Iren Mahsen en Presidensi Keieu, Pepweri 2014
Papahki Kauno Limpoak
Kauno Sises Krais padahngki, “Pwe me kin men doarehla pein eh mour, e pahn pwupwusang; a me pahn pangala eh mour pwehki ngehi, e pahn ale” (Luk 9:24).
“I kamehlele”, mahsanih President Thomas S. Monson, “me Sounkomouro mahmahsanih me ma kitail sohte pahn salongala nan atail papah mehteikan, atail mour pahn sohte katepe. Irail akan me kin momourkihte pein irail kin kedkedeo mengila oh ni karasepe katiasang arail mour, ahpw irail akan me kin salongala nan arail papah mehteikan kin kekeirda oh pweida— oh kin imwila doarehla arail mour.”
Nan lepin mahsen me sansal pah sang kalohk en President Monson, e katamankihong Souleng en Imwin Rahn Akan me irail wia limen Kauno oh me kapai kan en mour soutuk awiawih irail akan me kin papah mehteikan ni loaloapwoat.
Papah nan Tehnpas Sarawio
“Papah laud kin wiawi ansou me kitail kin kapwaiada tiahk sarawi kan ong irail akan me mihlahr palio irepen nanpwungen sampah oh nanleng. Ansou tohto kitail sohte kin ese ong ihs me kitail kapwaiadahr doadoahko. Kitail sohte kin kasik kaping, de pil ahniki koapwoaroapwoar me irail pahn alehda me kitail meiroangkihier. Ahpw, kitail kin papah, oh nan mwekid wet kitail kin alehdi soahng me kin kohda sang ni sohte ehu doadoahk tohrohr: kitail kin wiahla sounkomour kan pohn Nahna en Saion. Atail Sounkomouro meiroangkihiong kitail Sapwellime mour, eri kitail, ni wiepe tikitik, kin pil wia duwehte ni atail kin weliandi me melahr akan nan tehnpas sarawi wia doadoahk ong irail akan me sohte ahniki wiepen keirda ma kitail me mih pohn sampah sohte pahn wiahda doadoahko ong irail.”
Kitail Me Iei Limen Kauno
“Riei ohl oko oh lih oko, kitail kapilkipenehr irail akan me anahne atail nsenoh, kangoang, utuht, epwel, oh kadek—rehn tohn peneinei, kompoakapah kan, aramas me kitail ese, de pil aramas me kitail sehse. Kitail me wia limen Kauno pohn sampah, oh ahniki pwukoa en papah oh pwokada Sapwellime serihkan. E ketin pahpahsan emenemen kitail. …
“Papah wet me kitail koaros malipilipohngehr iei en papah Kauno Sises Krais.”
Papah Pahn Edin Sounkomouro
“Nan Sampah Kapw de America, Kaun kaiasadahro ketin mahsanih, ‘Kumwail kin ese mehkan me kumwail en wiahda nan ei mwomwohdiso; pwe kumwail en pil wiahda doahngkan me kumwail kilang I wiahier; pwe me kumwail kilangehr I wia iei me kumwail en kin wia.’ [3 Nephi 27:21].
“Kitail kin kapaiada mehteikan ni atail kin wie papah pahn edin ‘Sises mehn Nasaret … [me] ketiseli wasa koaros, ketin wiahda me mwahu.’ [Wiewia Kan 10:38]. Koht en ketin kapaikitailda en diar peren ni atail papah Samatail Nanleng ni atail pahn wie papah Sapwellime serihkan pohn sampah.”
Anahnepen Papah
“Kitail anahne en alehdi ansou mwahu en papah. Ong irail towe kan me solahr kin iang sarawi de me sohte kin kihla arail koaros oh sohte poadedi, kitail kak kapakapki wiepen sair irail. Peki irail en papah ni wiepe sohte lipilipil kakete wia kangoang me irail anahne pwehn pwuralahng towtowe kemwekid kan en mwomwohdiso. Ahpw irail kaun kan me kak sawas ni wiepe wet kin ekei pak kahng wia met. Kitail anahne tamataman me aramas kin kak wekila. Irail kak pwilikihdi mwekid suwed kan. Irail kak koluhkihla oh soikala sapwung kan. Irail kak kol priesthood ni warohng. Oh irail kak papah Kauno ni pwerisek.”
Kitail Wiewia Koaros me Kitail Konehng Wia?
“Sampah anahne atail sawas. Kitail wiewia koaros me kitail konehng wia? Kitail kin taman lepin mahsen kan en President John Taylor: ‘Ma ke sohte kapwaiada mwahu ahmw pwukoa malipilip kan, Koht pahn kepwukoahkinuhk irail koaros me ke mwein kakete doarehla ma ke uhdahn wiahda ahmw pwukoa’? [ Teachings of Presidents of the Church: John Taylor: John Taylor (2001), 164]. Mie neh kan en kakehlailih, peh kan en koledi, moahng kan en kangoange, mohngiong kan en kamarainih, oh ngehn kan en doarehla. Kapai kan en mour soutuk awiawih komwi. Ahmw iei ansou mwahu en wia kaidehn soun poudiahl ahpw tohn doadoahk pohn mwoahl en … papah.”
© 2014 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen First Presidency Message, February 2014. Pohnpeian. 10862 885
Padapadahk sang Iren Mahsen Wet
“Ma komw ahniki limpoak en Krais, komw pahn kaunop mwahu en padahngki rongamwahuo. Komw pahn kamarainda en sewese mehteikan en ese Sounkomouro oh idawehn Ih.” Medewe en kapakapki laudlahn limpoak mehlel ong irail akan me komw kin pwarek. Ni omw pahn kairada limpoak en Krais ong irail, komw pahn ahpwete kak en papah ni wiepe katapan ong Kauno oh ong irail akan me komw kin padahkih.