Em Bai Putim Yu long Solda Bilong Em na Karim Yu igo long Ples

Ino long we long hap mi na famili bilong mi isave stap igat wanpela siti ol isave kolim Dresden. Ol lain husat istap long hap ol i witnesim ating klostu olsem tausen taim wanem samting mi bin lukim. Ol bikpeka paia tru, ol dispela tausen tausen bom isave wokim, isave go namel na raunim Dresden, na bagarapim planti moa long dispela ples na i lusim liklik tasol wantaim planti pipia na si bilong paia taim ol i pinisim raun bilong ol.

Long liklik taim tru, dispela siti wanpela taim bipo ol ibin save kolim “Bilas Bokis” inau pinis. Erich Kastner, wanpela German husat isave raitim ol buk, ibin raitim stori long dispela bagarap olsem, “Insait long tausen yia oli wokim nais tru dispela siti, long wanpela nait tasol em ibin kisim bagarap olgeta.” Long taim mi bin liklik mangi mi no bin nap long luk save long hau dispela bikpela bagarap bilong pait ol lain bilong yumi yet i statim bai yumi bin inap long kontrolim. Dispela graun raun long yumi ikamap olsem nogat hop long en na nogat bihain taim bilong em.

Las yia mi bin gat wanpela opotuniti long go bek long Dresden. Sevenpela ten yia behain long dispela pait, em i, wanpela taim moa, wanpela “Bilas Bokis” siti olsem bipo. Ol bagarap na pipia bilong pait ol ibin rausim ol, na dispela siti i kambek gen olsem bipo na tu kamap gut moa yet.

Long dispela visit bilong mi, mi lukim dispela naispela Lutheran sios Frauenkirche, em Sios bilong Mama Mary bilong Yumi. Bipo ol ibin wokim insait long ol yia 1700s, em ibin wanpela bilong ol naispela bilas bilong Dresden, tasol dispela pait i bringim em igo daun olgeta olsem wanpela liklik maunten pipia. Long planti yia em ibin stap olsem, inap bihain tru ol ibin tok strong olsem ol ibai wokim bek dispela sios Frauenkirche.

Ol ston we ikam long sios taim ibin bagarap, ol ikisim na putim gut na putim namba long ol, na we ol inap, ol i yusim ol long wokim bek dispela sios. Tude yu ken lukim ol dispela bilakpela ston ikam long paia istap makmak long arasait banis. Ol dispela “makmak” ino bilong yumi long tingim bek histori bilong dispela pait long dispela haus tasol, olsem tu wanpela samting bilong holim tingting long hop wanpela bikpela mak bilong strong bilong man long statim niupela laip ikam long si bilong paia.

Taim mi wok long tingim histori bilong Dresden na amamas long dispela smatpela tingting na strongpela tingting bilong ol dispela lain husat ibringim bek wanem dispela we i bagarap olgeta, mi pilim switpela pawa bilong Holi Gos. Tru tumas, mi ting olsem, sapos man iken kisim dispela bagarap, pipia, na wanem samting istap bihain long dispela bagarap bilong wanpela siti we ibruk pinis na wokim wanpela naispela tru samting we i sanap na lukluk igo antap long heven, hamas moa inap bilong Bikpela Papa we iken bringim bek ol pikinini bilong Em husat i pundaun, painim ol samting i hat tumas, o husat i lus?

Maski sapos iluk olsem laip bilong yumi is bagarap olgeta. Maski sapos ol sin bilong yumi i ret olgeta, ol kros bilong yumi i daunim yumi tru, yumi pilim olsem nogat man istap wantaim yumi, ol lain bilong yumi lusim yumi, o lewa bilong yumi ibruk. Olsem tu ol dispela lain husat i nogat hop, husat istap insait long taim nogut, husat i pilim olsem ol lain tanim baksait long ol, salim pinis gutpela pasin bilong ol, o tanim baksait long God; God iken bringim kambek gen. Ino gat laip we i bagarap tru we Em ino inap long bringim kambek, ol dispela wanwan pikinini man bilong birua tasol bai nogat.

