Nambawan Presidensi Toktok, April 2016
Profesi na Revelesen Bilong Yumi Wanwan
Presiden Henry B. Eyring
Nambawan Kaunsela insait long Nambawan Presidensi
Trupela Sios bilong Jisas Krais i bin kam bek pinis nau na istap long dispela graun tude. Sios bilong Jisas Krais bilong Lata-Dei Sen i bin save olgeta taim i gat ol profet na ol aposol husat i stap laip na lidim, na ol i save olgeta taim kisim halivim bilong soim rot i kam long heven.
Dispela mak we i kam yet long God i bin tru tu long taim bipo. Yumi lainim insait long Baibel olsem: “Em i mas tru olsem Lod God i bai i no i nap wokim wanpela samting, tasol em bai autim tok hait bilong em i go long ol wokman bilong em, em ol profet” (Amos 3:7).
God i tok gen insait long taim bilong yumi, thru long Profet Joseph Smith. Em i autim thru long Profet Joseph dispela gospel bilong Jisas Krais long trupela piksa bilong em. Em i bringim bek holi prishud wantaim ol ki na olgeta lo, pawa, na wok bilong holi pawa bilong prishud.
Long taim bilong yumi, ol profet na aposol husat i stap laip, ol i gat atoriti long toktok, tis, na soim rot wantaim atoriti i kam long God Papa na Lod Jisas Krais. Sevia i bin tokim Profet, “Wanem mi Lod i tok, mi tok pinis, na mi i no nid long pogivim mi yet; na tasol ol heven na dispela graun i abrus i go pinis, toktok bilong mi i bai i no i nap abrus i go pinis, tasol olgeta samting bai kamap, sapos long maus bilong mi yet o long maus bilong ol wokman bilong mi, em i wankain” (D&C 1:38).
Long generol konferens long tupela taim long wanpela yia, yumi save kisim blesing wantaim opotuniti long harim toktok bilong Lod bilong yumi ikam long ol wokman bilong Em. Dispela em i spesol samting we i nogat prais bilong em. Tasol gutpela bilong dispela opotuniti em i stap long yumi yet, sapos yumi kisim ol dispela toktok ananit long pawa bilong dispela wankain Spirit we ol i bin givim igo long ol dispela seven (lukim D&C 50:19–22). Olsem tasol ol i kisim direksen i kam long heven, olsem tu yumi i mas wokim wankain. Na dispela em i nidim yumi long gat wankain strong bilong spirit.
“Wokim Sambai Wok bilong Yu”
Plant yia igo pinis nau, wanpela memba bilong Kwarum bilong Twelpela Aposol i askim mi long ridim konferens toktok em i wok long redim long givim long generol konferens. Mi bin wanpela niupela memba bilong Kwarum. Mi bin hamamas olsem em i bin gat bilip olsem mi bin inap long halivim em long painim ol toktok Lod i bin laikim em long tok. Em i smail na tokim mi olsem, “Man, dispela em namba 22 taim mipela lukluk long dispela toktok we i no pinis yet.”
Mi tingim bek long kaunsel wanpela naispela na gutpela Presiden Harold B. Lee (1899–1973) i bin givim mi bipo wantaim strongpela tok: “Hal, sapos yu laik kisim revelesen, wokim sambai wok bilong yu.”
Mi rid, tingim ol samting mi ridim, na prei long dispela namba 22 pepa we i no pinis yet. Mi ridim gut tru long olgeta save bilong mi ananit long pawa bilong Holi Gos. Long taim we dispela kwarum memba i givim toktok bilong em, mi bin wokim pinis olgeta sambai wok bilong mi. Mi no save sapos mi bin halivim em o nogat, tasol mi save olsem mi bin kisim senis taim mi harim toktok taim em i bin givim. Ol meseig i bin kam long mi long we moa long ol toktok mi bin ridim na em i bin givim. Ol toktok i bin gat bikpela minin moa long ol dispela we mi bin ridim long dispela toktok taim em i no bin pinis yet. Na meseig i luk olsem em i bilong mi, i nap long ol nid bilong mi.
Ol wokman bilong God i save lusim kaikai na prei long kisim meseig Em i gat blong ol long givim igo long ol lain husat i nidim revelesen na long liptimapim tingting bilong ol. Wanem samting mi bin lainim long dispela niupela samting, na long planti narapela olsem dispela, em olsem long kisim ol bikpela gutpela samting i stap, em long harim toktok bilong ol profet na aposol husat i stap laip, na yumi mas peim prais yumi yet long kisim dispela revelesen.
Lod i laikim tumas olgeta manmeri husat i ken harim meseig bilong Em, na Em i save long ol lewa na sindaun bilong ol dispela wanwan manmeri. Em i save wanem samting long stretim i stap, wanem tok bilong strongim bel ol i nidim, na wanem gospel trut bai i gutpela moa long halivim wanwan long ol dispela manmeri long kisim long laik bilong ol yet wanem wei igo long rot igo long laip oltaim oltaim.
Yumi husat i save harim na lukim ol dispela meseig bilong generol konferens sampela taim yumi save tingting gen bihain taim, “Wanem samting mi i tingim gut tru?” Hop bilong Lod long yumi wanwan em ansa bilong yumi bai olsem: “Mi bai i no i nap tru long lus tingting long ol dispela liklik taim we mi pilim maus bilong Spirit insait long tingting na lewa bilong mi i wok long tokim mi wanem samting mi nap long wokim long givim bel gut i go long Papa long Heven na Sevia.”
Yumi ken kisim dispela revelesen bilong yumi wanwan taim yumi harim ol profet na aposol na taim yumi wok wantaim feit long kisim dispela, olsem tasol Presiden Lee i bin tok yumi i ken. Mi save olsem dispela em i tru long save bilong mi na long witnes bilong Spirit.
© 2016 ikam long Intellectual Reserve, Inc. Olgeta toktok hia i bilong sios tasol Printim long USA. Tok orait long Inglis: 6/15. Tok orait long tanim tokples: 6/15. Tanim tok bilong First Presidency Message, April 2016. Tok Pisin. 12864 878
Tising long Dispela Meseig
Tingim long ridim aut stori bilong Presiden Eyring long taim em i ridim gut tru, dispela toktok bilong wanpela kwarum memba, we i no bin pinis yet. Yu ken tingting long askim olsem, “Wanem em prais bilong kisim revelesen?” Bihain long diskasin, yu ken invatim ol dispela lain we yu visitim ol long tingim ol samting yu ridim na mekim wanpela plen long kisim meseig i kam long wanpela generol konferens bihain taim “ananit long pawa bilong dispela wankain spirit we ol i givim long wokman bilong [God].”