Cov Mus Saib Xyuas Tom Tsev tsab Xov, Yim Hli Ntuj 2014
Yexus Khetos lub Luag Hauj Lwm Los Saum Ntuj Los: Tus Mexiyas
Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab lub luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau xov xwm ntxiv, cia li txuas rau reliefsociety.lds.org.
Kev Ntseeg, Tsev Neeg, Kev Pab
Cov vaj lug kub qhia hais tias peb yuav nrog Vajtswv nyob “los ntawm txoj hauj lwm zoo, txoj kev hlub, thiab txoj kev zoo ntawm tus Mexiyas Dawb Huv” (2 Nifais 2:8). Mexiyas yog “ib lo lus Amaraic thiab lus Henplais uas txhais hais tias ‘tus pleev roj.’ … Nyob hauv Phau Tshiab Yexus hu ua tus Khetos, uas yog lus Kilis txhais tias tus Mexiyas. Lo lus no txhais hais tias yog tus Yaj Saub, Pov Thawj, Vaj Ntxwv, thiab Txhiv Dim.”1
Txwj Laug Jeffrey R. Holland ntawm Pawg Kaum Ob tug Thwj Tim ua tim khawv hais tias: “Kuv paub [Yexus Khetos] yog tus Dawb Huv ntawm Ixayees, tus Mexiyas uas ib hnub yuav rov qab los nrog yeeb koob tag nrho, kav hauv ntiaj teb uas yog tus Tswv ntawm cov tswv thiab tus Vaj Ntxwv ntawm cov vaj ntxwv. Kuv paub hais tias tsis muaj lwm lub npe nyob qab ntuj uas yuav cawm tau ib tug txiv neej [los yog ib tug poj niam].2
Thawj Tswj Hwm Dieter F. Uchtdorf, tus Pab Cuam thib Ob ntawm Thawj Pawg Thawj Tswj Hwm hais tias, “[Yexus Khetos] yog tus Cawm Seej thiab tus Txhiv Dim ntawm lub ntiaj teb. Nws yog tus Mexiyas uas tau cog lus yuav los. Nws ua neej dawb huv thiab theej peb lub txhoj. Nws yeej yuav nyob ntawm peb ib sab. Nws yuav tuaj peb tog. Nws yog peb txoj kev cia siab; Nws yog peb txoj kev cawm seej; Nws yog txoj kev.3
Vaj Lug Kub Ntxiv
Yauhas 1:38–41; 4:25–26, 40–42; 2 Nifais 6:13; 25:16–17
Los ntawm cov Vaj Lug Kub
Cov thwj tim ntawm Khetos uas yog poj niam yog cov uas ua tim khawv txog Nws lub luag hauj lwm ua tus Mexiyas. Maivliag Madalas yog ib tug thwj tim ntawm Yexus Khetos. Nws yog tib tug uas pom “daim txiag zeb uas npog lub rooj ntxa twb dov rau ib cag lawm” thaum sawv ntxov ntawm hnub uas Khetos Sawv Rov Los. Nws “sawv ntawm lub qhov ntxa sab nraud quaj” tom qab nws pom tias Yexus lub cev tsis nyob hauv lub ntxa lawm.
Ces “nws tig hlo los pom Yexus sawv ntawm nws ib sab, tiam sis nws tsis paub hais tias yog Yexus.
Yexus nug Maivliag hais tias, “Me ntxhais, ua li cas koj quaj? koj nrhiav leej twg? Maivliag xav hais tias Yexus yog tus txiv neej uas tu lub vaj ntawd, nws thiaj nug hais tias, Tus Tswv, yog koj muab nws mus tso rau qhov twg lawm, thov koj qhia rau kuv; kuv yuav mus nqa nws rov qab los.
“Yexus hais rau nws hais tias, Maivliag. Nws tig hlo mus saib Yexus thiab hais rau Yexus hais tias, Launpaunis; uas txhais hais tias, Xib Hwb.” Maivliag pom tias Nws tsis yog tus uas tu lub vaj tiam sis nws yog Yexus Khetos, tus Mexiyas. (Saib Yauhas 20:1–17.)
© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv : 6/14. Pub txhais ua lus Hmoob: 6/14. Kev txhais Visiting Teaching Message, August 2014. Hmong. 10868 295
Xav Txog Qhov No
Vim li cas peb yuav tsum to taub tus Cawm Seej lub luag hauj lwm ua tus Mexiyas?