Dispela gutpela nius bilong gospel em dispela: bikos long dispela plen bilong amamas oltaim oltaim ikam long Papa long Heven husat i lavim yumi na long dispela bikpela sakripais bilong Jisas Krais, yumi ino inap long kambek gen long pundaun bilong yumi na kamap bek long klinpela stap bilong yumi tasol, tasol bai yumi ken go antap moa yet long tingting bilong yumi na kamap olsem ol lain bilong kisim laip oltaim oltaim na yumi ken kisim dispela glori bilong God we i narakain olgeta.

Insait long ministri bilong Sevia, ol lida bilong lotu long taim bilong Em ino bin laikim olsem Jisas bai givim taim bilong em long ol lain we ol i kolim ol “ol lain bilong sin.”

Ating long ol em ibin luk olsem Em wok long larim na klostu olsem ino wari tumas long pasin bilong ol long mekim sin. Ating ol ibin bilip olsem nambawan wei long halivim ol lain bilong sin long sori long sin bilong ol em long daunim ol, rabisim ol, na semim ol.

Taim Sevia luk save long wanem tingting bilong ol dispela Perisi na ol lain bilong ol wok long tingting, Em i tokim ol long dispela stori:

“Wanem man namel long yupela, gat wan handred sipsip, sapos wanpela bilong ol i lus, bai yu ino inap lusim ol dispela nainti nainpela sipsip long wel bus, na go bihanim dispela we i lus, inap yu painim em?

“Na taim yu painim em pinis, em i putim antap long solda bilong em, na amamas.”

Long planti yia tru nau, ol man isave tanim dispela stori tasol olsem wanpela singaut long yumi long bringim bek ol sipsip i lus na putim han igo aut long ol lain we i lus. Taim dispela em i tru na stret na gutpela, mi wok long tingting gen sapos igat sampela moa tingting istap insait long dispela stori.

Ating em inap tru tu olsem het tingting bilong Jisas, nambawan na igo pas stret, em long tisim yumi long wok bilong dispela gutpela Man Bilong Was long Sipsip?

Ating em inap tru tu olsem Em iwok long testipai long lav bilong God long ol pikinini bilong Em husat i wok long bikhet?

Ating em inap tru tu olsem mesis bilong Sevia em i olsem, God i save tru olgeta long ol dispela lain husat i lus na Em ibai painim ol, olsem Em ibai putim han bilong Em igo aut long ol, na olsem Em ibai sevim ol?

Sapos dispela em i olsem, ol sipsip imas mekim wanem samting long kisim dispela santu halivim?

Na yu ting sipsip imas save long hau long yusim wanpela kain masin long skelim em yet? Na yu ting em imas gat save long yusim wanpela GPS o kampas long tokim em long hap em istap? Na yu ting em imas gat save long mekim wanpela wei long singautim halivim ikam? Na yu ting em i nidim tok olrait ikam long wanpela sapota bilong em bipo dispela Gutpela Man bilong Lukautim Sipsip ibai kam na sevim em?

Nogat. Nogat tru! Bikos dispela Gutpela Man bilong Lukautim Sipsip i lavim em, dispela sipsip i gat luksave ikam long antap na Em i ken seivim em.

Long mi, dispela stori bilong sipsip i lus em i wanpela wei igat planti hop insait long olgeta skripsa.

Sevia bilong yumi, dispela Gutpela Man bilong Lukautim Sipsip, i save na i lavim yumi. Em i save na i lavim yu

Em i save taim yu lus, na Em i save long wanem hap yu istap. Em i save long sori bilong yu. Ol askim bilong yu insait long tingting bilong yu. Ol poret bilong yu. Ol ai wara bilong yu.

Em ino impoten samting hau na yu go lus—sapos bikos long ol rabis sois bilong yu o bikos long samting we yu ino inap kontrolim.

Wanem samting is impoten em olsem yu pikinini bilong Em. Na Em i lavim yu. Em i lavim ol pikinini bilong Em.

Bikos Em i lavim yu, Em ibai painim yu. Em bai putim yu antap long solda bilong Em, na amamas. Na taim Em i bringim yu go long ples, Em bai tokim wanpela na olgeta, “ Amamas wantaim mi; long wanem mi painim sipsip bilong mi husat ibin lus.”

