Tok Tenkyu long Sabat Dei

Ol dia brata na susa bilong mi long Sios bilong Jisas Krais long Lata-dei Sen yu stap long olgeta hap raun long dispela graun, mi tok tenkyu olsem Presiden Thomas S. Monson i askim mi long toktok insait long dispela konferens long dispela Sabat dei. Mi prei olsem Holi Gos bai karim ol toktok bilong mi i go insait long lewa na bel bilong yupela.

Tede mi gat bikpela laik long toktok long ol tingting strong bilong lewa na bel bilong yumi. Dispela we bai mi lukluk long em tede em pasin bilong tok tenkyu—moa yet long Sabat dei.

Yumi save tingting strong long tok tenkyu long planti samting: gutpela pasin i kam long wanpela man husat i no save long yumi, kaikai yumi kisim taim yumi hangere, haus antap long het bilong yumi taim bikpela ren na win i kamap, taim yumi brukim bun na em i olrait gen, na strongpela krai bilong wanpela pikinini i bon. Planti bilong yumi bai tingim bek dispela tingting strong bilong tok tenkyu long ol dispela kain taim.

Long ol Lata-dei Sen, Sabat em i kain taim olsem dispela taim, tru em i wanpela dei, bilong tok tenkyu na soim lav. Bikpela em i tokim ol Sen long Jackson Ples, Missouri, long yia 1831 olsem ol i mas salim ol preya na tok tenkyu bilong ol i go long heven. Ol dispela Sen bilong bipo i bin kisim revelesen long hau long holim pas Sabat dei na long hau long lusim kaikai na prei.¹

Bikpela i bin tokim ol, na yumi, long hau long lotu na givim tenkyu long Sabat. Olsem yupela ken lukim, wanem i impoten tru em lav yumi pilim i go long husat i givim dispela presen. Hia em ol toktok bilong Bikpela long hau long givim tenkyu na hau long soim lav long Sabat.

“Mi givim igo long ol wanpela komanmen, na tok olsem: Yu bai lavim Bikpela God bilong yu wantaim olgeta lewa na bel bilong yu, wantaim olgeta pawa bilong yu, tingting, na strong; na long nem bilong Jisas Krais yu bai sevim em. …

“Yu bai tok tenkyu long Bikpela God bilong yu long olgeta samting.

“Yu bai ofaim wanpela sakripais igo long Bikpela God bilong yu wantaim gutpela raitpela pasin, wantaim tu lewa na bel bilong yu i bruk na wantaim bikpela sori long spirit bilong yu.”²

Na bihain Bikpela i sukurim toktok long sambai long taim nogut sapos yumi pundaun long tok tenkyu long Papa long Heven na Jisas Krais olsem ol taim husat i save givim yumi ol presen: “Na nogat wanpela samting man i ken wokim long mekim God i bai pilim nogut, o nogat wanpela man bai kros bilong God i pundaun antap long en, tasol ol dispela lain tasol husat i no konfes olsem han bilong God i mekim olgeta samting, na i no bihainim ol komanmen bilong em.”³

Planti bilong yupela husat i wok long harim dispela toktok i painim pinis hamamas long Sabat olsem wanpela dei long tingim and givim tok tenkyu long God long ol blesing yu kisim. Yu tingim bek dispela singsing we yu save long en:

Ol gutpela feitful Lata-dei Sen husat i save pilim bikpela hevi i save salim ol leta i kam long mi and tu ol i save kam visitim mi. Sampela i save pilim olsem, long ol yet, klostu olsem olgeta samting i lus pinis. Mi hop na prei olsem wanem samting mi laik tokim yupela long yupela mas tok tenkyu long Sabat bai i ken halivim long mekim ol dispela poret bai pinis wantu na bai singsing hamamas i stat insait long lewa na bel bilong yupela.

