Iren Mahsen en Padahk en Pas, Septempe 2013
Uhtohr
Onopiki ni kapakap iren mahsen wet oh, ni eh pahn konehng, koasoaiahkihieng lih akan me komw kin pwarek. Doadoahngki peidek kan pwehn seweseikomwi kakehlailih riomw lih akan oh pwehn elehieng Pwihn en Sawas en Lih en wiahla pali kesempwal en pein ahmw mour. Pwehn alehdi iren kapehse kapatapat, tehk reliefsociety.lds.org.
Pwoson, Peneinei, Sawas
Uhtohr iei koahiek, ngoang, oh doadoahk en apwaliala roson en pali ngehn oh paliwar ong kitail oh atail peneinei kan.
Ni atail kin esehla oh doadoahngki tepin padahk kan en uhtohr nan imwatail kan oh atail wasahn kousoan kan, kitail pahn ahniki ansou mwahu en sewese me semwehmwe oh anahn oh en sewese mehteikan en uhtohrada pwe irail en kakehng ansou kan en kasongosong.
Kitail ahniki ansou mwahu oh pwukoa en doadoahngki atail saledek en pilipil pwehn uhtohrada ni pali ngehn oh paliwar. Ire me pid uhtohr ni pali ngehn oh atail anahne Samatail Nanleng, Elder Robert D. Hales en Pwihn en Wahnpoaron Ehk-riemeno mahsanih: “Kitail kin weliakapwala oh uhtohrada ni pali ngehn ni atail kin kapakap oh kapwaiada atail inou kan— sang ni alehda kamadipw sarawi ni warohng, warohng kolokol kisin likoun mweimwei ong nan tehnpas sarawi, oh tohnmetei pwehn sewese mehteikan.”
Elder Hales kaweidkinkitail en uhtohrada ni paliwar, “me iangahki kalaudehla atail sukuhl mwurin high school de sukuhl en doadoahk, esehla doadoahk, oh dehr netiki laudsang uwen me kitail alehdi. Nekidala mwohni met oh dehr wiahda pweipwand, kitail kaunopohngehr papah nan Mwomwohdiso rahn koaros nan sounpar kohkohdohkan. Kahrepen uhtohr ni koaros paliwar oh pali ngehn iei en kihieng kitail pohn wasa ile pwe kitail en kak sewese mehteikan.”
Sang Pwuhk Sarawi Kan
Madiu 25:1–13; 1 Timoty 5:8; Alma 34:27–28; tehk Doctrine and Covenants 44:6; 58:26–29; 88:118
Sang Atail Poadoapoad
Mwurin Souleng en Imwin Rahn Akan arail pokonpenehr nan Salt Lake Valley, me iei sapwtehn ehu dohsang aramas, President Brigham Young mwahuki irail en pweida oh kawada oh soandi nan imwarail kan. Met wehwehki me Souleng kan anahne kakoahiengkihla me pahn kak seweseirail en uhtohrda oh pein apwalih pein irail. Nan doadoahk wet, President Young likih mehlel koahiek, koahiek kapai, loaloapwoat, oh ineng mehlel en lih akan, oh e kangoange irail nan soangsoangen pwukoa kei. Mendahte soangsoangen pwukoa kan en lih akan en Pwihn en Sawas en Lih rahn wet ahr kin kalapw weksang mahs, tepin padahk kan kin duweduwehte:
-
Esehla pereniki doadoahk oh dehr pwang en doadoahk.
-
Kaiahne oh alehda ngenen tohnmetei.
-
Pein pwukoahki me anahn ong kakehlail en pali ngehn, roson, sukuhl, doadoahk, me pid pelien mwohni, mwenge, oh soahng teikan me wia anahnepen mour.
-
Kapakapki pwoson oh soupeikasal en apwaliala kahpwal akan.
© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen Visiting Teaching Message, September 2013. Pohnpeian 10669 885
Dahme I Kak Wia?
-
Ia duwen ahi sewsewese riei lih akan me I kin tetehk en diarada duwen apwaliala arail anahn akan en paliwar oh pali ngehn?
-
I kin kalkalaudehla ahi uhtohr en pali ngehn sang ni kaukaunopohng kamadipw sarawi oh kin tohnmetei pwehn papah?