Murilo Vicente Leite Ribeiro

Ina ua papatisoina Murilo i le 16 tausaga, sa teena e lona aiga atoa lana papatisoga. Ina ua ia maua se valaauga o le misiona, na tiai e ona matua ona ofu lotu ma taofi o ia mai le auauna atu i se misiona. Na iu lava ina fesoasoani o ia e aumai lona aiga i le Ekalesia, ae sa ia lagonaina pea le le agavaa mo le le’i auauna atu i se misiona.

Cody Bell, tagata pueata

Sa faailoa mai ia te a’u le Ekalesia ina ua 14 ou tausaga. O a’u uo o ni tagata lolotu ma sa faailoa atu a’u i faifeautalai. Ou te lei taliaina muamua le la savali ona ua uma ona auai lo matou aiga i se isi lotu.

O le lua tausaga mulimuli ane, sa fesiligia ai a’u pe ou te fia taalo futipolo [lakapi faa-Amerika] i le lotu. Ou te fiafia ia i le futipolo, ma sa ou fia taalo lava. Sa valaaulia foi a’u e auai i le seminare. Ua amata ona ou fiafia i le Ekalesia.

Sa ou talanoa i faifeautalai, ma sa la aoaoina a’u e uiga i le Uluai Faaaliga. Na la suia lo’u olaga. Na musuia a’u i le taimi lava sa la talanoa ai e uiga i ai. Sa ou tagi i o la luma. Sa ootia a’u ma lagonaina se agaga maoae. Sa ou taliaina le la valaaulia ina ia papatiso pe a maea le lesona muamua.

Sa tetee o’u matua i le Ekalesia ma e le’i auai i lo’u papatisoga. Sa matuai faigata lava mo a’u. Nao lo’u uso lava o Joaquim le tagata o lo’u aiga sa faatasi ma a’u i lena aso.

Ina ua uma lo’u papatisoga sa ou feagai ma le anoanoai o faigata. Ou te talitonu i le talalelei toefuataiina, ae sa lei mauaina e lo’u aiga lena vaaiga mamao. Sa ou taumafai e faamatala atu ia te i latou, ae sa le malamalama o’u matua. Sa faaauau pea ona ou alu i le lotu, e ui lava ina manatu o’u matua ua ou faagaloina le aiga. O le mea moni lava sa ou manao ia i latou ma tatou te o faatasi i le lotu.

Ina ua oo mai le taimi mo la’u misiona, sa ou lagona le saunia. Sa ou auai i le seminare mo le lua tausaga, sa ou auai i vasega sauniuni mo faifeautalai, ma sa ou alu i le inisitituti. Sa ou lagona le malosi faaleagaga i lena taimi, peitai ua amata ona faateleina le saua o o’u matua. Sa aafia lo’u aiga atoa i le taumafaiga e aveese atu a’u mai le Ekalesia.

Sa ou auina atu a’u pepa o le misiona ma maua mai lo’u valaauga ou te galue i le Misiona a Pasila Recife. Sa ou tauina atu i o’u matua o le a ou alu i Recife e fai ma sui o Iesu Keriso i le avea ai ma se faifeautalai. Sa faamisamisa mai lo’u tama ia te a’u, ao lo’u tina na oo lava i le tulaga o le tatiaia o o’u oufu lotu ma a’u tusi. Sa matua feitai lava i laua.

Ou te lei alu i se misiona. O le taimi sili lea ona faigata i lo’u olaga. Sa ou manao e auauna atu i se misiona, ae sa ou feagai ma le tele o mea faafeagai. E leai sa’u mea sese na faia, ae sa ou lotovaivai ma faanoanoa, ma sa ou mafatia pea i sauaga i le fale. Sa faamoemoe o’u matua o le a ou faavaivai ma aua nei toe alu i le lotu.

Sa faigata ia te a’u le avea ma se alii talavou ae le alu i se misiona. Sa ou lagona le faatauvaa i le faatusatusa i a’u uo ia ua leva ona o i misiona, ma sa ou lagona le tuuatoatasi i le lotu. Sa manatu nisi tagata ua ou le alu ona ua ou le agavaa. Ae sa ou faia le mea sili ina ia tumau mausali ai i le faatuatua.

