Kamap olsem Eksampol na Lait

Ol brada na susa, emi gutpela tru long stap wantaim yupela gen. Olsem yu save pinis, taim yumi stap wantaim long mun April ikam inap nau, yumi bin painim sori long tripela bilaved Aposols: Presiden Boyd K. Packer, Elda L. Tom Perry, na Elda Richard G. Scott ol i lusim yumi. Ol i go bek long heven ples antap. Yumi misim ol. Yumi tenkim ol tru long ol eksampol bilong lav bilong Krais ol i soim na long ol tising we i halivim yumi stret, na ol i lusim wantaim yumi.

Yumi givim wantaim lewa bilong yumi welkam igo long ol niupela Aposol, Elda Ronald A. Rasband, Elda Gary E. Stevenson, na Elda Dale G. Renlund. Dispela ol man oli dediketim ol yet long wok bilong Lod. Ol igat save long go insait long ol dispela impoten posisen ol i makim ol long kisim.

Ino long taim igo pinis, taim mi wok long ridim na tingting tru long ol skripsa, tupela hap insait long skripsa iwok long stap yet wantaim mi. Tupela dispela skripsa mi save gut long ol. Nambawan em ikam long Toktok bilong Jisas long Maunten we em i tok: “Larim lait bilong yu i lait moa yet long poret bilong ol man, olsem bai ol i ken lukim ol gutpela wok bilong yu, na givim glori igo long Papa bilong yu istap long heven.” Nambatu skripsa em ikam long mi taim mi wok long tinting tru long minin bilong nambawan skripsa. Em ikam long Aposol Paul long Episel bilong em igo long Timothy: “Yu imas kamap olsem eksampol bilong ol bilip man meri, long toktok, long sori pasin, long spirit, long feit, long klin pasin.”

Mi bilip olsem, isait long dispela nambatu skripsa, em i tokim yumi, long hao yumi iken wokim kamap nambawan skripsa insait long laip bilong yumi. Yumi kamap olsem eksampol bilong ol bilip man meri long taim yumi kamapim gospel bilong Jisas Krais long toktok, long taim yumi toktok wantaim ol narapela, long sori pasin, long spirit, long feit na long klin pasin. Taim yumi wokim dispela, lait bilong yumi bai lait moa yet long ol narapela lain long lukim.

Yumi wanwan ikam daun long dispela graun wantaim Lait bilong Krais. Taim yumi bihainim eksampol bilong Sevia na stap olsem Em ibin stap na olsem Em ibin tisim ol man, dispela lait bai kamap olsem paia insait long yumi na bai laitim wei bilong ol narapela lain.

Aposol Paul i givim sixpela gutpela pasin bilong ol bilip man meri, ol gutpela pasin bai mekim lait bilong yumi lait moa yet. Nau bai yumi lukluk long ol dispela gutpela pasin.

Mi toktok pastaim long tupela long ol dispela gutpela pasin. Dispela tupela em— long yumi imas kamap olsem eksampol long toktok na taim yumi toktok wantaim ol narapela. Taim yumi toktok, ol toktok bilong yumi iken apim na halivim tru ol narapela lain, o iken bringim birua na semim ol narapela lain. Long dispela graun tede, igat planti moa yet ol tok nogut o pasin nogut istap raunim yumi long olgeta hap yumi lukluk. Emi hat stret long pasim yau long harim planti lain husat isave usim ol nem bilong God nating nating na nogat tingting bilong ol dispela lain. Ol kain kain tok nogut nau ikamap olsem toktok bilong olgeta dei long televisen, long ol muvi, long ol buk, na long ol musik. Yumi nau save tromoim ol rabis toktok na tok kros nambaut nambaut. Yumi imas toktok long ol narapela lain wantaim lav na rispek, olgeta taim usim ol klinpela toktok na traim long noken usim ol toktok we ibai givim bagarap na mekim kros ol narapela lain. Yumi imas bihainim eksampol bilong Sevia, husat ibin save toktok wantaim wanbel na gutpela pasin long taim bilong ministri bilong Em.

Narapela gutpela pasin Paul i toktok long em, em Siariti, dispela em oli save tok em “klinpela na bikpela lav bilong Krais.” Mi save tru olsem istap insait long ol haus lain bilong yumi wanwan na ol poroman bilong yumi igat ol lain we ol istap ol yet, ol lain we ol i sik stap, na ol lain husat ol i pilim olsem nogat hop bilong ol. Opotuniti bilong yumi istap long halivin ol dispela lain na liptimapim spirit bilong ol. Sevia ibin bringim hop igo long ol lain inogat hop na em i bin bringim strong igo long lain husat i nogat strong. Em i bin mekim sik lain olrait gen; Em i bin mekim ol lek nogut lain i wokabaut gen, ol ai pas long lukluk gen, ol yau pas long harim gen. Em i bin kirapim gen man idai pinis tu. Long olgeta ministri bilong Em, Em i bin givim siariti bilong em i go long lain husat i nidim halivim. Taim yumi bihainim eksampol bilong Em, yumi iken blessim ol narapela laip, na tu blessim laip bilong yumi yet.

