Kaona te Aonaaba ma ana Tangira Kristo
Ngkana ti iangoa te Kiritimati, angin te tai ti iangoa anganakon ao karekean taian bwaintangira. Taian bwaintangira a kona n riki bwa mwakoron te katei ae kakawaki, ma a kona naba ni kamemeerea kakawakin te Kiritimati ao ni katabetabeira man bukamaruan bungiakin ara Tia Kamaiu n te kawai ae uaana.
I ataia bon man oin au taneiai bwa te kabanea ni Kiritimati ae bati n ururingaki e kona n riki bwa baike a moan mangori ibukin karakon te kaubwai. Taian bwaintangira ake I karekei (ibukin te Kiritimati) baika a bon tau man kainibaire ni boong aikai. N tabetai I karekea te kabaraaki ae ituaki ke taian nangoanibai ma nangoaniwae aika kakauoua. I uringa te Kiritimati teuana ae rangin onoti ngke e anganai mwaaneu ae ikawai te biti ae karaoaki man te kai ae e a tia ni kaaria.
A aki rangin kainnanoaki bwaintangira aika bobuaka ni kanakoraoan te Kiritimati. I kauringaki te rongorongo are e karakinna Unimwaane Glen L. Rudd, are e beku bwa te membwa n te Itingaun man 1987 nakon 1992. Te bong teuana imwaain te Kiritimati n ririki aika bati n nako, ngke e tararua ana auti ni kaikobwai te bitiobi, e reiakinaki mairoun te tia kairiiri n te ekaretia n taekan te utu ae rang kainnanoa te buoka are e a tia ni mwaing nakon te kaawa. Ngke e nako ni kawariia n aia auti ae uarereke, e kunea te tina ae akea buuna ma natina aika aman aika iaan 10 aia ririki ni maiu.
Te utu aei e bon rang kainnanoa te buoka n te aro are e a bon aki kona te tina ni kabooi bwaai ni kakukurei ke bwaintanigra ibukiia natina n te Kiritimati anne—e bon aki naba kona ni kabooa te kai ni Kakiritimati. E maroro te Tari Rudd ma te utu ao n reiakinaki bwa atainaine aika teniman a bae n tangira te taoree ke maan aika bwain takakaro. Ngke e titirakina te ataeinimwaane ae onoua ana ririki bwa tera ae tangiria, e kaeka te ataeinimwaane ae uarereke, “I tangira te boora n amwarake ae kanoana te oat.”
E berita nakoina te Tari Rudd bwa e na uota te amwarake ae te oat ao bwaai riki tabeua. Ngkanne e a nako n ana auti ni kaikobwai te bitiobi ao n ikotii amwarake ao tabeua bwaai ake a na kona ni buoki kainnanoia te utu aei aika a riai ni waekoa n reke.
N te moaningabong naba anne te Aomata ae Itiaki ae tituaraoi e anganna 50 te taaraa “ni buokan temanna ae kainnano.” Ni kabongana te anganano anne, te Tari Rudd e karin kunnikaia natina ao e nako ma ngaiia ni kabooi bwaintangira ni Kakiritimati—natina aika a rinerinei bwaintakakaro bwa a na anganiia ataei aika a kainnano.
Imwiin katokaan taian amwarake, kunnikai, bwaintanigra, te kai ni Kakirikitimati, ao tabeua bwaai ni katamaroa (ake a na katinetineaki n te kai ni Kakiritimati, a buti nako te utu ae Rudd nakon aia auti te utu aei. Ikanne ao a buoka te tina ma natina ni katea te kai ni Kakiritimati. Ngkanne a kaaki bwaintangira iaana ao n angan te ataeinmwaane aei te bakete n amwarake ae te oat ae bubura.
E tang te tina, a kukurei ataei, ao a bane n anenea te kuna ni Kiritimati. N te tairiki anne ngkai a tabe n ikotaki te utu ae Rudd ibukin te katairiki, a anga aia kakatau (nakon te Atua) ngkai a kona n uota tabeua kakukurein te Kiritimati nakon teuana te utu ao ni buoka te ataenimwaane ni karekea te boora n amwarake ae te oat.
