Pawa bilong Buk Momon

Ol dia brata na susa bilong mi, mi tok hamamas long yupela wantaim lav taim yumi mit gen long wanpela gutpela jenerol konferens bilong Sios bilong Jisas Krais long ol Lata-dei Seint. Bipo long mi statim mesis tru bilong mi tede, mi laik long tokaut long faivpela nupela temple we bai yumi bildim long ol dispela hap: Brasília, Brazil; greater Manila, Philippines, eria; Nairobi, Kenya; Pocatello, Idaho, USA; na Saratoga Springs, Utah, USA.

Dispela monin mi laik toktok long pawa bilong Buk Momon na dispela bikpela nid yumi gat olsem ol memba bilong dispela Sios long stadi, tingim long bel, na long mekim wok insait long laip bilong yumi ol tising bilong en. Dispela impoten samting long gat strongpela na trupela testimoni long Buk Momon mi no i nap long toktok planti tumas long en.

Yumi stap long wanpela taim bilong bikpela trabel na pasin i rong. Wanem bai banisim yumi long sin na samting nogut we i stap strong tru long dispela wol tede? Mi tok gen olsem wanpela strongpela testimoni long Sevia bilong yumi, Jisas Krais, na long gospel bilong Em bai halivim yumi long kisim yumi i go long sefti. Sapos yu no wok long ridim Buk Momon wanwan dei, plis yu mas wokim. Sapos yu bai ridim wantaim preiya na wantaim trupela laik long save long trut, Holi Gos bai mekim kamap klia long trut bilong en long yu. Sapos em i tru—na mi testifai strong tru olsem em i tru—olsem tu Joseph Smith em i bin profet husat i bin lukim God Papa na Pikinini Man bilong Em, Jisas Krais.

Bikos Buk Momon i tru, Sios bilong Jisas Krais bilong ol Lata-dei Seint em i Sios bilong Bikpela long dispela graun, na dispela holi prishud bilong God em i bin givim kambek long gutpela na blesing bilong ol pikinini bilong Em.

Sapos yu i nogat strongpela testimoni long ol dispela samting, wokim wanem yu nid long wokim long kisim wanpela. Em i impoten long yu long gat testimoni bilong yu yet long ol dispela hat taim, long wanem ol testimoni bilong ol narapela lain bai karim yu i go long liklik hap tasol. Tasol tu, taim yu kisim pinis, bai yu mas givim laip na bai em i stap laip thru long harim tok long ol komanmen bilong God na thru long preiya na skripsa stadi long wanwan dei.

Ol dia wanlain bilong mi long dispela wok bilong Bikpela, mi askim yumi wanwan long stadi wantaim preiya na tingim long bel dispela Buk Momon long wanwan dei. Taim yumi wokim dispela, yumi bai stap long ples we yumi ken harim dispela maus bilong Spirit, long paitim temtesen, long winim tubel na poret, na bai yumi kisim halivim bilong heven long laip bilong yumi. Mi testifai long dispela wantaim olgeta lewa bilong mi long nem bilong Jisas Krais, amen.