Setsie ho Nhyira no

“Wɔmmfa Nyankopɔn ne mbrasɛm no mma dɛ ɔntseetsee hɛn anaa dɛ ɔmbɛyɛ hɛn enyigye n’akwansiwdze. Dza ɔyɛ nokwar no nntse dɛm. Ɔno a ɔbɔɔ hɛn na Ɔdɔ hɛn emudzi mu ara no nyim mbrɛ osi ohia dɛ yɛbɔ hɛn bra ara yie ama yeenya enyigye kɛsenara no a yebotum enya no. Ɔama hɛn akwankyerɛ no, sɛ yedzi do a, ɔdze hɛn bodua ɔnnkyebo akwantu a ɔtaa yɛ huhuuhu yi mu no dwudwoodwo. Yɛkaa asɔr ndwom a yenyim no ne nsɛmfua: “Sie mbrasɛm no! Iyi mu na ahotɔ wɔ; iyi mu na asomdwee wɔ’ [hwɛ “Keep the Commandments,” Hymns, nkanee 303].”³

“Setsie yɛ nkɔnhyɛfo ahyɛnsew; ɔama hɔn ahoɔdzen na nyimdzee mfe dodow a etwa mu nyina no. Ohia tsitsir dɛ yebohu dɛ, hɛn so, yɛwɔ kyɛfa wɔ ahoɔdzen na nyimdzee fibea yi mu. Ɔnnyɛ dzen dɛ hɛn mu kor biara nsa botum akã ndɛ, sɛ yɛbɛyɛ setsie ama Nyankopɔn Ne mbrasɛm a. …

“Nyimdzee no a yɛrehwehwɛ no, nyiano no a yɛreper enya no, nye ahoɔdzen a yɛpɛ no ndɛ dze egyina taferbanyimbomu a ɔwɔ hɛn wiadze a ɔresesã na no mu ayɛ dzen mu no, botum abɛyɛ hɛn dze ber a, ɔpɛ mu ara yɛyɛ setsie ma Ewuradze Ne mbrasɛm no.”⁴

“Ndwom a edu hɛn mber mu nye biribiara ne nyɛɛ ho ngyetomu. Dawurbɔ nkrataa na tɛlɛbihyɛn ɔyɛkyerɛ da sene mu nkorɔfo a wɔagye dzin edzi, embirikatu mu ekunyin—a mbabun dodowara pɛ dɛ wosuasua hɔn—dɛ wobu Nyankopɔn ne mbra enyimtsia na woyi ndzeyɛɛ bɔn kyerɛ, a wonnhu no nsunsuando bɔn biara. Mma nngye ndzi! Nkontaabu ber wɔ hɔ—adze nyina ho nkontaabu mpo. Cinderella biara wɔ ne dasuom—sɛ ɔnnyɛ abrabɔ yi mu a, nna dza ɔtoado no mu a. Atsɛmbu Da no bɛba ama obiara. … Mototɔ serɛ hom dɛ hom nsan mu nyɛ setsie.”⁵

“Ɔyɛ a yɛbɔdwen dɛ hɔn a wɔwɔ wiadze no regye hɔn enyi kyɛn hɛn. Hɛn mu binom bɔdwen dɛ suban ho nhyehyɛɛ a hɛn a yɛwɔ Asɔr mu no dzi do no hyɛ hɛn. Mo nuanom, mepaa mu kã kyerɛ hom dɛ, mbom, biribiara nnyi hɔ a obotum dze dɛwdzi mbordo aba hɛn abrabɔ mu anaa asomdwee mbordo ama hɛn akra akyɛn Sunsum no a obotum aba hɛn hɔ ber a yedzi Agyenkwa no n’ekyir na yesie mbrasɛm no.”⁶

“Megye dase kyerɛ hom dɛ hɛn anohoba nhyira no, yɛtow ho abaw a orinnhyia. Ehum fua bɛhyehyɛ dze, nsutɔree bɔhwe hɛn dze, naaso hɛn nyimdzee wɔ asɛmpa no ho na hɛn dɔ ma hɛn Ɔsor Egya na hɛn Agyenkwa no bɛkyekye hɛn werɛ na wɔaboa hɛn na ɔdze dɛwdzi abrɛ hɛn akoma ber a yɛnantsew tɔɔtsen mu na yesie mbrasɛm no. Biribiara nnyi wiadze yi mu a obotum edzi hɛn do konyim.”⁷

“Woana nye Awerɛhow Nyimpa yi, a yaw abra no yi? “Woana nye Enyimnyam Hɛn no, Dɔm Ewuradze no?” Ɔyɛ hɛn Wura. Ɔyɛ hɛn Agyenkwa. Ɔyɛ Nyame ne Ba. Ɔyɛ hɛn Nkwagye ne Farbaa. Ɔfrɛ dɛ, “Dzi m’ekyir.’ Ɔkyerɛkyerɛ dɛ ‘Kɔ, na wo so kɛyɛ dɛmara.’ Ɔtotɔserɛ dɛ, ‘Sie me mbrasɛm.’

“Hom mma yendzi N’ekyir. Hom mma yensũasũa Ne fasusu. Hom mma yentsie N’asɛm. Yeyɛ dɛm a, yɛdze enyisɔ akyɛdze krɔnkrɔn ma No.”⁸