Iren Mahsen en Presidensi Keieu, Septempe 2013
Souleng Kan ong Ansou Koaros
I kin taman sang ni ei tikitiko wasahkis nan sampah me kak mih nan kilel wia kasalepen ehuehu irair en ansou kan nan pahr ehu. Ehuehu sounpwong uhdahn kin lingan oh kaselel. Rahn ehu me lemwlemwur kaselel, sino kapw pwaindi nahna kan oh nanial en kahnihmw kan. Keteu kan en spring kin kamwakelehda soahng koaros oh kairada mour en tuhke koaros. Lahng pohmei kan en summer mwomwen wia likou poh mei me ketipin maraino kin daker powe. Autumn kin wekidala tuhke kan ong poh kan en oangoahng, weitahta, oh poh kan nanpwunge. Ni ei kisin serio, I kin perenki ehuehu ansou, leledo rahn wet, I pereniki mwohmw kan oh wekpeseng kesempwal kan en ehuehu ansou.
Kitail pil mie ansou nan atail mour kan. Ekei kin karakar oh kaperen. Ekei soh. Ekei rahn akan nan atail mour kin lingan duwehte kilel en nan kalender. Oh pil miehte rahn oh irair me kin kahrehda weikek oh kakete wadohng atail mour pepehm loal en soukoapwoaroapwoar, lingeringer, oh nsensuwed.
I ese me kitail koaros lelohngehr ansou me kitail kin medewe me e pahn mwahu en kousoan nan sahpw me direkihte rahn kaselel oh sohte lelohng ansou suwed kan nanpwunge.
Ahpw met sohte kak pweida. E pil sohte wia mehkot me kitail konehng kupwurki.
Ni ei medewe pein ei mour, e sansal me ansou tohto en keirda keieu laud kohdohngie ni ansou me I kin wie doudoula nan ansou apwal.
Samatail Nanleng me eripit nan mehkoaros mwahngih me pwe Sapwellime serihkan en keirda wiahla mwomwen aramas me re koasoandi en wiahla, re pahn anahne kehn ansou kan en kasongosong nan arail seiloak nan mour wet. Soukohp Lehi nan Pwuken Mormon mahsanih me ma sohte mehn uhwong, “pwuhng sohte kak wiawi” (2 Nephi 2:11). Ni mehlel, iei nsensuwed en mour me kin kahrehieng kitail en kak kasawiada, karasahieng, oh kalahnganki kaperenpeh kan (tehk D&C 29:39; Moses 6:55).
President Brigham Young nda duwe met: “Koaros me wehwe me kin mwarehda nin en klohri, mour poatoapoat, oh mour soutuk uhdahn anahne powehdi kahpwal koaros me koasoandihier ong me wehwe en lelohng, pwehn alehdi kilohri oh lapalapala. Kahpwal koaros me kak kohdohng aramas pahn lelohng aramas … pwehn kaunop irail en pereperen rehn Kauno. … Kasongosong oh irair koaros me komw lelohngehr anahn ong komourpomw.”
Peideko kaidehn ma kitail pahn kehn ansou kan en kasongosong ahpw ia mwomwen atail pahn powehdi kahpwal akan. Atail ansou keieu mwahu nan ansou en wekdeklahn ansou kan en mour iei en kolokol tengeteng ni loaloapwoat mahsen en Koht, pwe Sapwellime mahsen kin dehdehier kaidehnte en seweseikitail en dadaur kahpwal me kitail kin lelohng ahpw pil kaweid kitail en doulahsang. Samatail Nanleng kin ketikihieng Sapwellime mahsen rehn Sapwellime soukohp akan—eripit kesempwal me koasoandihier pwehn kaweid kitail nan kahpwal akan en rahk apwal akan ong peren me lokaia sohte kak kawehwe oh marain lingaling en mour soutuk. Ehu tiahk kesempwal en pelien atail mour wet iei en kalaudehla atail kehl, soupeikasal, oh mehlel en kolokol kehlail mehlel oh pwung mendahte apwal me kitail kin lelohng.
Irail akan me pepdaislahr oh alehdier kisakis en Ngehn Sarawi sokolongehr nan ahl en wia tohnpadahk oh malipilip oahngehr en idawehn kohwei ni loaloapwoat ong alueluwen Sounkomouro.
Sounkomouro mahsanih me ketipino kin dakada “pohn me suwed oh me mwahu kan, oh … keteu kin [mweredi] pohn me lelepek kan oh dipan akan” (Madiu 5:45). Ekei pak kitail sohte kak wehwehki kahrepen soahng kan me apwal, de pil sohte pwung, kin wiawi nan mour. Ahpw sang ni idihdawehn Krais, kitail koapwoaroapwoarki me ma kitail rapahki ni ngoang, kapakap ahnsou koaros, oh kamehlele, … soahng koaros pahn doadoahkpene ong [atail] mwahu, ma [kitail] alu inen (D&C 90:24; lipw tohrohr kapatapatehng).
Ni atail wia tohn Sapwellime Mwomwohdiso, ni atail wia Souleng kei, kitail kin papah ni peren oh inengieng nan irair en mesenlahng koaros oh rahk koaros. Oh ni atail wia met, mohngiongitail kan pahn direkihla pwoson sarawi, koapwoaroapwoar kamwahu, oh limpoak en nanleng.
Ahpw, kitail pahn anahne lelohng rahk kan koaros—koaros me kaperen oh kamedek. Ahpw sohte lipilipil rahk, ni duwen tohnpadahk en Sises Kraiso, kitail pahn kihieng atail koapwoaroapwoar Reh ni atail pahn aluhlahng Sapwellime marain.
Ni mwotomwot, kitail Souleng en Koht kei, ngoangki en esehla duwen Ih, poakohng Ih, oh en poakohng mehn mpatail kan. Kitail rasehng soun seiloak me alialu pohn ahl sarawi ehu me tohnpadahk kan kin idawehn, oh kitail pahn alu ni ngoang lao lel ni imwio.
Eri, kitail wia Souleng kei nan irair en rahk koaros. Kitail wia Souleng nan ansou koaros.
© 2013 sang Intellectual Reserve, Inc. Kolokol pwuhng koaros. Ntingda nan USA. Kamanaman ong lokaiahn wai: 6/13. Kamanaman ong kawehwe: 6/13. Kawehwehpen First Presidency Message, September 2013. Pohnpeian 10669 885
Padapadahk sang Iren Mahsen Wet
Presidensi Keieu mahsanih, “Ekei padahk keieu mwahu kin padahk sang ni koulki koul en sarawihkan” (Hymns, ix). Ni omw pahn kawehwe mahsen wet, medewe iang irail akan me komw kin padahkih koulki ehu koul en sarawi de ehu koul me pid duwen powehdi kasongosong: “Pahson Tengeteng” (nempe 6); “The Lord is My Shepherd” (nempe 108); de “Kitail en Nantihong” (nempe 10). Ma komw kehn me e konehng, ehukihieng irail ansou apwal ieu nan ahmw mour me wiahla kapai ehu.