Thawj Pawg Thawj Tswj Hwm tsab Xov, Yim Hli Ntuj 2014
Vajtswv txoj Kev Sau Qoob Loo
Muaj ib hnub ib tug poj niam hu ua Christa ua hauj lwm rau ib lub koom haum muag noob. Nws nyiam nws txoj hauj lwm. Ua rau nws xav tsis thoob vim txhua lub noob me me uas nws muag muaj peev xwm rais los ua ib qho txuj ci tseem ceeb—lauj pwm, zaub qhwv, los sis ib tug ntoo qheb loj loj.
Christa nyiam zaum ntawm nws lub computer txais ntaub ntawv muag noob thiab teb cov lus nug. Tiam sis muaj ib hnub nws txais lus tsis txaus txog ib qho teeb meem uas nws tsis to taub.
Tus neeg ntawd hais tias “Cov noob no tsis zoo. Kuv twb yuav cov no ob lub hlis tas los thiab tseem tsis muaj dab tsi.”
“Koj puas tau cog hauv av zoo thiab muab dej thiab kev tshav ntuj txaus?” Christa nug.
Tus tswv cuab hais tias, “Tsis tau, tiam sis kuv twb ua kuv txoj hauj lwm lawm. Kuv twb yuav cov noob. Koj twb cog lus tias cov noob no yuav loj hlob.”
“Tiam sis koj tsis tau cog cov noob los?”
“Tsis tau. Yuav ua rau kuv txhais tes lo av nev.”
Christa xav txog qhov no thiab txiav txim siab tias nws yuav tsum sau cov lus qhia txog kev cog cov noob. Nws txiav txim siab tias lo lus qhia thib ib yuav hais tias: “Koj yuav tsum ua raws li cov lus qhia cog noob kom cov noob ua yub. Koj tso tsis tau tej yam no ntawm lub txee xwb thiab xav tias cov noob yuav loj tuaj.”
Ces tsis ntev tom qab ntawd muaj ib qho teeb meem ntxiv uas nws tsis to taub.
Ib tug neeg hais tias, “Cov noob no tsis loj tuaj.”
“Koj puas tau cog cov noob hauv av zoo?” Christa nug. “Puas tau tso dej thiab kev tshav ntuj txaus rau cov noob?”
Tus neeg ntawd hais tias, “Tau mas. Kuv tau ua txhua yam—tib yam li tau qhia ntawm lub pob noob. Tiam sis cov noob tsis zoo.”
“Tsis muaj dab tsi los? Tsis ua yub los?”
Tus neeg ntawd hais tias, “Tsis muaj dab tsi. Kuv cog cov noob ib yam tau hais. Kuv cia siab tias kuv yuav muaj txiv lws suav thaum kuv noj hmo. Ua rau kuv poob siab heev.”
Christa teb hais tias, “Tos ib pliag. Koj hais tias koj cog cov noob hnub no xwb?”
Tus neeg ntawd teb hais tias, “Tsis yog li ntawd. Kuv cog cov noob ib lub lim tiam tas los. Kuv tsis tau xav tias kuv yuav muaj cov lws suav hnub thib ib ntawd; kuv ua siab ntev. Kuv qhia koj hais tias, kuv twb ywg dej thiab tos ntsoov txij thaum ntawd los txog tam sim no.”
Christa paub tias nws yuav tsum sau ib lo lus qhia ntxiv: “Cov noob no yuav loj tuaj raws li tej kev cai ntawm lub ntiaj teb. Yog koj cog cov noob thaum sawv ntxov thiab xav tias koj yuav noj txiv lws suav thaum tib lub lim tiam ntawd, koj yuav poob siab. Koj yuav tsum ua siab ntev thiab tos kom yuav muaj raws li ntuj tsawb teb tsim.”
Txhua yam zoo mus txog thaum Christa txais ib qho teeb meem ntxiv.
Tus neeg pib hais tias, “Ua rau kuv poob siab txog nej cov noob. Kuv tau cog cov noob ib yam li tau qhia ntawm lub pob noob. Kuv ywg dej rau cov noob, muab tshav ntuj, thiab tos ntsoov mus txog thaum sau qoob loo.”
Christa hais tias, “Zoo li koj twb ua txhua yam yog lawm.”
Tus neeg ntawd hais tias, “Yog los mas. Tiam sis kuv twb tau taub ntsuab xwb!”
Christa hais tias, “Kuv cov ntaub ntawv qhia hais tias koj twb yuav cov noob ntawd.”
“Tiam sis kuv tsis xav tau cov taub ntsuab; kuv xav tau cov taub dag!”
“Kuv tsis to taub.”
“Kuv twb cog cov noob rau hauv kuv thaj av taub dag—yog tib co av uas tau tuaj taub dag xyoo tas los. Kuv qhuas cov noob txhua hnub, qhia cov noob tias lawv yuav rais los ua cov taub dag zoo nkauj heev. Tiam sis kuv tsis tau cov taub dag uas loj, kheej, thiab xim daj, kuv tsuas tau cov tuab ntsuab. Tau ntau kawg li!”
