Wanpela Smail I Ken Mekim Wanpela Senis

Presiden Uchtdorf i makim tupela gol yumi mas gat long ol pasin bilong yumi: lavim God na lavim ol narapela brata na susa bilong yumi. Tasol sampela taim em i no isi long lavim tasol ol narapela. Long olgeta taim long laip bilong yu, bai i gat sampela taim we yu bai painim hat long toktok na stap wantaim ol narapela lain—ating wanpela i bin mekim nogut long yu o yu kisim hatpela taim long toktok gut o wanbel stap wantaim narapela lain. Long ol dispela liklik taim, traim long holim long tingting dispela lav yu bin pilim i kam long ol pren, femili, Papa long Heven, na Jisas Krais. Holim long tingting dispela hamamas yu bin pilim long ol dispela taim na traim long tingim tasol sapos olgeta manmeri i ken gat dispela opotuniti long pilim dispela kain lav. Holim long tingting olsem olgeta manmeri ol i pikinini meri o pikinini man bilong God na ol i gat rait bilong ol long lav bilong Em na tu long lav bilong yu.

Tingting long wanpela man long laip bilong yu husat yu bin gat hat taim long kamap poroman wantaim em. Putim ol insait long preiya bilong yu na askim Papa long Heven long opim lewa bilong yu long ol. Klostu taim bai yu lukim ol olsem hau Em i lukim ol: olsem wanpela bilong ol pikinini bilong Em husat i gat rait bilong ol long lav.

Bihain long taim yu prei pinis, wokim wanpela naispela samting i go long ol! Ating singautim ol long wanpela bung o wanpela raunraun wantaim ol pren bilong yu. Askim long halivim ol wantaim wanpela skul homwok. Na tu tok “halo” tasol na smail long ol. Ol liklik samting ken mekim bikpela senis …long laip bilong yutupela wantaim!