Kristo ao Iangoan te Angaanga Bwai
Iangoa te kawai ae bebete ae kinaaki ae rineia Tamara are i Karawa ni karinea bungian Natina. N te tairiki ane e tabu anne, a kaoti anera tiaki nakoia aomata aika kaubwai ma nakoia taan kawakin tiibu. Te merimeri ae Kristo e bungiaki tiaki n te auti ae bubura ma inanon aia tabo maan n amwarake. E niraki tiaki n te kunnikai ae e tirika ma n te kunnikai te ninira.
Bebeten te moan Kiritimati anne bon moantaain kaotakin maiun te Tia Kamaiu. E ngae ngke e karika te aonaaba, e maiu inanon te karineaki ao te mimitong, ao n tei i angatain te Atua, E roko nako aon te aba n riki bwa te merimeri ae akea ana konabwai. Bon te banna ni katoto ni maiuna ae nanorinano man kinaaki, ao E nakonako ibuakoia ake a kainnano, ake a aoraki, aomata ake a nanokawaki, ao ake a kua man rawawata.
E ngae ngke Ngaia te uea, E aki tii tabe ma kamoamoakia ke kaubwaia aomata. Maiuna, Ana taeka, ao Ana mwakuri ni katoa tai bon katoto aika anainano man bebete ma a kinaaki man kakawaki.
Iesu te Kristo, are e bon kororaoi ana atatai bwa e na kanga n anga, ni katea te katoto ibukira n angaanga bwai. Nakoia naake a rawawata nanoia ma te mamaroa ao te nanokawaki, E uota te akoi ao te karaunano. Nakoia naake a rootaki rabwataia n te aoraki ma te korakai n aia iango, E uota te tangira ao te kamaiuaki. Nakoia naake a karawawataki nanoia ma te bure, E uota te kantaninga, te kabwarabure, ao kaboan maiura.
Ngke e mena ibuakora te Tia Kamaiu n te bong aei, ti na bon kunea n te tabo ike E memena iai n tainako—ni buokia ake a nimamannei, ake a nanokawaki, ake a taotaonakinnano, ake a karawawataaki, ao ake a nanorinano. N tain te Kiritimati aei ao n tainako, ti bia anganna te bwaintangira n tangiraia tabeman n aron are E tangira naba iai. Ti riai n uringa kinaakin bungiana ae mangori, bwaintangira ao maiuna. Ao ti riai, rinanon mwakuri n akoi aika bebete, ana tangira Iesu ae kororaoi, ao te nanoanga, ni kaona te aonaaba n ootan Ana tangira ao mwaakana ni kamaiu.
© 2014 iroun Intellectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/14. Kariaiakaki rairana: 6/14. Rairan te First Presidency Message, December 2014. Kiribati. 10872 859
Reirei man te Rongorongo Aei
E reirei Beretitenti Uchtdorf bwa ti riai n ira ana banna ni katoto te Tia Kamaiu n angaanga. Iangoia n titirakiniia aomata ake ko kawariia n ikaruoruo n atonga te bwaintangira are e a tia n anganiia te Tia Kamaiu, ao ni maroroakinna bwa a kanga ni kabongana te bwaintangira anne ni beku ibukiia tabeman. N aron te katoto, ngkana te membwa ae kakabwaiaki ma te taarena n te katangitang, teuanne ke neienne e kona n anenei kuna ni Kiritimati nakoia tabeman kaain rarikina. Ko kona naba ni katorobubua n tataro ma naake ko kawariia, ni bubutia te Atua ibukin ana kairi te Tamnei bwa a angara bwaintangira ake ko na tibwauai, ao antai ake ko na tibwauai nakoia. Okioki n ruamwiin ana kairi te Tamnei are ko karekei.