Wanpela blesing we yumi ken gat bikpela tenkyu em olsem yumi stap stret insait long dispela sakramen miting, na bung wantaim sampela bilong ol disaipol bilong Em long nem bilong Em. I gat sampela husat i stap long ol hom bilong ol na no i nap long kirap long bet bilong ol. I gat sampela husat i laik stap long hia we yumi stap tasol gen ol i wok long givim sevis insait long ol hausik na wok long givim sefti long yumi olgeta o wok long was long yumi na putim laip bilong ol yet long birua taim ol i wokim wok bilong ol. Em i wanpela samting olsem yumi ken bung wantaim wanpela narapela Sen na kisim sakramen bai halivim yumi long stat long pilim tenkyu na lav long gutpela pasin bilong God.

Bikos long Profet Joseph Smith na dispela gospel we i kam bek, narapela blesing yumi ken kauntim em olsem yumi i gat dispela opotuniti long kisim sakramen olgeta wik—we ol wokman bilong God husat i gat otoriti i redim, blesim, na givim i kam long yumi. Yumi i ken tok tenkyu taim Holi Spirit i strongim toktok long yumi olsem ol dispela tok insait long ol dispela sakramen preya, we ol dispela prishud husat i gat otoriti i ofaim, em Papa bilong yumi long Heven i onaim.

Long olgeta dispela blesing yumi i ken kauntim, dispela we i bikpela stret em dispela piling bilong lusim ol rong bilong yumi we i kam taim yumi kisim dispela sakramen. Yumi bai pilim bikpela moa lav na luk save long Sevia, husat sakripais bilong em we i nogat arere bilong em i mekim kamap olsem insait bilong yumi ken kamap klin long ol sin. Taim yumi kisim bret na wara, yumi tingim bek taim Em i karim hevi long yumi na taim yumi pilim tenkyu long wanem samting Em i wokim bilong yumi, yumi bai pilim lav bilong Em long yumi na lav bilong yumi long Em.

Dispela blesing long lav yumi kisim bai mekim isi long yumi long holim pas ol komanmen long bai yumi ken “olgeta taim tingim em.”⁵ Yupela i ken pilim tu lav na tok tenkyu, olsem mi save pilim, long Holi Gos, husat Papa long Heven i bin promis pinis olsem bai i save stap oltaim wantaim yumi taim yumi stap feitful long ol kavanen yumi bin mekim. Yumi ken kauntim olgeta dispela blesing olgeta Sande na pilim dispela tenkyu.

Sabat em i wanpela nambawan taim tu long tingim ol kavanen yumi mekim long wara bilong baptisim long lavim na sevim ol pikinini bilong Papa long Heven. Long mekim kamap dispela promis long Sabat bai yumi nid long putim i go insait tu pasin bilong stap insait long ol klas na kwarom wantaim olgeta lewa na bel bilong yumi long bildim feit na lav namel long ol brata na susa bilong yumi husat i stap wantaim yumi. Dispela promis bai yumi nid long putim i go insait tu laik bilong yumi long mekim kamap gut ol wok bilong yumi insait long Sios.

Mi tok tenkyu long ol dispela planti Sande we mi tisim wanpela kwarom bilong ol dikin insait long ples Bountiful, long Utah, na tu wanpela Sande Skul klas long ples Idaho. Na mi tingim tu ol dispela taim mi sev olsem asisten long meri bilong mi long neseri, we nambawan wok bilong mi em long givim ol toi long ol pikinini na long bungim ol gen bihain.

Em i bin planti yia i go pinis bipo long mi luk save thru long Spirit olsem dispela liklik sevis bilong mi long Bikpela em i impoten long ol laip bilong ol pikinini bilong Papa long Heven. Long kirap nogut bilong mi, sampela bilong ol i tingim bek na tenkim mi long ol dispela taim taim mi traim long sevim olsem wokman bilong Masta long ol dispela Sabat dei.

Olsem tasol sampela taim yumi i no i nap long lukim pinis bilong ol sevis bilong yumi yet we yumi givim long Sabat, sampela taim yumi i no i nap long lukim olgeta hatwok bilong ol narapela wokman bilong Bikpela. Tasol Bikpela i wok long bildim kingdom bilong Em isi isi, na wantaim liklik nois, thru long ol wokman bilong Em husat i feitful na i gat daun pasin, i go long wan tausen yia bilong hamamas bilong en. Yumi nidim Holi Spirit long lukim dispela naispela samting.

