Mesazhi i Vizitave Mësimore, Dhjetor 2013

Misioni Hyjnor i Jezu Krishtit: Biri i Vetëmlindur

Studiojeni me lutje këtë material dhe kërkoni të dini ç’të thoni prej tij. Si do ta rrisë të kuptuarit e jetës dhe të misionit të Shpëtimtarit besimin tuaj tek Ai dhe t’i bekojë ato për të cilat kujdeseni përmes vizitës mësimore? Për më tepër informacion, shkoni tek reliefsociety.lds.org.

Besim, Familje, Ndihmë

Shpëtimtari ynë, Jezu Krishti, është quajtur Biri i Vetëmlindur sepse Ai është i vetmi person në tokë që ka lindur nga një nënë e vdekshme dhe një Atë i pavdekshëm. Ai trashëgoi fuqi hyjnore nga Perëndia, Ati i Tij. Nga nëna e tij, Maria, Ai trashëgoi vdekshmërinë dhe ishte i prekshëm nga uria, etja, lodhja, dhembja dhe vdekja.

Për shkak se Jezu Krishti është I Vetëmlinduri i Atit, Ai qe në gjendje ta jepte jetën e Tij dhe ta merrte atë sërish. Shkrimet e shenjta japin mësim se “nëpërmjet shlyerjes së Krishtit” ne “m[arrim] një ringjallje” (Jakobi [LiM] 4:11). Ne mësojmë edhe që të gjithë “mund të ngrih[emi] në pavdekësi për te jeta e përjetshme” nëse “do të besoni[m]” (DeB 29:43).

Kur arrijmë ta kuptojmë më plotësisht se ç’do të thotë fakti që Jezusi është Biri i Vetëmlindur i Atit, besimi ynë në Krisht do të rritet. Plaku D. Tod Kristoferson, i Kuorumit të Dymbëdhjetë Apostujve, tha: “Besimi në Jezu Krisht është bindja dhe siguria për 1) gjendjen e Tij si Biri i Vetëmlindur i Perëndisë, 2) Shlyerjen e Tij të pafundme dhe 3) Ringjalljen e Tij të fjalëpërfjalshme”. Profetët e kohëve të sotme kanë dëshmuar: “[Jezu Krishti] ishte … Biri i Vetëmlindur në mish, Shëlbuesi i botës”.

Nga Shkrimet e Shenjta

Gjoni 3:16; Doktrina e Besëlidhje 20:21–24; Moisiu 5:6–9

Nga Historia Jonë

Në Dhiatën e Re ne lexojmë për gra, të njohura e të panjohura, që ushtruan besim në Jezu Krisht, i mësuan e i jetuan mësimet e Tij dhe dëshmuan për shërbesën, mrekullitë dhe madhështinë e Tij. Këto gra u bënë pasuese shembullore dhe dëshmitare të rëndësishme në punën e shpëtimit.

Për shembull, Marta dha dëshmi të fortë për hyjnueshmërinë e Shpëtimtarit kur i tha Atij: “Unë besoj se ti je Krishti, Biri i Perëndisë, që duhet të vinte në botë” (Gjoni 11:27).

Disa prej dëshmitareve më të hershme të hyjnueshmërisë së Shpëtimtarit qenë e ëma, Maria, dhe kushërira e saj, Elizabeta. Pak pasi engjëlli Gabriel e vizitoi Marien, ajo vizitoi Elizabetën. Sapo Elizabeta e dëgjoi përshëndetjen e Maries, ajo “u mbush me Frymën e Shenjtë” (Lluka 1:41) dhe dha dëshmi se Maria do të bëhej nëna e Birit të Perëndisë.

© 2013 nga Intellectual Reserve, Inc. I rezervohen të gjitha të drejtat. Shtypur në SHBA. Miratuar për anglisht: 6/13. Miratuar për përkthim: 6/13. Përkthim i Visiting Teaching Message, December 2013. Albanian. 10672 101

Çfarë Mund të Bëj Unë?

Përse është e rëndësishme që unë t’i kuptoj rolet e Jezu Krishtit?
Si mund të rritet besimi ynë teksa mbajmë besëlidhjet?