“Kumwail Kohdo Rehi”

I kapingki mehlel en iang kumwail nan tiepene lap wet en Mwomwohdiso en Sises Krais en Souleng en Imwin Rahn Akan. Sapwellime Mwomwohdiso met. Kitail kin alehda mware ni atail kin pidolong nan Sapwellime wehi. Ih iei atail Koht, Sounkapikipiko, oh E unsek. Kitail wia aramas me mih pahn mehla oh dihp. Ahpw pwehki sapwellime limpoak ong kitail oh atail peneinei kan, E kin lukeikitail en karanih Ih. E mahsanih me kitail konehng keilahng Mpe oh E pahn keidohng mpatail; kitail koneng rapahki Ih ni ngoang oh kitail pahn diar Ih; kitail en peki oh kitail pahn alehdi; kitail konehng en letelet oh e pahn ritidahng kitail.

Ni Pahsohpa wet kitail ketemenki kahrepen atail poakohng Ih oh inou me E ketkihieng Sapwellime tohnpadahk loaloapwoat kan irail en wiahla kompoakapah kan. Sounkomouro ketkihda inouo oh ndahieng kitail duwen, ni atail kin papah Ih, E kin ketido rehtail. Karasepe nan kaudiahl ong Oliver Cowdery ansou me e papah Kauno rehn Soukohp Joseph Smith ni kawehwehdi Pwuken Mormon. Kauno mahsanihiong Oliver me E lokaiahieng pwehki ineng en Oliver. Oliver anahne nekid kaweid en Kauno nan ah mohngiong. Oliver anahne loaloapwoat oh pwerisek ni kolokol kosonned akan en Koht, oh eri Kauno pahn kapilkihpene lime kan en Sapwellime limpoak.

I kehnehr peren en irair en karaniala Sounkomouro oh duwen Eh ketin karanihie sang ni kemwekid mengei kan en peikiong kosonned akan.

Kumwail pil ahnikihier soangen irair pwukat. Mwein e wiawi ni ansou me kumwail pilada en iang towehda kamadipw sarawi. I ahniki irair wet ni ehu Sapad ni ei pwulopwul. Nan mwehio se kin alehda kamadipw sarawi ni soutik. Me I taman duwen ehu rahno sounpar 65 samwalahro, ansou me I kapwaiada kosonned en patehng ei peneinei oh iang Souleng kan, kin kakerenihie ong Sounkomouro.

E rotorot oh lemwlemwur likio. I taman pehm me I marahra oh karakar nan ihmw sarawio nisoutiko rehn ei pahpa nohno. Se tungoale kamadipw sarawio, me Priesthood en Aaron ko apwalih, ni inihnoukiong Samatail Soutuk en tamataman Sapwellime Iehroso oh en kolokol Sapwellime kosonned akan.

Ni imwseklahn mihtingo se kouliki koul en sarawi “Abide with Me; ’Tis Eventide,” iangahki lepin mahsen kan “Oh Sounkomour komw ketiket rehi pwohng wet.”

I pehm limpoak en Sounkomouro oh keren nihsoutiko. Oh I pehm kaloalamwahu en Ngehn Sarawi.

I men kapwurehdo pepehm kan en limpoak en Sounkomouro oh ei pehm Eh kerendo nan mihting en kamadipw sarawio ni ei pwulopwul. Eri ngehi kapwaiada pil ehu kosonned. I kin sukuhliki de onopiki pwuhk sarawi kan. Sang ni wadawad pwuhk sarawi, I ese me I kak pwuralahng ansou me Ngehn Sarawi kapehmki duwen me tohnpadahk kan pehm ni iasadahn Kauno oh duwen me re pehm ni Eh sapeng arail luk en iang kohdo nan imwarail oh kommoal ekis.

I wadek duwen rahn kesiluho mwurin Kalohpwualao oh seridio. Lih loalaoapwoat kei oh mehteikan, diar takaio eh ketepwursangehr ewen sousouo oh kilangada me Kahlepeo soher mie. Irial kohdo pwehki arail limpoak ong Ih pwehn kasarawihala Kahlepe.

Tohnleng riemen kesihnen limwahrail oh idek dah me re masepwehngki, mahsanih:

“Dahme kumwail raparapahkihki me momour emen nanpwungen me melahr akan?

E soher ket met. E ketin kaiasadahr. Tamanda dahme e ketin mahsanihong kumwail ni eh ketikette rehmwail nan Kalili:

‘Nein-Aramas uhdahn pahn pengpengla rehn me dipan akan oh kalohpwuwala oh eh pahn iasada ni kesiluhwen rahn.”

