Dahme kin Wiawi nan Tuhpene en Rahnsarawi kan?

Towe kan en ehu ward de branch kin tuhpene Rahn Sarawi kan ong kamadipw sarawi. (Koaros me sohte iang atail mwomwodiso pil kak iang patedo.) Kamadipw sarawi kin kohieng towe kan nan tuhpene wet pwe en sewese irail en tamataman Sises Krais (kilang Epreil 2022 Gospel Basics article ong ekei ren kaweid kan duwen kamadipw sarawi). Tuhpene wet kin iangahki kapakap kan, koul, oh padahk kan me kin kohsang rehn emen tohn mwomwohdisoh duwen rongamwahu en Sises Krais.

Mwurin tuhpene en kamadipw sarawi, towe kan kin kohpeseng nan arail class oh pil iangahki quorum kan. Seri me sounpwong 18 lel sounpar 11 kin mih nan Praimeri. Ni tep oh kesiluh en Rahn Sarawi kan en ehu sounpwong, koaros towe kan kin patehng Sunday Sukuhl. Ni keriau oh kapahieu en Rahn Sarawi kan, irail kin iangi Relief Society, Young Women, de tuhpene kan en quorum en prihstuhd.

Kapakap akan nan tuhpene en Mwomwodiso kan kin kohsang rehn emen towe kan. Kapakap pwukat kin mengei oh kin kohsang rehn Ngehn Sarawio. Towe kan kin kapakap dodongki lokaia me pahn kasalehda arail limpok oh wahu ong Sahm Nanleng. Met me iangahki dodohngki wahu Thee, Thy, Thine, oh Thou ansou me irail wie kapakap ong Ih.

Emen tohn bishoprik de branch presidensi kin peki rehn towe kan en wia padahk nan tuhpene en kamadipw sarawi kan. Padahk pwukat kin poahsonkihda duwen rongamwahu en Sises Krais. Irail akan me pahn kosoi kin dodohngki pwuhk sarawi kan oh mahsen en irail kaun akan en Mwomwodiso ni ansou me irail kin konopada arail padahk kan. Irail pil kin kadehdeki duwen kapai me kohsang rehn mehlelpen rongamwahu o nan arail mour.

Mwurin tuhpene en kamadipw sarawi, towe kan kin kasukuhlki duwen rongamwahu o ni pisetik nan arail kisin perehn class kan. Iren kasukuhl kan kak pidada duwen pwuhk sarawi kan, padahk kan sang kapokon lap akan, de ire teikan. Mendahte sounpadahko ah katanga iren kasukuhl wet, e sohte wia me ih kelehpw me pahn wie kosokosoi. Koaros towe kan nan perehu kak ehukipene arail madamadau kan duen me pidada oralap o.

Pak ehu nan ehu sounpwong, tuhpenehn kamadipw sarawi kin iangahki wia amw kadehde. E kin wiawi tepin Rahn Sarawi en sounpwong kan. Nan tuhpene wet, towe kan kak wia arail kadehde duwen Sises Krais oh Sapwelime rongamwahu o. En wia kadehde wewehki kehn kasalehda duwen rongamwahu mehlel o me kin kohsang rehn Ngehn Sarawio.

Towe kan kin kounapada tuhpenehn Rahn sarawi kan sang arail kin kapakapki,kasukuhlki pwuhk sarawi kan, oh warong en alehdi kamarain kan sang Ngehn Sarawiio. Ma komw kileledi en wia padahk de kasukuhlki ire ehu, kapakap oh medewe duwen ia mwomwen amw pahn kak padahngki duwen mehlel en rongamwahu o. Doadoahngki pwuhk sarawi kan. Kadehdeki duwen me mehlel o. Amw Kaun en Mwomwodiso kan kak sewesei komwi kounopada, ma mie anahnepe.