I Ahniki Ansou Mwahu en Mweidala Ei Pahtou

Ansou me iengei kan Brother Chen oh ah pwoud pepdaisla nan aht ward-o, I uhdahn ahniki peren laud. Sounpar ehu mwurin ara pepdaiso, ira katengtengpene nan tehnpas sarawi, oh neira pwutak me mehla mwohn ara towehda Mwomwohdiso katengtengdi ong ira. E uhdahn kaperen kilang peneinei en Chen keirda nan rongamwahuo.

Brother Chen ahpw mehla nan loipene en sidohsa nan pahr mwurin mwo. Sangete ni paisuwedo, ah mehlao mwomwen kalapw mihmi nan ahi madamadau oh I pil kin kalapw ouramaniki. I kin pirida wie sengiseng oh kin idihdek pak tohto, “Dahme kahrehda? Dahme kahrehda Kauno mweidehng soahng kansensuwed wet en wiawi? Dahme kahrehda soahng wet eh kak wiawihieng peneinei kaselel wet?” Ehu rahno, ansou me I wie apwahpwaliki peidek pwukat, I pwokada pwuken padahk ehu oh wadek mahsen pwukat sang President Spencer W. Kimball (1895–1985):

“Ma kitail medewe me nan mour wet ihte atail ansou, eri medek, pahtou, souitar, oh mour mwotomwot pahn wia kahpwal ehu. Ahpw ma kitail kilang mour wet duwen mehkot me poatoapoat oh kohpeseng deila sohte imwi sangete tepin mour mwohn mour wet oh kolahng mour poatoapoat mwurin mehla, eri soahng koaros me wihwiawi kakete sansal ni duwen me e konehng. …

“Kasongosong kan sou mehn song atail kehlail, soumwahu pwe kitail en esehla kanengamah, mehla pwe kitail en unsekla poatoapoat oh linganla?”

Sang ansouo, I tepida powehdi ei pahtou oh kilenglahng ansou mwahu me kak kohdo me mie inoupe. I kin kilang nan ahi madamadau Brother Chen wie perperenieng ah peneinei. Kilel wet kihiengie meleilei. I ese me Sahm Nanleng pahn ketkihieng kitail marain oh soupeikasal en sohpai kasongosong kan.