“Amy A. Wright,” Riaona, Meei 2022.
Amy A. Wright
Moan Kauntira n te Beretitentii ni Kabuta n te Moanrinan
Titita Amy A. Wright e uringa te tairiki tabeua te ririki n nako ngke e bwainaorakiaki n te kaentia are e a butanako n ana tabo ni kariki. E taonaki n te maraki ae korakora n te aro are e a aki kona n reitaki ma te Atua. N aki taraa ana koaua ao ana onimaki iroun Tamana are i Karawa, te Tia Kamaiu, ao te baire ni kamaiu, e a rootaki n te kainnano.
Ngke e uarereke, e a tia n reireinaki Titita Wright iroun tinana ao ana taan kairiiri n te Moanrinan bwa ngkana e namakina te maaku, maroa, ke kainnanoan te Tamnei, e riai n anenea kunan te Moanrinan.
“Ma anne ibukiia ataei,” e iango n te tai aei. “E bon kaineti naba anne nakoiu?”
Ngkanne e roko te kaeka—ao te kuna.
“Ngai naba natin te Atua,” E uringnga Titita Wright. “Ngaia, are n au iango, I a anene, ‘Tamara are i Karawa, ko bon mena ikanne?’1
“Ti anne are I karekea iai. Bwain nako rabwatau a bautaki n ana tangira te Atua. Namakinan ana tangira te Atua e kona n namakinaki, are e bon kamiimi ibukina bwa akea te bwai riki ae I kona n namakinna. I ataia bwa E mena ikekei, ao E atai raoi bwaai aika I rinanona, ao bon Ngaia te Atua n tangira.”
E bungiaki Amy Eileen Anderson Wright n Tianuare 6, 1972, i Salt Lake City, Utah, USA, irouia ana karo aika Joy Bailey ao Robert Anderson. E mare ma James McConkie Wright n Tuun 24, 1994, n te Salt Lake Tembora. Iai teniman natiia aika mwaane.
E reke ana beeba ae te bachelor of science degree n te human development ao family studies man te Kuura ae Rietaata i Utah n 1998. E mwakuri n aia tabo ni mwakuri ataein te reirei iaon te kareke rongorongo n te Marquette University’s College of Communication ngke kainnabana e ira te reirei iaon te karao wii.
Titita Wright e beku bwa te Kauoman ni Kauntira n te Beretitentii ni Kabuta n te Moanrinan n ririki aika a nako ao n aia baba n tararua ni kabuta te Bootaki n Ataeinnaine n te maan ae teniua te ririki imwain anne. Nakoana riki mai imwaina bon te beretitenti n te Moanrinan n te uoote ao te titeiki, kauntira n te beretitentii n te Bootaki n Aine ao te Moanrinan, te tia reirei n te Bootaki n aine, te tia reirei n Reirein te Euangkerio, ao te tia kairiiri n te Cub Scout.