Mi bin save go long Sakramen miting long wanpela liklik brens long bikples New Jersey wantaim ol liklik lain tasol na wanpela famili, bilong mi yet. Seventi na faivpela krismas i go pinis, mi bin baptais long ples Philadelphia long wanpela haus lotu tasol we Sios i wokim na mipela i bin ken go long en long bikples Pennsylvania o narapela nem New Jersey. Tasol long dispela wanpela liklik brens long ples Princeton, New Jersey, nau i gat tupela bikpela wod. Na liklik taim i go tasol, tausenpela yangpela manmeri i wokim bikpela selebresen long makim dedikesen bilong Philadephia Pennsylvania Temple.

Taim mi yangpela man, mi bin kisim wanpela wok olsem distrik misinari we mipela bin save go lotu long Sande long wanpela haus lotu tasol long ples Albuquerque, long bikples New Mexico. Tede i gat wanpela temple na fopela stek long dispela ples.

Mi bin lusim ples Albuquerque long go long skul long ples Cambridge, bikples Massachusetts. I bin gat wanpela haus lotu na wanpela distrik long olgeta dispela hap bilong bikples Massachusetts na ples Rhode Island. Mi bin save ronim kar bilong mi long ol dispela liklik maunten long dispela naispela hap long go long sakramen miting long ol liklik brens, planti bilong ol long liklik ples we Sios i rentim na ol liklik haus nambaut. Nau i gat wanpela sekret temple bilong God long ples Belmont, bikples Massachusetts, na ol stek we i stap long planti hap long dispela ples long kantri.

Wanem samting mi i no bin lukim klia tumas long dispela taim em olsem Bikpela i bin wok long kapsaitim Spirit bilong Em long ol lain long ol dispela liklik sakramen miting. Mi bin nap pilim, tasol mi no bin nap long lukim bikpela bilong dispela samting na taim bilong save bilong Bikpela long bildim dispela hap na glori bilong Kingdom bilong Em. Wanpela profet, thru long revelesen bilong em, i bin lukim na i bin raitim wanem samting nau yumi i ken lukim long ai bilong yumi yet. Nifai i bin tok olsem namba bilong yumi olgeta bai i no i nap planti tasol lait we wok long gro yet bai i wanpela kain samting long ol man long lukim:

“Na em i kamap olsem mi lukim sios bilong Pikinini Sipsip bilong God, na namba bilong em i no planti. …

“Na em i kamap olsem mi, Nifai, lukim pawa bilong Pikinini Sipsip bilong God, we em i kam daun antap long ol sen bilong sios bilong Pikinini Sipsip, na antap long ol kavanen pipol bilong Bikpela, husat i stap long olgeta hap antap long pes bilong dispela graun; na ol i gat long ol gutpela raitpela pasin na wantaim pawa bilong God insait long bikpela glori.”⁶

Long dispela dispensesen, wanpela tok piksa klostu olsem dispela i kam long maus bilong profet long stap bilong yumi na ol opotuniti we i bai wok long kam long yumi i stap insait long Doktrin na Kavanen:

“Yu i no save gut yet long hau ol bikpela blesing Papa God i gat long han bilong em yet na i redim stap long yu;

“Na yu i no i nap long karim olgeta samting nau; tasol, stap hamamas, long wanem mi bai go pas na pulim yu i kam na go. Dispela kingdom em i bilong yu na dispela ol blesing em nau i bilong yu, na ol planti samting bilong taim oltaim oltaim i bilong yu.

“Na ol lain husat i kisim olgeta samting wantaim planti tenkyu i bai kamap pulap long glori; na ol samting bilong dispela graun bai i go long em tu, dispela tu olsem wan handred moa, yes, moa yet.”⁷

Mi bin pilim pinis dispela senis long tok tenkyu bilong blesing gro na lav bilong God kamap bikpela insait long olgeta hap bilong Sios. I luk olsem dispela i wok long spit namel long ol memba bilong Sios long ol taim na ples we i gat traim long ol feit bilong ol, we ol i nid long krai long God long halivim ol long go het.