Tasol, ating yu wok long tingting olsem, wanem samting istap insait long dispela? Tru tumas mi bai mas wokim moa long stap tasol na wet long bai Em i kam seivim mi.

Taim Papa bilong yumi husat i lavim yumi i laikim olsem olgeta long ol pikinini bilong Em long go bek long Em, Em bai ino inap bosim wanpela bilong yumi long go long heven. God ino inap seivim yumi agens long laik bilong yumi.

Olsem na wanem samting bai yumi imas wokim?

Invitesen bilong Em i isi tru:

“Tanim ikam long mi.”

“Kam long mi.”

“Kam klostu long mi na Mi bai kam klostu long yu.”

Dispela em hau bai yumi soim Em olsem yumi laikim bai Em i seivim yumi.

Em i nidim liklik feit. Tasol noken wari. Sapos yu ino inap long bugim feit long nau yet, stat wantaim hop.

Sapos yu ino inap long tok olsem yu save olsem God istap, yu iken hop olsem Em istap. Yu ken laik long bilip. Dispela em inap long statim.

Dispela taim, wok nau long dispela hop, putim han igo aut long Papa long Heven. God ibai givim ikam lav bilong Em long yu, na wok bilong Em long seivim yu na senisim yu bai istat long wok.

Long sampela taim bihain, bai yu luk save long han bilong Em insait long laip bilong yu. Yu bai pilim lav bilong Em. Na dispela laik long wokabaut long lait bilong Em na bihainim wei bilong Em bai gro wantaim yu olgeta taim yu troim lek wantaim feit.

Yumi save kolim ol dispela troim lek wantaim feit “harim tok.”

Dispela em ino wanpela toktok we planti manmeri isave laikim long dispela taim. Tasol pasin bilong harim tok em i wanpela aidia yumi iken holim pas insait long dispela gospel bilong Jisas Krais bikos yumi save olsem “long dispela Atonmen bilong Krais, Em iken seivim olgeta man, long taim ol i harim tok long ol lo na odinens bilong dispela Gospel.”

Taim yumi antapim feit bilong yumi, yumi mas antapim tu pasin bilong feit bilong yumi. Pastaim mi bin toktok long wanpela German man husait i save raitim ol stori, na husat ibin karai tru long bagarap bilong siti Dresden. Em ibin raitim tu dispela hap tok “Es gibt nichts Gutes, ausser: man tut es.” Long yupela husat ino save long toktok dispela selestel tokples, dispela em i tanim long tok pisin olsem “Ino bai gat gutpela samting inap tasol taim yu mekim i kamap.”

Yu na mi iken toktok gut tru long ol samting bilong spirit. Yumi ken amamasim ol pipol wantaim strongpela save toktok bilong yumi long painim minin bilong ol samting bilong lotu. Yumi ken tok amamas long lotu na “driman long bikpela haus bilong yumi antap.” Tasol sapos feit bilong yumi ino senisim hau yumi save stap—sapos bilip bilong yumi ino senisim ol desisen bilong yumi long wanwan dei—lotu bilong yumi em i nating, na feit bilong yumi, sapos ino dai, em i tru ino stap gut na istap klostu long bagarap na bambai pinis olgeta.

Pasin bilong harim tok em i laipblut bilong feit. Long harim tok tasol bai yumi iken bugim lait ikam insait long sol bilong yumi.

Tasol sampela taim mi ting olsem yumi ino save save gut long pasin bilong harim tok. Yumi iken lukim pasin bilong harim tok olsem arere bilong wanpela samting, na ino olsem wei igo long arere bilong samting. O yumi iken hamaim strong tru dispela hama tingting bilong yumi long pasin bilong harim tok agens long strong bilong ol komanmen long traim long stretim ol lain bilong yumi we yumi lavim ol tumas, olsem yumi iken paitim ol inap ol i kamap holi na gutpela inap long go long heven.

