamaroa.

Ngaia are, I a iangoia n angana ana tai n rikirake man kaeweana nakon te boora ae bubura. Te boora ae aki rangi ni bubura—teuana ae uoua te inti rababan buburana. Ngkana I anganna ae e rangi ni mwawawa, e kona n onrake n te ran ao ni mate man mkan wakana.

I kantaningaia bwa te aroka e na waeremwe maiuna ngkai e kataia n rinanon te bitaki. E tara n ae kanga e maiuraoi, taabo aika a mwawawa n te boora e nakoraoi ma ngaia. E aki ataia ae te bitaki e na buokia ni karikirakea. I kainanoia n ribanaia, n angana te oota ae tau, te ran, ao kanana riki ibukin kamaiuana are e kainanoia n tain te bitaki aio. I ataia bwa, n tokina, e na rikirake ao ni manga uee.

Ni iangoan aron maiu ngkai te aine ae e a tia ni mate buu, I ataia ae ngai kanga aron te aroka. I a tia n rangi ni mwengaraoi. I a tia n rangi ni maiuraoi. Ma ngke e mate kainabau, I ongo ana wirikiriki te Tanmei ae I a rin n te mwakoro ae boou n te rikirake. Iai bwaai ae I kainanoia n reiakin ao ni karaoi n te maiu aei.

Inanon uoua te ririki n nako, iai itiman mwaane n ara uoote aika a tia naba ni mate. I a waaki n tuangiia raou n aine aika a mate buuia bwa ti na bootiira, ni marooro, ni kakawari, ni beku ibukiia tabeman—bwa ti aonga ngaira n tatabemaniira ni kona n namakina uarereken te maroaa. Akea mai ibuakora ae e a tia n rineia bwa e na “kaeweaki” Ma ngkai I rinanon te bitaki n te maiu aei n akean kainabau, I kunea bwa I kona ni katauraoa te boutoka nakoia tabeman ake a kaitara ma te kakaewenako ae aiaron aei. I kunea naba bwa e bati te tai ae ko kabanea ma natim ao tibum ao ni kauringiia bwa rinanon Ana Mwakuri ni Kamaiu Iesu Kristo, n te maiu ae e na roko a na manga bane ni ikotaki ara utu.

Na bon aki kantaninga te rikirake are e na roko irou ibukin buan kainabau. Ma Tamara are i Karawa e rinako ao ni “kaeweai,” n anganai te tai n rikirake man kaeweakiu nakon te boora ae e bubura—te kakaewenako ae boou are e katauraoa te tai n rikirake.

I bon ururinga naba Jerold ni katoa bong. N ririki ake imwiina, I teimatoa ni korakai ngkai I kataia n rinanon te bitaki ngkai akea ngaia irarikiu. Ma I ataia bwa te Uea E na nabeai iaon kawaiu. N te taina, ao ma te onimaki Irouna, Na rikirake ao ni bwebwerake teuana riki te tai.