Te Rongorongo ni Kakawari n Reirei, Ritembwa 2014
Ana Mition ae Tabu Iesu Kristo: Te Uea n Raoi
Tataromwaaka ni kamatebwaia te bwai n reirei aei ao n ukoukoria n ataia bwa tera ae ko na tibwauaia. E kanga am atatai ni maiun ao ana mwakuri te Tia Kamaiu ni karikirakea am onimaki Irouna ao ni kakabwaiaia naake ko tararuaia rinanon te reirei ni kakawari? Ibukin rongorongona riki tabeua, nakon .reliefsociety.lds.org.
“Te Tia Kamaiu bon ngaia te buoka ibukin te rau ae koaua,” e taku Unimwaane Quentin L. Cook man te Kooram n Abotoro n te Tengaun ma Uoman. “E ngae ngke inanon kakatai n te maiu, ibukin ana Mwakuri ni Kamaiu te Tia Kamaiu ao Ana akoi, te maiu ae raoiroi e na kanuanganaki ma te rau ae onoti.” N atakina ae Iesu Kristo bon te Uea n Raoi e kona ni buokira ni kunea te rau man te nano ao ni karikirakea ara onimaki Irouna.
E taku Iesu Kristo: “I atongi baikai nakoimi, ba kam na kareka te rau mai Rou te Tama. Ami b’ai i aon te aba te rawawata: ma kam na kabebetei nanomi; I a ti ni katea ana kai te aba” (Ioane 16:33). Ngke e kaota ana kakoaua iaon te koaua anne, Linda S. Reeves, te kauoman ni kauntira n te Bootaki n Aine ni kabuta, e taku: “E a tia n nanoangaai te Uea ao ni buokai ni kabebetea rawawatau. E a tia ni buokai n namakina te rau ae moan te bati.”
Unimwaane Richard G. Scott man te Kooram n n te Tengaun ma Uoman n Abotoro e reirei: “Te tabo ae kororaoi ibukin … te rau e bon mena inanon oon mweengara, ike ti a tia ni karaoa raoi ara kabanea ni konaa ni karaoa te Uea ae Iesu Kristo bwa ara moanibwai.”
Rakan riki Booki aika Tabu
Itaia 9:6; Ruka 2:14; Ioane 14:27; 1 Nibwaai 13:37; Doctrine ao Covenants 59:23
Man Koroboki aika Tabu
Itaia e taetae ni burabetia buangiakin Iesu Kristo, te Uea n Raoi (taraa Itaia 9:6). N te aba ae America, Tamuera te Reimwanaite e karakin kanikinaa ake a na raona bungiakin Kristo ni kaota nimaua te ririki man te tai are e taetae ni burabeti iai Tamuera (taraa Ereman 14:3, 5). Ngke e a uakaan te bong are e taetae ni burabetiaki iai (ibukin bungiakin Kristo), taan aki kakoaua a karaoa te mwakuri ni kakamaku nakoiia ni kabane Kiritian ana tiringaki ngkana a aki kaoti kanikinaa aikai. Te burabeti ae Nibwaai “e tang ni kakorakora nakon te Uea ni kabongnga; ao nooria, e roko bwanaan te Uea nakoina ni kangai: … N te ingabong ao N na roko nakon te aonaaba” (3 Nibwaai 1:12–13). A kaoti kanikinaa, ao ma bungiakin Kristo, “aomata a manga karekea te rau n te aba” (te kibu 23).
I Betereem, Maria “e bungia ana karimoa te mwaane, ao e niria n te kunnikai ae te ninira, ao e kawenea ni nen te man n amwarake” (Ruka 2:7).
© 2014 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/14. Kariaiakaki rairana: 6/14. Rairan teVisiting Teaching Message, December 2014. Kiribati. 10872 859
Iangoa Aio
Ni kawai ra ake e a tia ni uota te rau iai te Tia Kamaiu nakon maium?