Ua rau Christa paub tias tej zaum qhov uas nws sau cov lus qhia yuav tsis txaus thiab yuav tsum hais lo lus ntsiab cai no: “Cov qoob loo uas koj sau nyob ntawm seb koj cog cov noob twg thiab lub sij hawm uas koj cog cov noob.”
Txoj Kev Cai txog Kev Sau Qoob Loo
Tus Thwj Tim Povlauj qhia txog Vajtswv cov qoob loo:
“Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb.
“Tus uas tseb tej uas neeg lub siab nyiam, tus ntawd yeej yuav tau sau kev ploj kev tuag; tiam sis tus uas tseb tej uas Vaj Ntsuj Plig nyiam, tus ntawd yuav tau sau txoj sia nyob mus ib txhis.
“Yog li ntawd, cia peb tsis txhob nkees ua tej hauj lwm zoo; yog peb pheej ua tsis tso tseg, muaj ib hnub peb yeej yuav tau sau xwb” (Kalatias 6:7–9).
Niaj hnub no, tus Tswv tau muab tswv yim thiab kev txawj ntse txog txoj kev cai uas hloov tsis tau no:
Muaj ib txoj kev cai, tau tshaj tawm nyob saum ntuj ceeb tsheej ua ntej lub ntuj no tsim teb raug uas hloov tsis tau, uas yog tag nrho tej koob hmoov lub hauv paus—
Thiab thaum peb tau ib txoj koob hmoov los ntawm Vajtswv, yog los ntawm txoj kev ua raws li txoj kev cai ntawd uas yog txoj koob hmoov ntawd lub hauv paus (saib Q&K 130:20–21).
Peb cog dab tsi, peb yuav sau tej ntawd.
Vajtwv cov qoob loo yeej muaj yeeb koob heev. Rau cov uas hwm Nws, “Vajtswv yuav foom koob hmoov nplua mias rau nej, kom nej muaj nplua mias siv tsis tas. … Nej muab lub luaj li cas luj rau lwm tus lawm, Vajtswv yuav muab lub luaj li ntawd luj rau nej” (Lukas 6:38).
Ib yam li yuav tsum siv zog thiab ua siab ntev tos ntsoov rau cov noob ntawm lub ntiaj teb, yeej yuav tsum ua li ntawd rau cov koob hmoov saum ntuj ceeb tsheej. Peb tso tsis tau txoj kev ntseeg tseg thiab xav tias peb yuav txais tau cov koob hmoov ntawm sab ntsuj plig. Tiam sis yog peb yuav cog thiab tu peb cov ntsiab cai ntawm txoj moo zoo hauv peb tsev neeg, ces peb cov me nyuam yuav loj hlob tuaj txi txiv ntawm sab ntsuj plig uas muaj nqi rau lawv thiab tej tiam nyob yav tom ntej tiag.
Tsis yog txhua lub sij hawm Vajtswv yuav teb kiag peb tej lus thov tam sim ntawd—tej lub sij hawm zoo li tsis muaj tej lus teb hlo li—tiam sis Vajtswv paub ua qhov zoo tshaj plaws rau Nws cov me nyuam. Muaj tseeb tiag, muaj ib hnub peb yuav pom meej; thiab thaum hnub ntawd peb yuav paub Vajtswv txoj kev zoo siab lub siab dawb.
Niaj hnub no, peb lub hom phiaj thiab peb txoj kev xyiv fab loj heev yog qhov uas peb ua raws li peb tus Xib Hwb thiab tus Cawm Seej tau ua thiab ua neej zoo thiab dawb huv kom peb txais tau cov qoob loo uas muaj nqi heev los ntawm Vajtswv cov koob hmoov zoo kawg nkaus.
Peb cog dab tsi, peb yuav sau tej ntawd.
Qhov ntawd yog txoj kev cai ntawm ntuj ceeb tsheej.
Nov yog Vajtswv txoj kev cai txog kev sau qoob loo.
© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub txhais ua lus Akiv: 6/14. Pub txhais ua lus Hmoob: 6/14. Kev txhais First Presidency Message, August 2014. Hmong. 10868 295
Qhia los ntawm tsab Xov No
Sib tham nrog cov uas koj mus xyuas txog qhov uas Vajtswv txoj kev cai txog kev sau qoob loo nruab rau kev txheeb ze, kev hloov siab los ntseeg thiab lus tim khawv, los yog kev ua hauj lwm thiab hom phiaj kawm ntawv li cas. Koj nyeem thiab xav txog cov vaj lug kub uas qhia txog txoj kev cai no los tau, xws li Paj Lug 11:18; 2 Kauleethaus 9:6; thiab Amas 32. Hais kom lawv rov qab xyuas cov hom phiaj tas los thiab cuab hom phiaj tshiab kom ua ncaj ncees. Pab lawv npaj txoj hau kev kom ua ncaj thiaj li ua raws li lawv tej hom phiaj.