I le taimi lea, sa ou feiloai ai ia Keli, o le o le a avea ma o’u toalua. Ina ua ou feiloai ia te ia, na siitiaese atu lo’u faanoanoa ma sa mafai ona ou vaai atu ia te a’u lava o se atalii o le Atua. O Keli sa lei auai i le Ekalesia ina ua amata ona ma tafafao faamasani. E lei umi ae ma faaipoipo, ma ina ua mavae se masina sa ou papatisoina o ia. Sa faamauina i maua i le malumalu i se tausaga mulimuli ane. Sa avea o se taimi faapitoa ma paia mo a’u.

Ina ua mavae le fanau mai o la ma tama matua o, Rafael, sa ma aumaia o ia i le lotu ina ia maua se faamanuiaga. Sa auai o’u matua i le faamanuiaga. O le taimi muamua lava lea ua la o ai i le lotu. Sa amata ona la faalogo i lesona a faifeautalai i lo la fale. Mulimuli ane sa ou mauaina le avanoa e papatiso ai ou matua ma lou uso laitiiti.

O le malie ia ona o lo’u tama e matuai fuafua lelei lava mea uma e uiga i ai. Sa ia fai mai, “Lou atalii e, o a fea e te papatisoina ai a’u?” Ina ua papatisoina o ia, sa ou aumaia o ia mai fafo o le vai ma sa ia fusi mai ia te a’u. O se taimi sili lea ona ofoofogia i lo‘u olaga!

I tausaga mulimuli ane, sa ma feiloai ai ma Elder Jairo Mazzagardi o le Fitugafulu ina ua ia malaga mai e toe faatulaga la matou siteki. Sa ia fesili mai ia te a’u e uiga i la’u misiona.

Na saunoa mai Elder Mazzagardi, “Brother Murilo, ou te vaai atu sa e papatiso ina ua 16 ou tausaga, peitai e te lei auauna atu i se misiona.”

“Ou te lei auauna atu i se misiona,” o lau tala lea, ma amata ona tagi.

“Ae ou te faia mea uma e mafai ona faia ina ia faamagaloina a’u e le Alii. Sa ou auauna atu o se peresitene o le paranesi mo le fitu masina, ma ou te taumafai e avea ma se faifeautalai ma tuuina atu le mea sili ou te mafaia. Ou te galue malosi e fesoasoani atu i isi. Ou te manao i le Alii ina ia faamagalo mai ia te a’u. Ou te le manao i lenei pona po o le pisia i le aso gataaga.”

“Brother Murilo,” sa ia saunoa mai ai, “aua le toe tepa i tua; vaavaai atu i luma. Po o ai lava e toe tepa i tua e savali agai i tua, ma po o ai lava e tilotilo atu i luma e savali agai i luma. Ua e mama.”

Sa ou fiafia lava e faalogo i lenei mea, ma sa le mafai ona taofiofia ou loimata o le olioli. O iina na mafai ai ona ou lagonaina, ina ua mavae tausaga e tele, le filemu o le Alii.

Sa pei ua siiina ese atu se ato faafafa e ono-tone mai lo’u tua.

Sa ia saunoa mai ia te a’u ina ia toe foi atu faatasi ma lo’u toalua ma valaauina a’u e auauna atu o se peresitene o le siteki.

Ona saunoa mai lea o Elder Mazzagardi, “O ou aafiaga o le a fesoasoani ia te oe e avea ai ma peresitene o le siteki. O le a mafai ona e fesoasoani atu i tagata talavou o e o i ai faafitauli po o e le maua le lagolagosua a o latou matua. E te lei maua le avanoa e auauna atu ai i se misiona, peitai o lau misiona lenei i le taimi nei. O le a e fesoasoani e auina atu tagata talavou i ni misiona.”

I le avea ai ma se peresitene o le siteki o se tasi o a’u sini autu o le fesoasoani lea i alii talavou ma tamaitai talavou e saunia e auauna atu i ni misiona. Ua tuuina mai e le Alii ia te a’u upu sa’o i le taimi sa’o e talanoa atu ai i nei tagata talavou. Ou te faafetai ua tuuina mai e le Alii ia te a’u le avanoa e fesoasoani ai i isi e filifili e auauna atu i ni misiona.