Te Komiunite A Ururing n te Bukamaru ae Tabu Ibukiia Koraki Ake A Kabuanibwai Man te Kaibuke are e Koro i Maupiti

Ana Ekaretia Iesu Kristo ibukiia Aika Itiaki ni Boong aika Kaitira i French Polynesia a karaoa te bukamaru n te Kaonobong 1 Meei n taeka rabunan te kauring are iai rongorongona ni kawai ao n anga te karinerine nakoia koraki ake a kabuanibwai ni mate are e riki 60 te ririki n nako. Te tai anne e riki i Maupiti, te aba ae mena 300 te kiromiita I meangmaeaon Pape’ete,

Karakinan te kabuanibwai e moanaki n 22 Meei 1963, ngke e katabuaki te umwantabu ae boou iaon te aba ae uakaan ma Huahine, n ana tai Unimwaane Gordon B. Hnckley, are bon te membwa n te Kooram n Abotoro n Tengaun ma Uoman n te tai anne ao imwina e riki bwa te Beretitenti n te Ekaretia, e tararuaa te bukamaru ae bong bongina ao n okira Pape’ete imwin te taromauri.

Te tairiki anne, te booti ae arana te Manuia e uotiia membwa n te Ekaretia mai Huahine n oki nako Maupiti. Te ingabong are imwina, ngke e kataia n rinanon te tabo ni buti inanon te ane ma rakai are e katobibia te aba, e a bobaraaki te booti man korakoran te aira. Tengaun ma niman aomata aika a bwabwa ao te mwaanga ae Maupiti a bua tengaun ma aman ana membwa, n ikotaki ma tengaun tiina ao aman ataei.

I Pape’pete, e tuangaki Unimwaane Hinkley taekan te kangaanga ao e waekoa ni kitana Manupiti ni mwananga n te booti inanon te tairiki. E roko n te ingabong are imwina, e rabwatiia ma rannimatana n tang ma utu ake korakai n tang n nanokawaki.

Te tai ae riki n te Kaonobong 1 Meei 2021 e bon riaon 150 aomata ake a roko n ikotaki ma taan kairiiri, membwa n te mwaanga, ake a reke maiuia ao aia utu ake a bua maiuia inanon te kabuanibwai. A tei n tatabeman utu n onei mwiia aia utu ke a mwaiti ake utuia ni koaua. Te namakin ae korakora e roota tain te bukamaru, riki warekan araia koraki ake a mate. Ni kabane aomata a tibwai aia namakin bwa a bon namakina menaia n tain te bukamaru.

Te katangitang n tamnei e katauraoaki mairouia kaain te Kuaea mai Maupiti ake a anene n te taetae ni French ao Tahiti.

Taan taetae n ikotaki ma Holly Hinckley Lesan, tibun Beretitenti Hinckley te aine, are e taetae n te bootaki ma te rongorongo ae raweaki n te taetae ni French. E a manga kauringa mwaitin te taneiai irouia kaain Maupiti are e rangin nano nakon tibuna te unimwaane.

“I iangoia bwa ngke arona bwa e taetae tibu te unimwaane n te bong aei n onea mwiu, e na bon kabwaranakoa ana tangira ae nano ibukiia Aika Itiaki man aban marawa. E na bon kaota ana kakoaua ni koauan mangautin ara Tia Kamaiu, n te atatai ni koaua are te koraki ake a bua maiuia n te bong ae kakamaaku i Maupiti a na manga maiu, ao are ti na bootaki ma ngaiia teuana te tai. Te kabuanibwai n te maiu ae mamate e aki kona n tuka kamiimin mwanangara ae akea tokina.”

Te bootaki n taromauri e kainaki ma te witeo are e raweaki n te taetae ni French ao Tahiti mairoun Unimwaane Ian S. Ardern, te beretitenti n Aonon te Betebeke ibukin te Ekaretia, are e taetae man ana aobiti I Auckland.

E taku, “Ngkana e roko te kabuanibwai, ao e na roko nakoira n tatabemaniira, ti kunea te kabebeteaki n nano inanon ana Reirei Kristo. Te reirei e anganiira te aki nanououa bwa iai te maungauti ao are ti na manga maiu. Ti na ataia naba bwa ara bakatibu ni kabane a rangi ni kakawaki nakoira. Angiia akea te boua ni kauring ibukin karineaia ao ke a na kantaningaia teuana ibukiia ma koauana, ti karineiia man te kawai are ti maiuakin iai maiura. I ataia bwa aomata aika kaain Tahiti a aki mwanuokinaki iroun te Uea.”

Imwiin te buroukuraem, kaain te bootaki n taromauri a ikotaki iaontano itinanikun te umwantabu i Maupiti. Moana Teriipaia, te Beretitenti n te Bora Bora Titeiki, ao Mark Banner, te Beretitenti n te French Polynesia Mition, n raonaki ma Alice Atuahiva, te Kauoman ni Meeia mai Maupiti, ao a buoka Unimwaane Sinjoux n taeka rabunan te kauring are iai rongorongona. Ngkanne Unimwaane Sinjoux, te Kaitingaun n te Aono ibukin French Polynesia, e anga te karaunano, te tataro ae roota te namakin ni ururing. Te boua ni kauring e koreaki te karaki n te taetae ni French ao Tahiiti ao e tekateka iaontano ni kaitaraa taari ni katobibiaki, n katabuki aika kirimaungaunga n mangurooro ma tamaroan te umwantabu ae mainaina.

Te Meeia mai Maupiti, Woullingson Raufauore, e butimwaeia ake a roko aika taan kairiiri n te Ekaretia a kairaki iroun Unimwaane Sinjoux ni moan rokoia. “I karabwa Ana Ekaretia Iesu Kristo ibukiia Aika Itiaki ni Boong aika Kaitira ibukin karaoan te kanuringa aio. Karaoan aei e bon onoti ibukin te tai teuana ke teuana, iai tabera ni kabane ni uringiia aomata ake a tia ni beku ma ngaira.”

Mihimana Pahuiri e bua kainabana ma natiia ae te roro ae teuana tabun te ririki ni waerake n te kabuanibwai. “Te tai aei bon te kataaki ni koaua, ao rikiraken te Ekaretia I Maupiti e kona n tia n toki. Ma bon man aia onimaki membwa are e karokoa raoi te reitinako ni uota maiun te euangkerio. Tiaki ngai te membwa n te Ekaretia n te tai anne n tain te kabuanibwai, ma kainabau bon te membwa. I iangoia ni bwabetitoaki n te aro are N na kona n nakon te tembora ao ni kabaeki ma buu ao natiu.”

Unimwaane Sinjoux e ururinga ana taeka te Abotoro ae roko n 1963. “Unimwaane Hinckley e taku, ‘N na aki mwanuokina taekan Maupiti.’ N te kawai ae ti te arona, Tamara are I Karawa ao Natina, ara Uea ao ara Tia Kamaiu Iesu Kristo e aki mwanuokiniira. Korakoran nanoia bon kaoakira n oki Nakoiia imwin te maiu aei.