Narapela, em yumi mas kamap olsem eksampol long spirit. Long mi dispela imin olsem yumi mas traim hat long bringim ikam insait long laip bilong yumi gutpela pasin, pasin bilong tok tenkyu, pasin bilong pogivim wanpela narapela, na pasin bilong givim igo long wanpela narapela. Ol dispela gutpela samting bai givim yumi spirit long soim ol lain husat istap wantaim yumi. Mi bin gat dispela opotuniti long ol yia igo pinis long save long planti lain husat igat dispela spirit. Yumi bai kisim wanpela kain spesol filing taim yumi istap wantaim ol dispela kain lain, filing we bai mekim yumi laik stap wantaim ol na bihainim eksampol bilong ol. Ol i save soim aut dispela Lait bilong Krais na iken halivim yumi long pilim dispela lav bilong Em long yumi.

Long soim piksa olsem ol narapela iken luk save long dispela lait we ikam long klinpela na bikpela spirit wantaim lav, mi sherim wantaim yupela wanpela stori bilong mi planti yia igo pinis nau.

Long dispela taim, ol lida bilong Sios ibin miting long Jerusalem long lukluk long agrimen bilong graun we oli bai bildim Senta bilong Sios long Jerusalem. Long kisim ol dispela tok olrait, Sios ibin mas tok olrait tu olsem bai ol memba bilong Sios husat ibai stap long dispela senta imas noken toktok long narapela lain long Sios. Bihain long dispela tok olrait istap pinis, wanpela long ol lain bilong gavman bilong Israel, husat isave gut long Sios na ol memba bilong Sios, i tok olsem em i save olsem Sios ibai onarim dispela tok olrait. “Tasol,” emi tok, ol sumatin husat ibai igo long skul long dispela hap, “bai yumi wokim wanem long dispela lait we istap insait long ai bilong ol?” Gutpela olsem dispela spesol lait iken lait olgeta taim insait long yumi, olsem bai ol narapela lain iken luk save na laikim.

Long kamap olsem eksampol bilong feit imin olsem yumi mas igat trast long Lod na long toktok bilong Em. Em imin olsem yumi mas igat dispela bilip na yumi mas lukautim dispela bilip long soim rot long ol tingting na long wanem samting bai yumi mekim. Feit bilong yumi long Lod Jisas Krais na long Papa God bilong yumi bai soim rot long olgeta samting yumi mekim. Namel long olgeta kainkain samting we iwok long kamap long dispela taim, kros pait long wanem samting i stret na wanem samting ino stret, na planti kain samting long olgeta dei, feit we i sanap strong ibai kamap olsem anga long laip bilong yumi. Tingim, feit na tingting bilong ino bilip ino inap long stap insait long tingting bilong yu long wanpela taim, bikos wanpela ibai sakim narapela. Mi tok gen toktok we yumi save kisim olgeta taim olsem long kisim na holim pasim feit yumi nidim, emi impoten long ridim na stadim na tingim tru ol skripsa. Toktok wantaim Papa God long preiya emi impoten tru. Yumi ino inap long sakim dispela ol samting, bikos man nogut wantaim ol lain bilong em iwok long wok hat long painim hul long karamap bilong yumi long kam insait, taim feit bilong yumi pundaun liklik. Lod itok, “Painim gut, prei olgeta taim, na bilip na olgeta samting bai wok wantaim long gutpela bilong yu.”

Laspela, yumi mas stap klin, dispela emi min olsem yumi mas klin long bodi, tingting, na spirit. Yumi save olsem body bilong yumi em tempol, yumi mas lukautim wantaim bikpela luk save na rispek. Tingting bilong yumi mas pulap wantaim tingting bilong liptimapim na putim yumi igo antap moa yet na imas nogat ol rabis samting long kam insait. Long bai Holi Gos long stap wantaim yumi olgeta taim, yumi mas kamap olsem gutpela man meri. Ol brada na susa, taim yumi stap klin bai pis istap insait long tingting bilong yumi na mekim yumi bai yumi iken kisim ol promis bilong Sevia. Em itok, “Ol lain oli igat klinpela hat, blessin ibai kam long ol: bikos ol bai lukim God.”

