Kristin M. Yee

Te Kauoman Kauntira n te Beretitentii ni Kabuta n te Bootaki n Aine

N te aonaaba ae e rikirake iai te maenako ao te kakaokoroaki, Titita Kristin M. Yee e a tia n noori bwainaoraki nakon kangaanga ake a rootaki iai te botanaomata rinanon ana euangkerio Iesu Kristo ao te Bootaki n Aine.

“Te Bootaki n Aine e katiteuanaira Irouna,” e taku. “N tabo nako ake I kawari n te aonaaba, I kakaiia tariu n te Bootaki n Aine, ao n te tai ae waekoa I namakina te tangiraki ao te kinaaki. Iai te bwai ae ti katiteuanaaki iai iroun Kristo ao n ara koaua Irouna.”

Titita Yee, are e a tia ni beku n te baba n tararua ni kabuta n te Moanrinan, e butimaea weteana ae boou bwa te Kauoman Kauntira n te Beretitentii ni Kabuta n te Bootaki n Aine ma te koaua are e aki mwakuri n ti ngaia.

“Te Uea ngaia ae tararua, ao I Onimakinna,” e taku. “E korakora naba au namakin bwa e kainnanoira n tatabemaniira n Ana mwakuri. Ti bane n iai tibwangara aika ti na karaoi, ao ti kona n riki bwa mwakoron te mwakuri aei n arora n ikotaki. I rang kakaitau ibukin te tibwanga ibukin te beku.”

Kristin Mae Yee e bungiaki ni Meei 5, 1981, i Sacramento, California, USA, irouia Ryan R. Yee ma Jaydean Fox McKay. E mwaing imwiina nako Idaho, USA, ao imwiina nako Utah.

E kunea ana tarena inanon rikirakean n tatangiran te korotamnei, are e kairia nakon kawaina n reiakinaki ao nakoana. E karekea ana beeba te undergraduate degrees iaon te korotamnei man te Brigham Young University–Idaho ao Brigham Young University. N 2019 e karekea ana mwatita n te public administration man te BYU.

Ana konabwai Titita Yee are mateakinna e kairia nakon nakoana ae te tia korotamnei ao te tia karao birim n te Disney Interactive Studios, are e mwakuri iai n te maan ae 13 te ririki. N te tai aei e bairea te tiim ni karao birim n te Ekaretia. N ana korobanna ake a boboto iaon te euangkerio e raonaki n tamnein ana mwakuri n ibuobuoki te Tia Kamaiu.

Titita Yeee e a tia ni beku n nakoana aika a mwaiti n te Ekaretia, n raonaki ma te beretitenti n te Bootaki n Aine n te titeiki, te kauntira n ana beretitentii te Bootaki n Aine ao te tia reirei, beretitenti irouia Ataeinnaine n te uoote, tia reirei n te Gospel Doctrine, mitinare n te uoote, ao te tia mwakuri ibukin otenanti n te tembora.