Nambawan Presidensi Toktok, Septemba 2016
Bihain long Lav, Wanem Samting Nau?
Ikam long Presiden Dieter F. Uchtdorf
Nambatu Kaunsela insait long Nambawan Presidensi
Profet bilong yumi we yumi lavim tumas, Presiden Thomas S. Monson, i tisim olsem “lav em i namel tru long gospel.”1
Lav em i impoten tru olsem na Jisas i bin kolim em “nambawan komanmen na komanmen we i bikpela moa” na em i bin tok olsem olgeta narapela hap bilong olgeta lo na toktok bilong ol profet i hangamap long em.2
Lav em i stap namel long strong bilong olgeta samting yumi save wokim insait long Sios. Olgeta plen bilong wok, olgeta miting, olgeta samting i kamap we yumi save wokim olsem ol disapol bilong Jisas Krais i mas kamap long dispela gutpela pasin—long wanem wantaim nogat siariti, “dispela klinpela na bikpela lav bilong Krais,” yumi pipia nating.3
Wantaim klia tingting long dispela wantaim het bilong yumi na lewa na bel bilong yumi, wantaim tokaut long soim lav bilong yumi long God na long ol narapela manmeri—bai yumi wokim wanem samting nau?
Bai em i nap long taim yumi pilim bikpela sori pasin na lav long ol narapela? Bai yumi soim wok o lukaut bilong yumi long God taim yumi tokaut long lav bilong yumi long God na long ol narapela manmeri?
Dispela em Stori bilong Tupela Pikinini Man
Long temple long Jerusalem, ol het pris na ol elda bilong ol Ju i kam long Jisas na traim long banisim Em long ol toktok bilong Em. Tasol, Sevia i tanim tebel i go bek long ol na tokim ol long dispela stori.
Na em i statim stori, “Wanpela man i bin gat tupela pikinini man.” Dispela papa i bin go long nambawan pikinini na askim em long go wok long plantesen wain. Tasol dispela pikinini man i sakim tok. Bihain dispela pikinini man “tanim bel, na i go.”
Bihain dispela papa i go long nambatu pikinini man bilong em na askim em long go wok long plantesen wain. Nambatu pikinini man i promisim em olsem bai em i go, tasol em i no bin i go.
Bihain Sevia i tanim i go long ol dispela pris na elda na askim ol, “Husat long ol dispela tupela pikinini man i wokim laik bilong papa bilong em?”
Bihain ol i bin tok olrait olsem em i bin nambawan pikinini man—dispela husat i bin tok bai em i no nap go tasol bihain em i bin tok sori na i bin go wok long plantesen wain.4
Sevia i yusim dispela stori long tok klia moa long wanpela impoten strongpela skul we em ol dispela lain husat i bihainim ol komanmen em ol husat i lavim tru God.
Ating dispela em long wanem Jisas i askim ol manmeri long ol i ken harim na bihainim ol toktok bilong ol Perisi na ol lain bilong raitim stori tasol long noken bihainim eksampol bilong ol.5 Dispela ol tisa bilong lotu i no bin save wokim wanem samting ol tisim. Ol i save laikim tru long toktok long ol lotu samting, tasol sori tru olsem ol i save popaia long namel tru bilong ol dispela samting.
Ol Pasin na Salvesen bilong Yumi
Insait long wanpela long ol laspela skul bilong Sevia long ol disaipol bilong Em, Em i toktok long ol long dispela laspela Jasmen. Ol lain nogut na ol stretpela lain bai i no inap stap klostu klostu. Ol gutpela na stretpela lain bai kisim laip oltaim oltaim; ol lain nogut bai i go insait long kalabus bilong oltaim oltaim.
Wanem samting i narakain long dispela tupela grup?
Ol dispela lain husat i soim lav bilong ol thru long pasin bilong ol Sevia i bin seivim ol. Ol dispela lain husat i no wokim dispela ol i bin kisim kot.6 Ol pasin bilong yumi long wanwan dei long laip bilong yumi bai soim witnes long trupela tanim bel long dispela gospel bilong Jisas Krais na ol gutpela bilong em na ol strongpela skul bilong em.
Long arere bilong olgeta samting, tokaut tasol long lav bilong yumi long God na ol narapela manmeri bai i no i nap givim yumi namba long eksoltesen. Long wanem, olsem Jisas i bin tisim yumi, “i no olgeta man husat i tok i kam long mi olsem, Bikpela, Bikpela, bai igo insait long kingdom bilong heven; tasol em husat i mekim laik bilong Papa bilong mi husat i stap long heven.”7
Wanem Samting Ikam bihain long Lav?
Bekim long dispela askim “Bihain long lav, wanem samting nau?” i ken luk isi tru na luk olsem tok stret. Sapos yumi lavim tru Sevia, yumi tanim ol lewa bilong yumi i go long Em na olsem yumi wokabaut long dispela rot olsem ol disaipol bilong Em. Taim yumi lavim God, yumi bai wok hat long bihainim ol komanmen bilong Em.8
Sapos yumi lavim tru ol narapela poroman na poromeri bilong yumi, yumi givim i go yumi yet long halivim “ol lain i nogat samting na ol lain i nidim samting, ol sik lain na ol lain i kisim mekim save.”9 Long ol dispela lain husat i mekim ol dispela gutpela pasin bilong sori pasin na sevis,10 ol dispela lain em ol disaipol bilong Jisas Krais.
Dispela em samting we i kam bihain long lav.
Dispela em namel tru bilong gospel bilong Jisas Krais.
© 2016 ikam long Intellectual Reserve, Inc. Olgeta toktok hia i bilong sios tasol. Printim long USA. Tok orait long Inglis: 6/16. Tok orait long tanim tokples: 6/16. Tanim tok bilong First Presidency Message, September 2016. Tok Pisin. 12869 878
Tising i kam long Dispela Toktok
Presiden Uchtdorf i soim insait bilong tok bilong ol trupela disaipol bilong Jisas Krais olsem ol dispela lain husat i soim lav bilong ol long Em na long ol narapela manmeri thru long ol pasin bilong ol. Em i tisim yumi olsem “sapos yumi lavim tru Sevia, bai yumi tanim ol lewa bilong yumi i go long Em na olsem bai yumi wokabaut long dispela rot olsem ol disaipol bilong Em. Tingim long askim ol dispela lain we yu wok long tisim ol long wanem kain wei lav i save strongim ol long wokabaut long rot olsem ol disaipol bilong Em. Yu ken sherim ol save bilong yu wantaim ol tu. Yu ken tingim tu long askim ol long prei long planti moa siariti na strong long mekim samting long soim lav long narapela.