Taim yumi kamap olsem eksampol long maus, long toktok, long siariti, long feit, na long klin pasin, bai yumi kamap olsem ol lait igo aut long wol.

Nau mi tok olsem long yupela olgeta, na moa yet long yupela ol yangpela pipol, olsem taim wol i muv igo long we tru long ol bilip na ol rul Papa God ibin givim yumi, yumi bai sanap ples klia long ol narapela lain bikos yumi ino wankain olsem ol. Yumi bai sanap ples klia bikos ol klos bilong yumi i karapapim gut skin bilong yumi. Yumi bai sanap ples klia bikos yumi ino usim tok nogut na tu bikos yumi ino kisim ol simuk o ol narapela samting we iken bagarapim bodi bilong yumi. Yumi bai sanap ples klia bikos yumi stap long we long ol lain itok pilai nambaut na rabisim ol narapela lain. Yumi bai sanap ples klia bikos yumi tok bai yumi ino inap long pulumapim tingting bilong yumi wantaim ol nius we i korap na iken bagarapim bel bilong ol man meri na bai rausim Spirit long ol hom na laip bilong yumi. Bai yumi sanap ples klia steret taim yumi mekim disisen long ol gutpela pasin —we i bihainim gospel lo na pasin. Ol dispela samting we mekim yumi sanap ples klia long olgeta narapela lain long wol bai givim yumi dispela lait na spirit long mekim yumi lait moa yet long dispela wol we iwok long kamap tudak moa yet.

Sampela taim emi hat taim yumi ino wankain olsem ol narapela lain na yumi sanap yumi yet long namel long ol man meri. Em i olrait long pilim poret long wanem samting ol narapela lain ibai toktok or tingting olsem wanem long yu. Sampela gutpela toktok long bringim bel isi em istap long psalm: “Lod em lait bilong mi na salvesen bilong mi; bai mi poretim husat? Lod em strong bilong laip bilong mi; na bai mi poretim husat?” Taim yumi mekim Krais olsem namel long laip bilong yumi, olgeta poret bilong yumi bai raus na bilip bilong yumi bai kisim strong ikam insait.

Nogat wanpela bilong yumi igat stretpela laip, na sampela taim ol hevi na problem yumi kisim bai kamap olsem bai winim yumi, na bai lait bilong yumi bai ino inap lait strong. Tasol, wantaim halivim ikam long Papa God bilong yumi, wantaim sapot ikam long ol narapela, yumi iken kisim bek gen dispela lait we is laitim rot bilong yumi wanwan gen na givim lait long ol narapela we i nidim.

Long soim dispela, mi laik tokim yu long ol naispela toktok istap insait long wanpela stori we mi save laikim tumas na we mi bin ridim long planti yia igo pinis nau:

Ol brada na susa bilong mi, ol opotuniti bilong yumi long soim lait bilong yumi i stap klostu long yumi olgeta dei, long olgeta hap yumi stap. Taim yumi bihainim eksampol bilong Sevia, opotuniti bilong yumi istap long kamap olsem lait insait long laip bilong ol narapela lain, insait long ol femili bilong yumi na ol poroman bilong yumi, ol wanwok bilong yumi, ol lain yumi save tasol long ol, na tu ol lain yumi ino save stret.

Long yupela wanwan, mi tok olsem yu em pikinini man na pikinini meri bilong Papa God. Yu ikam long ai bilong em long kam na stap long dispela graun long sampela taim, long tingim bek lav na ol tising bilong Sevia, na tu long soim lait bilong yu wantaim olgeta strong bilong yu long olgeta man long lukim. Taim dispela taim bilong yu long graun i pinis, na sapos yu bin wokim wok bilong yu, yu bai kisim blessing wantaim glori long go bek na stap wantaim Em long taim oltaim oltaim.

Ol toktok bilong Sevia i givim gutpela filing: “Mi lait bilong wol: husat em i bihainim mi bai ino inap wokabaut long tudak, tasol bai igat lait bilong laip.” Mi tokaut long Em. Em i Sevia na Ridima bilong yumi, Em i mausman bilong yumi long Papa God. Em i eksampol bilong yumi na strong bilong yumi.Em i “lait we is lait moa long tudak.” Olsem bai yumi wanwan insait long maus bilong mi iken tok bai yumi bihainim Em, olsem bai yumi kamap olsem lait i lait moa yet long wol, em preya bilong mi insait long holi nem bilong Em, em yet Jisas Krais em Lod, amen.