Lub Cim Nco Txog: Ib txoj Kev Nco Txog tus Cawm Seej

Pluas Mov Kawg, los ntawm Simon Dewey

Ib hmo ua ntej Nws raug ntsia saum ntoo khaub lig, Yexus Khetos ntsib Nws cov Thwj Tim tim Pluas Mov Kawg. Nyob ntawd, Nws muab lub cim nco txog rau lawv thawj zaug. Nws piav hais tias yog ib txoj kev kom pab lawv nco txog Nws. Lub cim nco txog yog ib txoj kab ke uas peb txais cov mov mog thiab cov dej kom nco txog Khetos txoj Kev Theej Txhoj. Cov mov mog yog ib lub cim txog Khetos lub cev, thiab cov dej yog lub cim txog Nws cov ntshav.

Peb txais lub cim nco txog txhua hnub Sunday thaum koom kev sib ntsib txais lub cim nco txog. Peb hu ib zaj nkauj thaum cov uas tuav lub pov thawj hwj muab cov mov mog ntais ua tej daim me me.

Cov uas tuav lub pov thawj hwj uas tau muab cov mov mog ntais ua tej daim me me hais tej lus thov Vajtswv tshwj xeeb. Cov lus thov Vajtswv nyob hauv Lus Qhuab Qhia thiab Kev Khi Lus 20:77, 79. Cov lus thov Vajtswv pab peb nco txog tej uas peb cog lus rau Leej Txiv Saum Ntuj Ceeb Tsheej thiab tej uas Nws cog lus rau peb.

Lwm tus uas tuav lub pov thawj hwj muab lub cim nco txog rau cov mej zeej. Thaum peb txais lub cim nco txog, peb nco txog tus Cawm Seej thiab Nws txoj kev txi rau peb. Peb rov qab cog lus tias peb yuav ua raws li tej kev khi lus uas peb tau khi nrog Leej Txiv Saum Ntuj Ceeb Tsheej.

Peb nyob tswm seeb thaum foom koob hmoov rau thiab txais lub cim nco txog. Yog ib lub sij hawm rau peb nco txog Yexus Khetos lub neej, tej lub qhia, thiab txoj Kev Theej Txhoj. Peb kuj xav txog seb peb yuav ua li cas coj raws li Nws tus yam ntxwv.