Nan Rongamwahu en Mark e kapatahieng kaweid sang emen tohnleng ko: “Eri, kumwail kohwei oh padahkihong sapwellime tohnpadahk ko, ahpw mehlel Piter, ‘E pahn tiengla mwohmwail Kalili, ih wasa kumwail pahn kilang ie, duwen eh ketin inoukihongkumwailehr.’”

Wahnpoaron akan oh tohnpadahk kan pokonpene nan Serusalem. Duwehte me kitail mwein pahn pil wia, irail masak oh mengimengiloal ni arail koasoakoasoaiahpene duwen wehwehn mehla oh rohng kan en Sapwellime kaiasada.

Riemen tohnpadahngko alu nisoutiko sang Serusalem kohla nan ahlo ong Emaus. Krais iasadahro pwarohng ira pohn ahlo ni wasa pahn soutikehr oh iang ira alialu kohla. Kaun iasadahro ketido rehra.

Pwuhken Luk mweidehng kitail en iang irail nihsoutiko:

“Eri, nindokon ara koasoakoasoi kohla, pein Sises pa ketin keiong mpara oh iang ira ketiket kohla nanialo.

“Ira kilangada, ira ahpw sohte kadehde me iei ih mwo.

“Sises eri ketin keinemwe rehra, Dahme kumwa koasoakoasoia kohdo? Ira ahpw uhdi, mwomwen pahtou.

“Emen ira, ede Kleopas, ahpw patohwanohng Sises, Pwe dah? Komwihte mehn keiru men nan Serusalem me sohte mwahngih dahme wiawiher kohdo rahn pwukat nan kahnimwo?”

Ira ndahieng duwen ara pahtoukihla me Sises mehla ni ara koapwoaroapwoariki me Ih me pahn wia Soundoar en Israel.

Kaun iasadahro mweinte mahsen ni limpoak ansou me E mahsenohng tohnpadahk nsensuwedila riemenet:

“Sises eri ketin mahsanihong ira, Kumwa meid loalopwon oh nan kapehd tikitik en kamehlele mehkoaros me soukohp ako kohpadahr!

“Pwe kaidehn Mesaia uhdahn pahn lokolongki soahng pwukat koaros mwohn eh pahn ketilong nan lingan en sapwellime wehi?

“Sises eri ketin kawehwehiong ira wasa kan me Pwuhk Sarawi mahsanih duwen pein ih, tepisang pwuhken Moses kohdo lel ni pwuhken soukohp koaros.”

Eri kohdo ansou me kin sair mohngiongi sangete ni ei wia kisin pwutak:

“Irail eri ketin lel nan kahnimw me re ketiket kolahng ie. Sises ahpw ketin mwomwehda me e pahn ketin dodouluhllahte.

“Ira ahpw ngidingidki patohwanohng, Komw ketin pweiekdi reht, pwe ketipin peiklahr oh wasa pwongier. Ih eri ketilong rehra nan ihmwo pwe en iang pweiekdi wasao.”

Sounkomouro alehda luko nihpwongo en pidolong nan ihmwen Sapwellime tohnpadahngko karanih kahnihmw Emaus.

E ketidi pwehn iang irail mwonge. E ale pilawa, kapaiada, pilitikihpeseng, oh kihieng ira. Mesara ko pa pehdpeseng ira ahpw esehda me Sises mwo. Sises ahpw sohrasang mwohra. Luk ntingihdi duwen pepehm en tohnpadahk pai pwuko: “Ira ahpw ndahpene, Nan kapehdita kat soh kin mwekimwekidki peren, rasehng kisiniei, ni eh kin mahmahsen oh kawehwehiong kita Pwuhk Sarawi, kohdo nanialo?”

Ni ansouohte tohnpadahk riemeno karuwaru pwurala Serusalem pwehn ndahieng Wahnpoaron ehk emeno dah me wiawihong ira. Ni ansouo Soukomouro pwurehng pwarada.

E kasalehda kokohp en Sapwellime misin pwehn tomwki dihp en koaros Sapwellimen Seme serihkan oh en sapwadekada selin mehla.

“[O]h mahsanihong irail, Ih duwen me ntingdier en met: Mesaiao uhdahn pahn lokolok oh iasada sang mehla ni kesiluhwen rahn:

“[O]h rongamwahu en koluhla en nan kapehd oh lapwapen dihp akan pahn lohkseli nan wehi koaros, ni mware, tepisang Serusalem.

“Eri kumwail me pahn kin sounkadehdehn mepwukat.”

