Nambawan Stret Rot i go long Hamamas

Ol lewa brata na susa bilong mi, long hia insait long dispela Konferens Senta na long olgeta hap long dispela graun, mi tok tenkyu tumas long dispela opotuniti long sherim ol tingting bilong mi wantaim yupela dispela monin.

Faipela ten na tupela yia i go pinis, long July 1964, mi bin gat wanpela wok long New York Siti namel long taim ol i bin holim wanpela Fe o So bilong dispela Wol long hap. Long wanpela dei long monin tru mi bin visitim hap ol Momon bin stap long en long dispela So. Mi bin kamap long hap liklik taim bipo long ol i soim wanpela muvi piksa bilong Sios ol i kolim Man i Wok long Painim Hamamas, wanpela tok piksa long plen bilong salvesen nau i kamap olsem wanpela piksa bilong Sios ol i save soim planti taim. Mi bin sindaun klostu long wanpela yangpela man husat ating em i bin 35 krismas bilong em. Mitupela toktok liklik. Em i no bin memba bilong Sios. Bihain ol i putim lait i go daun, na dispela muvi piksa i stat.

Mitupela bin harim maus bilong man husat i wok long stori na em is askim dispela spesol askim we olgeta insait long wol i save askim: Mi kam long we? Wai na mi stap long hia? Bai mi go we taim mi lusim dispela laip? Olgeta yia i sanap long harim ol bekim, na olgeta ai i lukluk strong long ol piksa ol i wok long soim. Ol i givim wanpela piksa bilong laip bilong yumi bipo long yumi kam long hia, wantaim tok klia long wanem as tru na yumi stap long dispela graun. Mitupela witnesim wanpela spesol piksa long wanpela lapun bubu man i lusim laip bilong em na long bikpela hamamas taim em i bung gen wantaim ol lain bilong em husat i bin go pas long em na i go long spirit wol.

Long pinis bilong dispela naispela muvi piksa long plen bilong Papa bilong yumi long Heven long yumi, ol manmeri isi isi tasol i go ausait, planti bilong ol mitupela ken lukim olsem ol i bin kisim gutpela piling long mesis bilong dispela muvi piksa. Dispela yangpela visita klostu long mi i no bin sanap. Mi askim em sapos em i bin laikim dispela muvi piksa. Em i givim strongpela bekim olsem: “Dispela em trut!”

Ol misinari bilong yumi long olgeta hap long wol wok long sherim dispela plen bilong hamamas na salvesen bilong yumi we Papa bilong yumi long Heven i mekim. I no olgeta husat i harim dispela mesis i kam long antap bai welkamim na laikim. Tasol, ol man na ol meri long olgeta hap, olsem tasol yangpela poroman bilong mi long dispela Fe o So New York, bai long save long ol trut bilong dispela mesis, na ol i bai planim lek bilong ol long dispela rot we i bai lidim ol i go long ples antap wantaim nogat birua. Ol laip bilong ol bai senis olgeta.

Impoten stret long dispela plen em Sevia bilong yumi, Jisas Krais. Sapos sakripais taim em i karim pen long yumi i no stap, olgeta samting bai i no i nap i stap. Tasol, em i no i nap, long bilip tasol long Em na misin bilong Em. Yumi nid long wok na lainim, wok hat long painim na prei, tok sori long ol rong bilong yumi na kamap gut. Yumi nid long save long ol lo bilong God na putim ol insait long laip bilong yumi. Yumi nid long kisim ol seiving odinens bilong Em. Taim yumi wokim dispela, olsem tasol bai yumi givim long yumi yet dispela trupela hamamas bilong oltaim oltaim.

Yumi i gat blesing tru long gat dispela trut. Yumi gat oda long sherim dispela trut. Yumi mas putim ol insait long laip bilong yumi dispela trut, olsem bai yumi ken kisim olgeta samting Papa God i gat i stap bilong yumi. Em i no save wokim samting nating tasol long bai yumi i ken kisim gutpela bilong em. Em i tokim yumi pinis olsem, “Dispela em i wok bilong mi na glori—bilong mi long mekim kamap dispela we man i no nap i dai na stap laip oltaim oltaim.”

Long insait stret long sol bilong mi na wantaim olgeta daun pasin, mi testifai long dispela bikpela presen em dispela plen bilong Papa bilong yumi long yumi. Em i wanpela stretpela rot i go long pis na hamamas long hia na tu long wol i kam bihain.

Ol brata na susa bilong mi, mi lusim wantaim yupela olgeta lav na blesing bilong mi nau mi pasim toktok bilong mi, na mi wokim dispela long nem bilong Sevia na Ridima bilong yumi, em Jisas Krais, amen.