Ahksuwohs nuh Infulwac

In tuhngal met ac srolwaclah tarket an tohkoh ac luhman ispacl pacna, tuhsruhk kuhtuh pacl uh kuht sifacna liye atac sacn pacna ke kuhtuh ohiyac ke moul uh.

In mempucr ke Alu uh, kuht kuh pacna in eiskuhtyang sifacna nuh ke prokracm, ohiyac, ac finne mwe luti ke wosasuc uh ma luhman pwacr, yohk srihpac, kuh wo nuh sesr. Kuht srihfeyuck in sruhlwaclah tarket uh raunwelah, oruh kuht in luhlahlfongi lah kuht ahksuwohs nuh infulwacn wosasuc uh.

Ma inge fihsrwacsr in oruh.

Ke lusen pacl kuht eis kahs in kahsruh wowo ac moklweyuck sin mwet pahluh luhn God. Kuht oacyacpac eis kolyuck ac ahkpwacye ke ma oreklac puhkantwen, handbook, ac manual luhn Alu uh. Fihsrwacsr kuht in sulaclah sifac pahiyacsr ke wosasuc uh, sang nuh ke infulwacn nuhnak lasr uh, ac nuhnkwaclah muh kuht sokwack ma yohk srihpac emet ke wosasuc uh.

Ma inge tiacna elyah ma siena nuh ke lwen lasr uh. Pacl somlah ah, mwet kol alu uh eis pacl yohk in tahkuhnlah, pakiyac, ac nuhnkwaclah lah suc kac sin masap siofok uh pa yohk srihpac emet uh.

Sie lwen ah sie un mwet suhmaht luhn alu srihke in pahtok Mwet Lahngo nuh ke sie akuhkuhin. Elos siyuck Sel in fahk nuhnak lal ke sie ma elyah mwet na puh kuh in insese kac.

“Mwet luti,” elos siyuck Sel, “pia ma sap se ma yohk oemeet ke Ma Sap uh?”

Kuht nuh kwewa etuh ohiyacn top luhn Jisus: “Kom fah lungse Leum God lom ke insiom kewa, ke ngunum kewa, ac ke ku lom kewa.

“Pa inge ma sap se ma yohk oemeet ac yohk sripa oemeet.

“Ma sap se ahkluo yohk sripa oapana ma se meet an: ‘Kom fah lungse mwet tulan lom oana kom lungse kom sifacna.’

“Ma sap nukewa lun mwet palu oan ye ma sap luo inge.”¹

Nuhnak muhnahs akihlen sentence sahflah soko an: “Ma sap nukewa lun mwet palu oan ye ma sap luo inge.”

Mwet Lahngo El tiac ahkkahlwemye muhkwena tarket uh, tuhsruhk El oacyacpac ahkkahlwemye raun in tuhngalyuck sacn.

Ke mempucr ke Alu uh, kuht olwelah in eis nuh facsr sifacna inen Jisus Kraist. Etweyuck ke olwelah sacn pa kahlwem ma kuht fah fasrsrweacng in lutlut ke God, luhngse El, ahkyohkye luhlahlfongi lasr Sel, ahkfuhlwactyacl, fahsr ke inkacnek Lal, ac tuna kuh oacna mwet lohoh Lal.

Ke yohk ma kuht lotwelah ke God ac puhla luhngse Lal nuh sesr, kuht ac akihlen yohk lah kihsackuhnlah ne tok luhn Jisus Kraist pa sie mwe sang wolacna luhn God. Ac luhngse luhn God mokle kuht in orekmakihn inkacnek luhn auliyak pwacye, ma fah kol nuh ke ma usrnguck luhn nuhnak muhnahs. Ohiyac se inge oraclah nuh sesr in eis luhngse ac kuhlwacng yohk nuh sin mwet raunikuhtlac uh. Kuht fah lotwelah in liye ahluhkwelah ohiyacn mwet se. Kuht fah lain mwe sruhf in ahkkolukye kuh nuhnuhnkuh mwet sahyac ke ma koluk lalos, ma suhfal, tahfonglac, nuhnak luhn kafucrmacn, luhlahlfongi luhn alu uh, kain in mwet, kuh tuhnalos.

Kuht fah motko mwet nuh kwewa kuht ohsun nuh se oacna sie tuhlihk nuhtin Pahpah tuhmasr Lucng—tamuhlwel kuh tahmtahel wiyacsr.

Kuht fah saplaklac nuh sin mwet sahyac uh ke kahlwem ac luhngse—finne elos suc tiacna fihsrwacsr in luhngse. Kuht fah yoksrah yurin mwet suc yoksrah ac ahkkweye elos suc oasr in enenuh luhn ahkkweye.²

Ac kuht fah akihlen lah kuht tiac enenuh in oraclah tarket suwohs ke wosasuc uh.

Masap luhlahp luo emet ah pa tarket uh. Ma sap nuh kwewa lun mwet pahluh oan ye ma sap luo inge.³ Ke kuht lwelah ma inge, ma wo nuh kwewa sahyac fah ohlah.

Fin lohacng, nuhnak, ac kuh yohk emet lasr uh pa in ahkyohkye luhngse lasr nuh sin God Fuhlwact ac sang insiyacsr nuh sin mwet sahyac uh, kuht kuh in etuh lah kuht sokwack tarket na pwacye uh ac ahksuwohs nuh kac—eklac mwet tuhma lutlut pwacye luhn Jisus Kraist.