Mahsen kan en Sounkomouro mehlel ong kitail rasehng Sapwellime tohnpadahk kan ansouo. Kitail me sounkadehdehn mepwukat. Oh pwukoa kaselel kitail alehda ansou me kitail pepdais ong nan Mwomwohdiso en Sises Krais en Souleng en Imwin Rahn akan sansal ong kitail sang soukohp Alma sounpar epwikihkei mwowe ni pihl kan en Mormon:

“Oh ih eri indahiong irail: Kilang, iet en Mormon pihlo (pwe iet duwen eden pihlo) oh met, nin duwen amwail kin anahne kodohng nan kehl en Koht, oh pahn kin adanikihla sapwellime aramas akan, oh kin men wahda en emen katoutou kan pwe irail en kak marahrahda;

“Ehi, oh me kumwail kin men mauk iang irail akan me kin mauk; ehi, oh kin kamwaiti irail akan me anahne en kin kamwaitala, oh en wia nin duwen sounkadehde kan en Koht ni ansou koaros oh ni mehkoaros, oh ni wasa koaros, me kumwail pahn mie lao kumwail mehla, pwe kumwail en kak komourla rehn Koht, oh en iang towe irail akan me pahn iasada mahs, pwe kumwail en kak ahneki mour soutuk—

“Me I indahiong kumwail, ma met iei duwen anahnepen amwail mohngiong kan, dahme kumwail kin uhwong ki amwail en pepdaiskihla mwaren Kauno, nin duwen mehn kadehde ehu mwowe me kumwail wiahiongehr ih inou ehu, me kumwail pahn pahpa ih oh kolokol sapwellime kosonned akan, pwe en ketin kapwiliwei rehmwail sapwellime Ngehno ni mwuledek?

“Oh met ni en aramas akan rongadahr mahsen pwukat, irail eri lopwolopwadahr ki arail perendahr, oh werikihda: Met iei anahnepen aht mohngiong kan.”

Kitail mih pahn inou sarawi en sewesehda irail me anahn oh en wia sounkadehde kan en Sounkomouro erein atail mour.

Kitail pahn kak wia met ni mwahu ihte ma kitail pehm limpoak ong Sounkomouro oh Sapwellime limpoak ong kitail. Ni atail loaloapwoat ong inou kan me kitail wiahda, kitail pahn pehm atail limpoak ong. E pahn keirda pwehki kitail pahn kehn Sapwellime manaman oh eh keiong mpatail ni atail papah Ih.

President Thomas S. Monson kin kalapw kataman kin kitail inou en Kauno ong Sapwellime tohnpadahk loaloapwoat ko: me sohte lipilipil me pahn alehda Sapwellime lidu kan E pahn iang ket wasao, pwe E pahn tihong kaunopada ahlo, E pahn ket ni palimaun oh ni palimeing, oh sapwellime Ngehn pahn ket nan mohngiongirail, oh Sapwellime tohnleng kan pahn kapil irail, pwehn utungirailda.

Mie pil ehu wiepe me komwi oh ngehi ahniki pwehn pehm Eh keiong mpatail. Ansou me kitail kin kihda sawas loaloapwoat ong Ih, E kin keiong mpen irail me kitail poakohng nan atail peneinei kan. Ansou koaros me I kin malipilip en papah Kauno ekis wasa tohrohr de en mweselsang ei peneinei, I kasawiada me Kauno kin kupwkupwure ei pwoud oh nei serihkan. E ketin kaunopadahr lidu limpoak kan oh ansou mwahu kan en kihdo irail Mpe.

Kumwail pehmehr kapai wet nan amwail mour. Tohtohn kumwail ahniki kompoakapah kan me wie kokohseli likin ahlo kolahng mour soutuk. Kumwail medewehier dah me kumwail pil kak wia pwehn kapwureiiraildo. Kumwail kak koapwoaroapwoarki me Kauno pahn keiong mparail ni amwail pahn papah Ih ni pwoson.

Kumwail taman en Kauno inou ong Joseph Smith oh Sidney Rigdon ansou me irail mweselsang arail peneinei ni arail wia Sapwellime ilek. Kauno mahsanihong Sidney oh Joseph, me arail peneinei kan mwahu; irail mih nin Lime, oh E pahn wiahiong irail me E kupwurki; pwe Ih me ahniki manaman koaros.

Duwehte Alma oh Nanmwarki Mosiah, ekei kumwail lidu loaloapwoat kan me papahier Kauno werei oh mwahu ahpw naineki serihkan me salongala mendahte tohnmetei en arail pahpa nohno ong Kauno. Duwehte kumwail, irail wia uwen arail kak, pil iangahki sawas sang aramas limpoak oh loaloapwoat kan.

Alma oh Souleng kan kapakapki nah pwutako oh nein Nanmwarki Mosiah pwutak kan. Oh tohnleng men kohdo. Amwail kapakap kan oh kapakap en irail me doadoahngki arail pwoson pahn wahdo sapwellimen Kauno lidu kan pwehn sewese amwail peneinei. Irail pahn sewese irail pilada ahlo ong Koht, mehnda ma irail lohdi pahn Sehdan oh nah aramas akan, me ahniki doadoahk en kauwehla peneinei kan nan mour wet oh nan mour soutuk.

