2014
Yexus Khetos lub Luag Hauj Lwm Los Saum Ntuj Los: Tus Yam Ntxwv
January 2014

Cov Mus Saib Xyuas Tom Tsev tsab Xov, Ib Hlis Ntuj 2014.

Yexus Khetos lub Luag Hauj Lwm Los Saum Ntuj Los: Tus Yam Ntxwv

Ua tib zoo thov Vajtswv kawm tej yam no thiab nug seb koj yuav tsum qhia dab tsi. Qhov uas koj to taub tus Cawm Seej lub neej thiab lub luag hauj lwm yuav ua rau koj txoj kev ntseeg Nws loj tuaj thiab foom koob hmoov li cas rau cov uas koj saib xyuas tom tsev? Kom tau ntaub ntawv xov xwm ntxiv cia li txuas rau reliefsociety.lds.org.

Thaum peb to taub tias Yexus Khetos yog peb tus yam ntxwv rau txhua yam, peb txoj kev xav nrog Nws mus yuav loj tuaj. Cov vaj lug kub muaj tej lus qhia kom peb ua raws li Khetos tus yam ntxwv. Rau cov Neeg Nifais, Khetos hais tias, “Tej hauj lwm uas nej tau pom kuv ua tej ntawd nej kuj yuav tsum ua thiab” (3 Nifais 27:21). Yexus hais rau Thumas hais tias, “Kuv yog txoj kev, yog qhov tseeb thiab yog txoj sia; tsis muaj leej twg mus cuag tau Leej Txiv tsuas yog mus ntawm kuv mus xwb thiaj tau” (Yauhas 14:6).

Hnub no peb cov thawj coj ua rau peb nco qab ua raws li tus Cawm Seej tus yam ntxwv. Linda K. Burton, Koom Haum Niam Tsev tus tuam thawj tswj hwm hais tias, “Thaum peb txhua tus muaj tej lus qhuab qhia ntawm txoj Kev Theej Txhoj sau tseg tob tob rau hauv peb tej siab lawm ces, peb yuav los ua tau cov neeg uas tus Tswv xav kom peb ua.”

Thawj Tswj Hwm Thomas S. Monson hais tias, “Peb tus Tswv thiab tus Cawm Seej, Yexus Khetos, yog peb tus Yam Ntxwv thiab peb lub zog.”

Xav kom peb cog lus tias peb yuav los nyob ze Yexus Khetos, ua raws li Nws cov lus txib, thiab siv zog rov qab mus cuag peb Leej Txiv Saum Ntuj Ceeb Tsheej.

Los ntawm cov Vaj Lug Kub

2 Nifais 31:16; Amas 17:11; 3 Nifais 27:27; Maulaunais 7:48

Los ntawm Peb zaj Keeb Kwm

“Nws tau qhia tias yuav tsum taug txoj kev twg thiab nws coj peb mus” yog qhov uas Eliza R. Snow, tus tuam thawj tswj hwm thib ob ntawm lub Koom Haum Niam Tsev, hais txog Yexus Khetos txoj kev qhuab qhia nyob hauv lub ntiaj teb no. Nws txhawb pab txhua tus—ib tug dhau ib tug. Nws qhia tias peb yuav tsum tseg cuaj caum cuaj tus mus cawm tus uas ua loj leeb (saib Lukas 15:3–7) Nws kho cov neeg mob thiab qhia lawv, nws twb siv sij hawm rau txhua leej txhua tus nyob hauv ib pawg ntawm 2,500 tus neeg (saib 3 Nifais 11:13–15; 17:25).

Hais txog cov poj niam uas yog Haiv Neeg Ntseeg hauv Hnub Nyoog Kawg, Thawj Tswj Hwm Dieter F. Uchtdorf, tus Pab Cuam thib Ob hauv Thawj Pawg Thawj Tswj Hwm, hais tias, “Nej cov muam muaj kev khuv leej pab lwm tus, tsis yog vim nej xav pab nej tus kheej.” Nej coj raws li tus Cawm Seej tus yam ntxwv. …Nws yeej xav pab lwm tus.”

© 2014 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/13. Pub txhais ua lus Hmoob: 6/13. Kev txhais lus Visiting Teaching Message, January 2014. Hmong. 10861 295

Lus Cim

  1. Linda K. Burton, “Is Faith in the Atonement of Jesus Christ Written in Our Hearts?” Ensign los sis Liahona, Kaum Ib Hlis Ntuj 2012, 114.

  2. Thomas S. Monson, “Meeting Life’s Challenges,” Ensign, Kaum Ib Hlis Ntuj 1993, 71.

  3. “How Great the Wisdom and the Love,” Hymns, naj npawb 195.

  4. Dieter F. Uchtdorf, “Happiness, Your Heritage,” Ensign los sis Liahona, Kaum Ib Hlis Ntuj 2008, 120.

Kuv Yuav Ua Dab Tsi?

  1. Ua li cas thiab vim li cas Yexus Khetos yog kuv tus yam ntxwv?

  2. Qhov uas kuv txhawb pab cov viv ncaus uas kuv mus xyuas yuav pab kuv nrog tus Cawm Seej mus li cas?