2014
Misin Sarawi en Sises Krais: Silepen Sihpw Mwahu
February 2014

Iren Mahsen en Padahk en Pas, Pepweri 2014

Misin Sarawi en Sises Krais: Silepen Sihpw Mwahu

Onopiki ni kapakap audepen padahk wet oh rapahki en ese dah me komwi en ehukihieng mehteikan. Ia duwen wehwehki mour oh misin en Sounkomouro eh pahn kalaudehla omw pwoson Ih oh kapaiada irail akan me komw kin tetehk sang padahk en pas? Pwehn alehdi iren kapehse kapatapat, tehk reliefsociety.lds.org.

Sises Krais, Silepen Sihpw Mwahuo, padahngki:

“Ma emen kumwail mie nah sihpw epwiki, a emen ahpw salongala dahme e pahn wia? E soh pahn pwilikihdi me duwehk duwemeno nan eh kehl, oh kohwei rapahkiseli me salongalahro, e lao diar? …

Eri, kumwail en ese … nanleng pahn perenkihda koluhla oh wiliakapwalahn me dipan emen” (Luk 15:4, 7).

Ni atail pahn kedkedeo wehwehki me Sises Krais iei Soun Silepe Mwahuo, kitail kin ahpwete inangih en idawehn Sapwellime karasaras oh papah irail akan me anahn. Sises mahsanih: “Ngehi me silepen sihpw mwahu…I ese nei sihpw kan oh irail pil kin ese ie. Oh I pahn tounmeteikihla ei mour pwehki irail” (Sohn 10:14–15). Pwehki Tomw en Krais, sohte emen rehtail me pahn salongala douluhl oh sohte kak pwurehng diar ahl en kohla nihmwatailo (tehk Luk 15).

President Thomas S. Monson mahsanih, “Atail iei pwukoa en apwalih pelin mahn akan. … Emenemen kitail en sokala mwowe ong papah.”

Sang Pwuhk Sarawi Kan

Melkahka Kan 23; Aiseia 40:11; Mosiah 26:21

Sang Atail Poadoapoad

Elizabeth Ann Whitney, me iang towehda keieu en mihting en Pwihn en Sawas en Lih, mahsanih duwen ah wiliakapwala nan 1830: “Ni ansouohte me I rong Rongamwahuo ni Elder Kan arail kalohk, I esehier me iei kapitien Silepen Sihpw Mwahuo.” Elizabeth idawehnla kapitien Silepen Sihpw Mwahuo oh pepdaisla oh kasarawi en wiahla towe.

Kitail pil kak rong kapitien Silepen Sihpw Mwahuo oh ehukihieng mehteikan Sapwellime padahk kan. President Monson mahsanih, “Kitail me wia limen Kauno pohn sampah, oh ahniki pwukoa en papah oh pwokada Sapwellime serihkan.”

Duwehte silepen sihpw men eh kin rapahki sihpw salongala, pahpa oh nohno kakete rapahki serihmen me sansalongseli. President James E. Faust (1920–2007), Sounsawas Keriau nan Presidensi Keieu, mahsanih: “Ong irail pahpa oh nohno kan me mohngiong ohlahr me kin mour mwahu, nantiong, oh kapakapki arail padahkih neirail seri sapeik kan, se patohwan ong kumwail, Silepen Sihpw Mwahuo ketin mwahngih irail. Koht mwahngih oh wehwehki amwail nsensuwed laud. Mie koapwoaroapwoar.”

© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen Visiting Teaching Message, February 2014. Pohnpeian. 10862 885

Iren sawas akan

  1. Thomas S. Monson, “Heavenly Homes, Forever Families,” Liahona, Suhn 2006, 70.

  2. Elizabeth Ann Whitney, nan Daughters in My Kingdom: The History and Work of Relief Society (2011), 128.

  3. Thomas S. Monson, “What Have I Done for Someone Today?” Liahona, Nohpempe 2009, 86.

  4. James E. Faust, “Dear Are the Sheep That Have Wandered,” Liahona, Mei 2003, 68.

Dahme I Kak Wia?

  1. Ia duwen wehwehki me Sounkomouro iei Silepen Sihpw Mwahuo eh kin wahdo popohl nan atail mour?

  2. Ni soangen wiepe dah me kitail kak apwalih irail akan me “salongasang” kemwekid kan en Mwomwohdiso oh me sohte wia kisehn atail pelien lamalam?

  3. Ia duwen ahi kak utung pahpa oh nohno kan me neirail serihkan salongasangehr momourki rongamwahuo?