Ogya na Setsie ho Adzesuadze

Da bi President Thomas S. Monson kãa ber bi a osũaa setsie no ho hia a ohia tsitsir. Mber a odzii mfe awɔtwe no, n’ebusua kɔr nserahwɛ wɔ hɔn danba a ɔwɔ mbepɔw do. Nna ɔnye n’anyɛnkofo pɛ dɛ wosiesie bea bi a oefuw na wɔbɔ gya wɔ asese bea hɔ. Wɔbɔɔ mbɔdzen dɛ wɔdze hɔn nsa bɛtsetsew efuw no, womiaa hɔn ho dzendzen dɛ wɔbɔtwe na woetutu, naaso dza wonyaa ara nye mfuw kakrabaa. President Monson kyerɛkyerɛɛ mu dɛ, “Na afei dza modween dɛ ɔyɛ mbuae papa no baa me mfe awɔtwe adwen mu. Mesee Danny dɛ, ‘Dza yehia nyina nye dɛ yɛdze ogya bɔto mfuw yi mu. Yɛbɛhyew mfuw ne finimfin kakra ara!’”

Nna onyim dɛ ɔnnsɛ dɛ ɔsɔ makyis dze, naaso otuu mbirika kɔr danba no mu kɛfaa bi, na ɔnye Danny sɔɔ ogya wɔ bea a mfuw wɔ no. Nna hɔn enyi da kwan dɛ ogya noara bodum, mbom ɔhyewee yɛɛ kɛse na ɔgyee nsamu. Ɔnye Danny tuu mbirika kɔbɔɔ amandzɛɛ, na annkyɛr na mpanyimfo puei hɔ dɛ wobodum ogya no ansaana oekosou ndua no mu.

President Monson kɔr do dɛ, “Menye Danny sũaa adzesuadze pii a ɔyɛ dzen naaso ohia dɛm da no—a nnyɛ dza osuar koraa nye setsie no ho hia a ohia tsitsir.” (Hwɛ “Obedience Brings Blessings,” Liahona, Esusow Aketseaba 2013, 89–90.)

Tse dɛ President Monson no, ana enya adzesuadze wɔ setsie mu wɔ kwan a ɔyɛ dzen bi mu da? Ebɛn botae na ibotum ayɛ a ndaamba ibodua setsie do dze ahwɛ woho yie?