I nogat tubel long dispela, igat sampela taim taim yumi nidim wanpela strongpela singaut long pasin bilong tanim bel. Tru, igat sampela lain husat ating i olrait long kisim ol long dispela wei tasol.

Tasol ating igat istap wanpela narakain tingting em iken tok klia long blong wanem yumi harim ol komanmen bilong God. Ating pasin bilong harim tok ino tumas olsem wei bilong, krungutim, tanim, na hamaim ol sol igo long samting we ino yumi. Tasol gen, em i wanpela wei long bai yumi painimaut ol i mekim yumi long wanem samting tru.

Yumi em Bikpela God i mekim yumi. Em i Papa bilong yumi long Heven. Yumi ol spirit pikinini bilong Em tru. Em i mekim yumi long ol samting bilong heven we i nambawan tru na piua na klin moa yet, na olsem na yumi karim insait long yumi dispela samting em i santu tru.

Tasol, hia long graun, ol tingting na pasin bilong yumi kamap hevi wantaim dispela we i korap, ino holi, na ino klin. Ol das na pipia bilong dispela wol i dotim sol bilong yumi, na mekim i hat tru long luk save na tingim bek rait bilong yumi long taim yumi bon na blong wanem stret na yumi stap long hia.

Tasol olgeta dispela ino inap senisim husat tru yumi wanwan istap. Dispela impoten samting em pasin tru bilong spirit bilong yumi we i mekim yumi bai stap olgeta taim. Na dispela taim yumi kisim long laik bilong yumi long tanim lewa bilong yumi igo long Sevia bilong yumi na putim lek bilong yumi antap long rot bilong ol disaipol bilong Em, samting we i narakain an olsem mirakol bai kamap. Dispela em taim lav bilong God bai pulumapim lewa bilong yumi, lait bilong trut bai pulumapim tingting bilong yumi, yumi bai stat long lusim laik long sin, na yumi bai ino inap long wokabaut long ples i tudak moa.

Yumi kamap nau long lukim pasin bilong harim tok ino olsem wanpela kalabus tasol olsem wanpela fri rot igo long santu ples bilong yumi. Na isi isi, ol samting i korap, ol das, na ol samting we i holim yumi bek bilong dispela graun bai stat long pundaun lusim yumi igo. Na bambai, dispela nambawan, spirit bilong oltaim oltaim bilong samting bilong heven we istap insait long yumi ibai kamaut, na wanpela kain amamas bilong ol gutpela pasin bai kamap olsem pasin bilong yumi.

Ol gutpela brata na susa bilong mi, ol gutpela poroman bilong mi, Mi testipai olsem God i lukim yumi olsem yumi husat stret— na Em i lukim yumi olsem yumi igat luksave long Em iken seivim yumi.

Ating yu wok long pilim olsem laip bilong yu istap long bagarap. Ating yu mekim sin. Ating yu wok long poret, kros, sori o pilim pen long tubel. Tasol olsem tasol dispela Gutpela Man bilong Lukautim Sipsip i panim sipsip bilong em we i lus, sapos yu bai litimapim tasol lewa bilong yu igo long Sevia bilong dispela wol, Em i bai painim yu.

Em i bai seivim yu.

Em i bai litimapim yu na putim yu long solda bilong Em.

Em i bai karim yu igo long ples.

Sapos ol han bilong dispela graun iken tanim ol pipia na ples i bagarap igo long wanpela naispela haus bilong lotu, dispela taim yumi ken igat bilip na tras olsem Papa bilong yumi long Heven iken na ibai mekim yumi gen. Plen bilong Em em long mekim yumi ikamap olsem samting moabeta long wanem yumi ibin stap nau— moabeta long wanem yumi iken tingim olgeta. Long wanwan taim yumi troim lek bilong feit long dispela rot bilong ol disaipol bilong Em, yumi bai gro igo long ol manmeri bilong glori bilong oltaim oltaim wantaim amamas we ino save pinis we Em ibin mekim yumi long kamap olsem.

Dispela em i testimoni bilong mi, blesing bilong mi, na daunim pasin preya bilong mi long tambu nem bilong Masta bilong yumi, long nem bilong Jisas Krais, amen.