Kamadipw Sarawio: E Wia Ahl Ehu en Tamataman Sounkomouro

The Last Supper [Kamadipw en Komwurumwur], sang Simon Dewey

Ni pwohngo mwohn Ah ketin kalohpwuwalaho, Sises Krais ketin tuhwong Sapwellime Wahnpoaren kau ni Kamadipw en Komwurumwuro. Wasaho me E ketin ketikihong irail keieu en kamadipw sarawi. E ketin kawewehda me iei mwohmw wet me irail pahn tamatamanki Ih. Kamadipw sarawio iei e wia tiahk sarawi ehu ni ansou me kitail kin tungoale pilawa oh pihl pwehn tamataman Sapwellimen Krais Tomw. Pilawaho wia weliepen Kahlepe, oh pihlo wia weliepen Sapwellime nta,

Kitail kin tungoale kamadipw sarawio nan ehu ehu Rahn Sarawi kan ni ansou en ehupenehn sarawihn kamadipw sarawi. Kitail kin koulki melkahka ehu ni ansou me irail me kolokol prihsduhd kin pilitikipene pilawa kan ni pisetik.

Irail me kin kolokol prihsduhd kan me kin pilitikipeseng pilawaho kin kapakapki kapakap kesempwal ehu. Kapakap pwukat kin sansal nan Doctrine and Covenants 20:77, 79. Kapakapo kin katamankihong kitail dahme kitail inoukihongher Samatail Nanleng oh dahme E ketin inoukihong kitailehr.

Ekei irail kan me kin kolokol prihsduhd kin nehk kamadipw sarawio ong toweh kan en wardo de brancho. Ni ansou me kitail kin alehda kamadipw sarawio, kitail kin tamanda Sounkomouro oh Sapwellime tohnmetei ong kitail. Kitail pil kin pwurehng kataman en mehleliong en kolokol inou sarawih kan (inou kan) me kitail wiahdahr rehn Samatail Nanleng.

Kitail kin nenenla ni ansou me kapaiadahn kamadipw sarawi oh nehnepeseng en kamadiwp sarawi kin wiawi. Iei e wia ansou ehu me kitail kin medemedewe duwen Sapwellimen Sises Krais ieias, Sapwellime padahk kan, oh Sapwellime Tomwo. Kitail pil kin kak medemedewe duwen ia mwomwen atail pahn kak idawehn Sapwellime karasaras.