Ol taim we yumi olgeta bai go thru long en bai i gat ol hatpela traim, olsem i bin gat long ol pipol bilong Alma ananit long man nogut Amulon, husat i bin putim antap long baksait bilong ol ol hevi kago hevi tumas long ol long karim:

“Na em i kamap olsem maus bilong Bikpela i kam long ol insait long ol pen bilong ol, na tokim ol olsem: litimapim het bilong yupela na kisim bel isi, long wanem mi save long dispela kavanen we yupela i mekim kam long mi; na mi bai kavanen wantaim ol pipol bilong mi na bringim ol kamaut long kalabus.

“Na mi bai mekim isi tu ol hevi kago we i stap antap long solda bilong yupela, olsem tu bai yupela i no i nap long pilim ol long antap long baksait bilong yupela, tu long taim yupela i stap long kalabus; na dispela bai mi wokim olsem bai yupela ken sanap olsem witnes bilong mi long bihain taim, na olsem bai yupela ken save tru olsem mi, Bikpela God, save visitim ol pipol bilong mi namel long pen bilong ol.

“Na nau em i kamap olsem ol hevi kago we ol i bin putim antap long Alma na ol brata bilong em i no bin hevi; yes, Bikpela i bin strongim ol olsem bai ol i bin ken karim isi ol dispela hevi kago, na ol i bin kisim na wokim wantaim hamamas na wantaim bel isi long olgeta lain dispela laik bilong Bikpela.” ⁸

Yu na mi yumi witnes olsem taim yumi bin holim pas ol kavanen bilong yumi wantaim God, long taim tru we em i bin hat long yumi, Em i bin harim ol preya bilong tok tenkyu long ol wanem samting Em i bin wokim pinis bilong yumi na em i bin givim bekim long ol preya bilong yumi long strong long stap strong wantaim feit. Na moa long wanpela taim Em mekim yumi hamamas na tu mekim yumi strong.

Ating yupela wok long tingting long wanem samting yupela i ken wokim long mekim kamap na lotu long dispela Sabat dei long soim tok tenkyu bilong yupela na long strongim yupela yet na ol narapela long ol traim we i stap long taim bihain.

Yupela i ken stat tede wantaim wanpela preya bilong yu yet na preya bilong famili long tok tenkyu long olgeta samting God i wokim pinis bilong yupela. Yupela i ken prei long save wanem samting Bikpela i bin ken laikim yupela long wokim long sevim Em na ol narapela lain. Moa yet, yupela i ken prei long gat Hoi Gos long tokim yupela long wanpela man o meri husat i sori ol yet o i gat nid na long husat Bikpela bai laikim yupela long go visitim ol.

Mi ken promisim yupela olsem bai yupela kisim bekim long ol preya bilong yupela, na taim yupela i mekim kamap ol bekim bilong yupela yupela bai kisim, yupela bai painim hamamas long Sabat, na lewa na bel bilong yupela bai kapsait wantaim tok tenkyu.

Mi testifai olsem God Papa i save long yupela wanwan and i lavim yupela wanwan. Sevia, Bikpela Jisas Krais, karim pen long ol sin bilong yupela bikos long lav bilong Em long yupela wanwan. Ol tupela, Papa and Pikinini, save long nem bilong yupela wanwan olsem Ol i bin save long nem bilong Profet Joseph Smith taim Tupela i bin kamap long em. Mi testifai olsem dispela em is Sios bilong Jisas Krais and olsem na Em i bai onaim ol kavanen yupela i mekim na mekim gut gen wantaim God. Yupela wanwan yet and olgeta bel na tingting bilong yupela wanwan bai senis long kamap moa olsem Sevia. Yupela bai kisim banis long temtesen and banis long pilim tubel long dispela trut. Yupela bai painim hamamas insait long Sabat. Mi promisim yupela stret insait long nem bilong Bikpela Jisas Krais, amen.