Kumwail taman ahn tohnlengo mahsen ong Alma me Pwulopwulo oh nein Mosiah pwutak kan nan arail sapeik: Tohnlengo ndahieng Alma me e kohdo pwehki Kauno karongehier kapakap kan en Sapwellime aramas oh pil kapakap en Sapwellime lidu, semen Alma. Tohnlengo mahsanih me semen Alma kapakapki pwoson laud me Alma en pwurodohng wehwehn mehlelo; eri, pwehki met tohnlengo kodohn kawehwehiong Alma duwen kehl oh manaman en Koht, me kapakap kan en sapwellimen Kauno lidu kan en pasapengla pahrekohng arail pwoson.

Ahi inou ong kumwail me kin kapakap oh papah Kauno kaidehn me kumwail pahn alehdi kapai koaros me kumwail inangih ong pein kumwail oh amwail peneinei. Ahpw I kak inoukihiong kumwail me Sounkomouro pahn keiong mpomwail oh kapaiekihda kumwail oh amwail peneinei dah me keieu mwahu. Kumwail pahn ahniki kaloalamwahu en Sapwellime limpoak oh pehm Eh pahn keiong mpomwail ni amwail pahn kapahwei pehmwail oh papah mehteikan. Ni amwail pahn sewese irail akan me anahn oh sawaskihda kamwakelekel en Sapwellime Tomw ong irail me pahtouki dihp, kehl en Kauno pahn utung kumwail. Lime kan kin iang pehmw kan kedengdengwei pwehn sewese oh kapaiahda sapwellimen Samatail Nanleng serihkan.

Mie pwurpene kaselel kaunop ong kitailehr. Ih atail pahn kilang pweidahn inou en Kauno me kitail poakohng. Iei Ih me kin kasamwoh kitail ong mour soutuk Reh oh rehn Samatail Nanleng. Sises Krais ketin mahsanih nin duwe met:

Rapahki en wahdo oh kauwada Sapwellime Saion. Kolokol Sapwellime kosonned akan nan mehkoaros.

Ma kitail kolokol Sapwellime kosonned akan oh dadaurete lel imwi, kitail pahn ahniki mour soutuk, me wia kisakis keieu kesempwal sang koaros kisakis kan en Koht.

Pwe irail me mour pahn sohsohki sampah, oh irail akan me mehla pahn kommoalsang arail doadoahk koaros, oh wahn arail doadoahk kan pahn idawehn irail; oh irail pahn alehdi mwarerail nan tehnpas akan en Sahmo, me Sises Krais ketin kaunopadahr ong irail.

I kadehdehki me kitail kak sang ni Ngehno idawehn luk en Sahm Nanleng: Ih nei [P]wutak [K]empoake met. Rong Ih!

Sang Sapwellime mahsen oh Sapwellime karasaras, Krais ketin kasalehiong kitail duwen keiong Mpe. Emenemen sapwellimen Sahm Nanleng me pilada en pidolong nan kehl en pepdais ong Sapwellime Mwomwohdiso pahn ahniki ansou mwahu en padahngki Sapwellime rongamwahuo oh en rong sang Sapwellime lidu malipilip kan Sapwellime luk “kohdo rehi.”

Koaros sapwellime lidu me inou ong Kauno nan Sapwellime wehi pohn sampah oh nan sapwen ngehn pahn alehdi Sapwellime kaweid ni arail pahn kapaiahda oh papah mehteikan pwehki Ih. Eri irail pahn pehm Sapwellime limpoak, oh diar popohl ni arail pahn keiong Mpe.

Ngehi sounkadehde en Iasadahn Kauno duwehtehte ma I pil iang mih wasao ni soutiko rehn tohnpadahk riemeno nan ihmwo pohn ahl en Emaus. I ese me E ketin ieias, duwehte Joseph Smith ansou me e patohwanda Sahm oh Nah nan lingan marain en menseng nan welin tuhkeo nan Palmyra.

Met iei Mwomwohdiso mehlel en Sises Krais. Ihte nan kih kan en priesthood me President Thomas S. Monson wie kolokol me kak dierek manaman kitail en kak katengteng duwen peneinei en momour erein rehn Samatail Nanleng oh Kauno Sises Krais. Kitail pahn ni Rahn en Kadeiko uh mwohn Sounkomouro, kilikilangpene. E pahn wia ansoun peren ong irail akan me keiong Mpe ni arail wia Sapwellime doadoahk nan mour wet E pahn kaperen en rong lepin mahsen: “Keieu mwahu, papah lelepek oh mehlel men kowe!” I kadehdehki met ni duwen sounkadehde en Soukomour iasadahro oh atail Soundoar ni mwaren Sises Krais, ahmen.