Ua Dab Tsi hauv lub Koom Txoos Kev Sib Ntsib Thaum Hnub Caiv?

Cov mej zeej ntawm ib pawg ntseeg los sis ceg ntseeg koom ua ke txhua Hnub Caiv hauv kev sib ntsib txais lub cim nco txog. (Cov uas tsis ntseeg li peb los peb kuj zoo siab tos txais lawv thiab.) Cov mej zeej txais lub cim nco txog hauv kev sib ntsib no kom pab lawv nco ntsoov txog Yexus Khetos (saib lub Plaub Hlis Ntuj 2022 zaj lus txog Txoj Moo Zoo tej Ntsiab Lus kom paub ntxiv txog lub cim nco txog). Txoj kev sib ntsib no los kuj muaj cov mej zeej thov Vajtswv, hu nkauj qhuas Vajtswv, thiab hais tej zaj lus txog Yexus Khetos txoj moo zoo.

Tom qab kev sib ntsib txais lub cim nco txog, cov mej zeej sib cais mus rau tej pawg thiab chav kawm. Cov me nyuam uas muaj 18 lub hlis mus txog 11 xyoos mus rau lub Koom Haum Me Nyuam Yaus. Hnub Sunday thib ib thiab thib peb txhua hli, tag nrho cov mej zeej mus rau Hnub Caiv Kev Kawm Vaj Lug Kub. Hnub Sunday thib ob thiab thib plaub, lawv koom lub Koom Haum Niam Tsev, lub Koom Haum Ntxhais Hluas, los sis kev sib ntsib rau tej pawg pov thawj hwj.

Cov mej zeej thov Vajtswv hauv lub Koom Txoos tej kev sib ntsib. Lawv thov raws li tus Vaj Ntsuj Plig Dawb Huv qhia lawv. Cov mej zeej siv tej lus uas qhia tias lawv hlub thiab hwm lawv Leej Txiv Saum Ntuj Ceeb Tsheej. Lawv hais lus qhuas Nws thaum lawv thov.

Ib tug hauv pawg npisov los sis ceg ntseeg pawg thawj tswj hwm thov kom cov mej zeej hais lus hauv kev sib ntsib txais lub cim nco txog. Tej zaj lus no hais txog Yexus Khetos txoj moo zoo. Cov neeg hais lus siv cov vaj lug kub thiab lub Koom Txoos cov thawj coj tej lus thaum lawv npaj lawv tej zaj lus hais. Lawv kuj ua tim khawv txog cov koob hmoov uas los ntawm kev ua raws li txoj moo zoo tej ntsiab cai hauv lawv lub neej.

Tom qab kev sib ntsib txais lub cim nco txog, cov mej zeej kawm txog txoj moo zoo hauv tej chav kawm me zog. Tej zaj lus qhia no yuav hais txog cov vaj lug kub, tej lus qhia los ntawm lub tuam rooj sab laj, los sis lwm yam. Txawm yog tus xib hwb yog tus coj zaj lus qhia no, yeej tsis yog nws qhuab ntuas xwb. Txhua tus hauv chav kawm muaj cai hais tias lawv xav li cas txog lub ntsiab ntawd.

Ib zaug txhua lub hlis, kev sib ntsib txais lub cim nco txog yog ib txoj kev sib ntsib ua tim khawv. Feem ntau yog thawj Hnub Caiv txhua hli. Nyob hauv kev sib ntsib no, cov mej zeej hais lus tim khawv txog Yexus Khetos thiab Nws txoj moo zoo. Kev ua tim khawv txhais tias yus tshaj tawm txog tej yam tseeb ntawm txoj moo zoo raws li tus Vaj Ntsuj Plig Dawb Huv qhia.

Cov mej zeej npaj rau Hnub Caiv tej kev sib ntsib thaum lawv thov Vajtswv, kawm cov vaj lug kub, thiab npaj txais tus Vaj Ntsuj Plig Dawb Huv tej kev tshoov siab. Yog tias lawv thov koj hais lus los sis qhia ib zaj lus, cia li thov Vajtswv xav seb koj yuav ua li cas kom qhia txoj moo zoo tej ntsiab cai. Siv cov vaj lug kub. Ua tim khawv txog qhov tseeb. Koj cov thawj coj ntawm lub Koom Txoos yuav pab koj npaj, yog koj xav tau.