O Le Taui o le Onosaia Lelei

A o o’u talavou, sa ou tautua i le Ekalesia i le avea ai ma se fesoasoani i se peresitene atamai o le itu. Sa ia taumafai pea e aoao a’u. Ou te manatua le fautuaga na ia tuuina mai ia te a’u i se tasi taimi: “A e feiloai i se tagata, taulimaina i latou e peiseai ua latou i ai i se faafitauli ogaoga, ma o le a e sao e silia ma le afa o le taimi.” Sa ou mafaufau i lena taimi o ia o se tagata e leai se faamoemoe. I le taimi nei, i le silia ma le 50 tausaga mulimuli ane, ua ou iloaina lona malamalama lelei i le lalolagi ma le olaga.

Tatou te fetaiai uma lava ma tofotofoga—i nisi taimi, o tofotofoga sili ona faigata. Ua tatou iloa e faataga e le Alii i tatou e oo i tofotofoga ia faaleleia ai ma faaatoatoaina i tatou ina ia mafai ona tatou faatasi ma Ia e faavavau.

Na aoao e le Alii le Perofeta o Iosefa Samita i le falepuipui o Liperate o le taui mo le onosaia lelei o ono tofotofoga ma puapuaga o le a fesoasoani e faaagavaa ai o ia mo le ola e faavavau:

“Lo’u atalii e, ia filemu lou agaga; o lou tiga ma ou puapuaga o le a nao sina minute laitiiti;

“Ma ona oo lea, afai e te talitalia lelei, o le a faaeaina oe e le Atua i luga; o le a e manumalo i ou fili uma” (MF&F 121:7–8).

Tatou te oo i le tele o faigata ma tofotofoga i le olaga ma e ono foliga faigata le onosaia lelei. E mafai ona foliga mai faapena i se aiga o faalagolago i faatoaga pe a leai se timu. Atonu latou te mafaufau, “O le a le umi e mafai ona tatou onosaia ai pea?” E mafai ona foliga faapena i se talavou o loo feagai ma le tetee atu i le faateleina o le aofai o mea eleelea ma faaosoosoga. E mafai ona foliga mai faapena i se alii talavou o loo tauivi ina ia maua ai se aoaoga po o aoaoga faamasani na te manaomia mo se galuega ina ia tausia ai se ava ma se aiga. E mafai ona foliga mai faapena i se tagata e le mafai lava ona maua se galuega pe ua leai le tele o galuega ona ua tapunia ia pisinisi. E mafai ona foliga mai faapena ia i latou o feagai ai ma le faaitiitia o le malosi faalesoifua maloloina ma le faaletino, lea e ono oo vave mai pe tuai foi i le olaga mo i latou pe mo e latou te alolofa i ai.

Ae e lei tuuina mai ia i tatou e le Atua ia ituaiga o tofotofoga ina ia silafia ai pe mafai ona tatou onosaia faigata ae ia silafia ai pe mafai ona tatou onosaia ai ma le lelei ma ia faaleleia ai.

Na aoaoina e le Au Peresitene Sili ia Elder Pale P. Palate (1807–57) ina ua faatoa valaauina o ia o se tasi o le Korama a Aposetolo e Toasefululua: “Ua e tau nei i se tulaga e manaomia ai lou malosi atoa; … avea ma se meafaigaluega lelei. … E tatau ona e tumau i le galue malosi, ma tulaga patino eseese o le a avea ai oe ma tagata ua atoatoa ona saunia. … O loo finagalo le Tama Faalelagi e te faia; o Ia e Ona le fanua, o Ia e Ona le galuega, ma o le a Ia faafiafia i lou agaga ma faaeaea ia te oe.”¹

I le Tusi a Eperu, na saunoa ai Paulo i le fua o le onosaia lelei: “O aoaiga uma foi a o i ai, e le manatu i ai o se mea e olioli ai, a o le mea e faanoanoa ai; a e mulimuli ane e fua mai ai le fua o le amiotonu e manuia ai e ua aoaoina ai” (Eperu 12:11).

O o tatou tofotofoga ma faafitauli e aumaia ia i tatou le avanoa e aoao ai ma tuputupu ae ai, ma atonu e mafai ai foi ona suia lo tatou lava natura. Afai e mafai ona tatou liliu atu i le Faaola i le taimi o o tatou tofotofoga sili ona faigata, o le a faaleleia o tatou agaga pe a tatou tumau ai.

O le mea lea, o le mea muamua ina ia manatua o le tatalo lea e le aunoa (tagai MF&F 10:5; Alema 34:19–29).

O le mea lona lua o le taumafai pea lava pea e tausi poloaiga—po o a lava mea faafeagai, faaosoosoga, po o vevesiga o siomia ai i tatou (tagai i le Mosaea 4:30).

O le mea taua lona tolu e fai o le auauna atu i le Alii (tagai i le MF&F 4:2; 20:31).

I le galuega a le Matai, tatou te iloa ma alolofa ia te Ia. O le a amata, pe afai tatou te tumau ai i le tatalo ma le auauna atu faamaoni, ona tatou iloa le aao o le Faaola ma le faatosinaga a le Agaga Paia i o tatou olaga. O le toatele o i tatou na tuuina atu mo se taimi sea ituaiga o auaunaga ma lagonaina lena mafutaga. Afai e te mafaufau i tua i lena taimi, o le a e manatuaina sa i ai ni suiga ia te oe. O le faaosoosoga ia faia le amioleaga na foliga mai sa faaitiitia. O le manao ia faia mea lelei sa faateleina. O i latou na sili ona iloa lelei ma alofa ia te oe atonu na faapea mai, “Ua sili atu lou agalelei ma sili atu lou onosai. Ma e foliga mai e le o toe tutusa lou tagata.”

E te le o toe avea ma lena tagata. Na suia oe e ala i le Togiola a Iesu Keriso ona sa e faalagolago ia te Ia i le taimi o ou tofotofoga.

Ou te folafola atu o le a afio mai le Alii e fesoasoani ia te oe ma o le a faaleleia lou agaga i le faagasologa. Ou te luiina oe e tuu atu lou faalagolago ia te Ia i ou mafatiaga uma.

Ou te iloa o loo soifua le Atua le Tama ma e Na te faafofogaina ma taliina a tatou tatalo uma. Ou te iloa o Lona Alo, o Iesu Keriso, na totogina le tau o a tatou agasala uma ma e finagalo o Ia ia i tatou e o mai ia te Ia. Ou te iloa e leoleoina i tatou e le Tama ma le Alo ma ua saunia le ala mo i tatou ina ia onosaia lelei ai ma toe foi atu i le aiga.